Yishima 22 - Mukanda Wa Zambi 1970

¹ Nyi unambe kutongola mukachi ka yuma yaali, lufuma mubema hanji ubite unji, tongola lufuma mubema.

² Pichi ni yiswale yaatanga eswe aali kuli Mwene Zambi; kaakulifwa ku Chuma chino.

³ Akwa kukanyama, muze maamona Vunda kujineza, keechi kuya ko, alioze yoze keshi manyonga manjila mo, mba ku songo himalinyenga.

⁴ Ononoka kuli Mwene Zambi, bwako mukwa kulikehesa, mba muubwa ni ubite, ni ulemu, ni mwono usuku.

⁵ Nyi unazange mwono we, lifunge ku miheto yize yakufwa yingulungulu, chinyina kusuku.

⁶ Fumba mwana mu jila yize chamutamba kuya, mba kechi kukatuka mo ndoo ku ukulwana wenyi.

⁷ Yiswale kaali ndungo ja pichi. Mukwa kusondama mbongo kali ndungo ya mukwa mbongo.

⁸ Yoze makuwa mbuto ya uhenge, makahela mihuko ya Vunda; mba kechi kahasa nawa kubinjisa atu.

⁹ Hana yakulia ye kuli yiswale, mba Zambi makuwahisa.

¹⁰ Huma mukwa kulengumuka, mba pami, ni kuzwela, ni kulisaula muyisula.

¹¹ Nyi wakubwa ni mbunge yibema ni wakuhanjika ni vumbi, mwanangana mabwa sepa lie.

¹² Mwene Zambi kakufunga umwenemwene muze akukununa maliji ja akwa mahuza.

¹³ Mukwa ngwaza kakutwama mu zuwo lienyi nee. Ngwenyi: “Nyi natuhuka, tambwe mangukwata.”

¹⁴ Utanji uli muheto, kuwakushiha atu waze Mwene Zambi akutenukina.

¹⁵ Ana kaakulinga yuma ya mokomoko, ni ya uhepuke, alioze maalilongesa ndako yibema nyi atu maalamba.

¹⁶ Nyi wahana yawana kuli pichi hanji wa kubinjisa yiswale hanga ubwe pichi, nyingika ngwe ni yena mwene muukabwa chiswale.

Yishima makumi atatu ya mana

¹⁷ Banjika, ngukulweze yishima yize akwa mana haanate. Lilongese yo.

¹⁸ Muuwahilila nyi wayiwuluka ni kuyilongesa.

¹⁹ Ngunazange ushachile hali Mwene Zambi, kashika musono hinakwambulwila yo.

²⁰ Hinakusonekena yishima makumi atatu. Kuyili ni yinyingi ni mana,

²¹ muyikulongesa umwenemwene. Mba muze maakutuma hanga use chinyingi, muukeza ni kumbululo libema.

-1-

²² Kanda ubinjisa yiswale mumu chili chashi; chibwe waze ali mu chisopelo.

²³ Mwene Zambi mabatula milonga yo, mabinjisa waze akwabinjisa.

-2-

²⁴ Kanda ulikata ni yifwatulo.

²⁵ Nyi ka, muulilongesa ndako jo; kuuchi kuhasa kwalumuka.

-3-

²⁶ Kanda Ulakenya kufweta kongo lia mutu mukwo.

²⁷ Nyi wahona mbongo ja kufweta kumaakakutambula chibwe muhela we.

-4-

²⁸ Kanda ututulula chinyingi cha njiza chize asele tushakulu twe.

-5-

²⁹ Ngulweze mutu yoze wakulinga milimo yibema. Ngwami, kanahiana atu akwo anji anatela kulikata ni mianangana.