Yishima 2 - Mukanda Wa Zambi 1970

Yiwape ya mana

¹ Mwanami, banjika ku yize ngunakulongesa, upachikile kama mu mbunge, yize ngunakulweze ha kulinga.

² Banjika ku yuma ya mana, sako tachi unyingike.

³ Eta yinyingi, liumbe hanga ubwe ni malinjekela.

⁴ Afupe ngwe chize muufupa prata hanji ubite wa kuhengama.

⁵ Nyi wachilinga, mba mununyingika ulumbunwiso wa kulemesa Mwene Zambi, mba muubwa ni mana hakutwala kuli Zambi.

⁶ Mwene Zambi mwe wakuhana mana, ni malinjekela, ni yinyingi.

⁷ Iye wakukwasa ni kufunga akwa ululi ni akwa kutuwika mu mbunge.

⁸ Kakufunga akwa ululi, waze akulikunjika kuli iye.

⁹ Nyi muungubanjika, mba muunyingika umwenemwene, ni ululi, ni yuma yize yinalite; muunyingika nawa yize chatamba kulinga.

¹⁰ Mba muubwa mukwa mana, ni malinjekela je maakuwahilisa.

¹¹ Mana je ni malinjekela je maakufunga,

¹² hanga kuuchi kulinga yibi. Maakufunga kuli atu waze meeseka kukubinjisa ni maliji jo,

¹³ waze heehuka ululi, atwame mu milima,

¹⁴ waze akwivwa chiseke alinge yibi, waze akusehejela muze yuma hiyabiha.

¹⁵ Kaali yihenge, niumwe kahashile kwafuliela.

¹⁶ Mana ni malinjekela maahasa kukukwasa kulituna chitanji yoze makulembejeka ni maliji jenyi,

¹⁷ yoze hehuka lunga lienyi, ni havulama chilakenyo chenyi ku meso ja Zambi.

¹⁸ Nyi ngwe waya ku zuwo lienyi, kuunende mu jila ya kufwa. Nyi muuya ko muukundama muma lia afu.

¹⁹ Niumwe yoze Wakumunangisa mahiluka nawa. Kechi kuhiluka nawa ni mwono.

²⁰ Kashika yena chatamba kukaula ndako ja malunga abema, chatamba kubwa mukwa ululi.

²¹ Mumu akwa ululi, kumaahinga chifuchi, kumaatwama mu chifuchi chetu.

²² Alioze Zambi makanongesa yingulungulu mu chifuchi, yivulumunyi makaachiza mo.