Yishima 19 - Mukanda Wa Zambi 1970

¹ Chibema kubwa chiswale alioze wa tuwika mbunge, kuhiana chihepuke mukwa mahuza.

² Kulihana ku milimo, hindu kuhona chinyingi hi chibema ko; kulipupwisa muchikoka Vunda.

³ Atu akwo kaakulibihisa ni yitanga yo ene ya uhepuke, mba kaakusuma Mwene Zambi mulonga.

⁴ Pichi matangwa eswe kaakubwa ni masepa aha; alioze yiswale chibwe akepe waze ali no, kaakwakatuka.

⁵ Nyi muuhanjika mahuza mu chisopelo, maakumwesa lamba, kuuchi kuhasa kuchina.

⁶ Atu eswe kaakufupa vumbi lia atu alemu; atu eswe kaakuzanga kubwa masepa ja waze akuhana yawana.

⁷ Chiswale, chibwe usoko wenyi mwene keeshi kumuzanga; ha chino hi Chuma cha kulishimwoka ko keshi kwenyi masepa. Chibwe masa tachi, kahashile kubwa no niamwe.

⁸ Mutu yoze wakulilongesa yeswe yize mahasa, kakuliwahisa iye mwene. Nyi mewuluka yize halilongesa, mba mayuka.

⁹ Mutu yoze mahanjika mahuza mu chisopelo maamumwesa lamba;

¹⁰ Yihepuke kuchatambile kubwa ni ubite unji, ni ndungo kuchaatambile kuyula atu alemu.

¹¹ Nyi uli mukwa mana, kuuchikutenuka, muulihumikiza. Nyi umwe makulinga chibi, kanda uchalula ngwe Chuma.

¹² Ufwatulo wa mwanangana uli ngwe kuhiohia cha tambwe, alioze vumbi lienyi lili ngwe mume ha mwambu.

¹³ Mwana chihepuke kakumwesa tato lamba. Pwo wa chimbangwinya kali ngwe meya waze anasotoka ndwe, ndwe, ndwe.

¹⁴ Mutu mahasa kuhinga zuwo ni ubite ya yisemi jenyi, alioze shina Zambi mwe mahasa kumwaha pwo wa mana.

¹⁵ Mukwa ngwaza kakubomba chinji; kakufwa zala.

¹⁶ Funga Shimbi ja Zambi, mba muubwa ni mwono usuku; nyi wajilelesa kumuufwa.

¹⁷ Muze unahane kuli yiswale, chili ngwe unasondamisa kuli Mwene Zambi, neye makukundulula.

¹⁸ Fumba ana je shimbu achili akweze, muze maahasa kulilongesa. Nyi ka, kafwa ngwe wakwakolesa akalishihe ene.

¹⁹ Chifwatulo mamona lamba. Nyi ngwe wamulamwina ku Vunda, nyingika ngwe muukachilinga nawa.

²⁰ Banjika ku kufumba, tayiza longeso, mba hanga ukabwe mukwa mana.

²¹ Atu kaakushinginyeka yuma yeka ni yeka, alioze Zambi malinga chize iye mwene anazange.

²² Atu chaatamba kubwa amwenemwene; yiswale kaakumona lamba, alioze akwa mahuza kaakumona lamba liahiana.

²³ Ononokena Mwene Zambi, mba muubwa ni mwono usuku, muuwahilila, muubwa ni uhwimino.

²⁴ Atu akwo kaali akwa ngwaza kuhiana, kaahashile chibwe kusa yakulia mu makanwa jo.

²⁵ Chinabeme kumwesa akwa kulengumuka lamba, hanga alilongese chinyingi. Nyi uli mukwa mana, muulilongesa muze maakukanjisa.

²⁶ Shina mwana yoze keshi vumbi ni sonyi mwe malinga tato chibi ni kuhanga naye.

²⁷ Mwanami, nyi wecha kulilongesa, ha shimbu likepe muuvulama yize walilongesele kulu.

²⁸ Chela yoze unazange kumwesa mutu mukwo lamba kakuhengesa ubatwilo. Yingulungulu kaakuzanga kulinga yibi.

²⁹ Akwa kulenya, chatamba kwabatwila; yihepuke, chatamba kwalamba.