Yishima 20 - Mukanda Wa Zambi 1970

¹ Kunwa chinji muchikupwisa mukwa zungo ni chihepuke, kuzengewa chili uhepuke.

² Chinabeme kwivwila mwanangana chifwatulo woma ngwe chize wakuvwila tambwe yoze unakenana woma. Nyi wamuvwila ufwatulo mahasa kukushiha.

³ Chihepuke kakuzwela nikawashi, alioze akwa mana kaakulituna cho.

⁴ Njimi, mukwa ngwaza, yoze keshi kulima minda yenyi ha mwaka Ubema, kechi kubwa ni mbuto ha mwaka wa kuhela.

⁵ Manyonga ja mutu kaali ngwe meya a mu shima lisuku, alioze mukwa malinjekela mahasa kwataha.

⁶ Atu anji akuliamba ngwo: “Tuli akwa shindakenyo,” alioze iya mahasa kuwana umwe mukwa shindakenyo.

⁷ Kaawaha ana waze ali ni tato wa tuwika mbunge, yoze wakulinga chize chinalite.

⁸ Mwanangana, muze masopa mulonga, kakunyingika yibi muze hayimona.

⁹ Kuli umwe mutu mahasa kwamba ngwenyi: “Mbunge yami yinabeme, hinabema ku shili yami yeswe,” nyi?

¹⁰ Mwene Zambi kakuvutwokela pezo ni njongo ja uhenge.

¹¹ Chibwe mwana kakusoloka chize abwa ku yize akulinga; muuhasa kwamba nyi kali mubema ni katuwika mu mbunge.

¹² Mwene Zambi kanatwehe meso a kumona no ni matwi akubanjika no.

¹³ Nyi wahwisa tangwa lie ni kubomba, muukabwa chiswale. Hondangana mba muukabwa ni yuma yinji yakulia.

¹⁴ Mukwa kulanda matangwa eswe kakulinyenga ngwenyi, ndando yahiana naye, alioze muze anayi mu jila himalisamba ha chize hafumbula.

¹⁵ Maliji a mana kaali alemu kuhiana oru ni mawe a ndando yinji.

¹⁶ Chihepuke yoze unalakenya kumbata yilemu ya kufweta kongo lia chilambala, chinabeme kukwata yuma yenyi chifungo.

¹⁷ Yuma yize mutu hayuka mu uhenge, mahasa kuwahilila nayo ngwe yakulia yibema, alioze ku songo muyikabwa ngwe masekeseke mu kanwa lienyi.

¹⁸ Hula mana abema, mba muukumba; kanda ubutula jita nyi kuwalilulikile ko.

¹⁹ Mukwa kalundanganyishi keshi kusweka nichimwe. Lihandunune ni akwa kulimbambwila.

²⁰ Nyi washinga yisemi je, mwono we muukahwa ngwe chize yakujima ndeya.

²¹ Nyi chili chashi kutambula ubite we, kuuchi kukukwasa kuhiana.

²² Kanda ulikalila milonga yena mwene. Shachila hali Mwene Zambi, kumayikala.

²³ Mwene Zambi kakuvutwokela pezo ni njongo ja uhenge.

²⁴ Mwene Zambi hanalulika jila yetu, ngwe kuchi mutu mahasa kunyingika jila yenyi mwene?

²⁵ Nyonga kanawa shimbu kanda Ulakenya mulambu kuli Mwene Zambi. Nyi ka, muwivwa chinyengo mumu ha chilakenyo che.

²⁶ Mwanangana wa mana mahengula hanga anyingike yoze wakulinga yibi, mba makamumwesa lamba, kechi kumuvwila keke.

²⁷ Mwene Zambi hanatwehe manyonga ni Shimbi ya mu mbunge, kutwahashile kusweka Chuma nichimwe.

²⁸ Mwanangana manyongonona mukuyula nyi mabwa mukwa kutuwika mu mbunge ni mukwa ululi.

²⁹ Twakuchichimieka tachi ja ukweze, ni kusa vumbi makulwana a kambu jitoma.

³⁰ Tangwa likwo nyi twamona lamba, mutwalumuna ndako jetu jibi.