Yishima 18 - Mukanda Wa Zambi 1970

¹ Atu waze keeshi kulikata ni akwo kaakunyonga shina ayo ene; kaakulituna yuma yize akwo eswe ananyingika ngwo, yili yamwenemwene.

² Chihepuke, yeswe yize akwivwa keshi kuyalula ngwe Chuma; kakuzanga lume kusolola mana jenyi.

³ Nyi muulinga yibi muwivwa sonyi. Nyi muutokesa ulemu we, atu maakulelesa.

⁴ Maliji a mutu maahasa kubwa chishina cha mana, kaajotoka ngwe kalunga lwiji, kaakuhuzuluka ngwe chitwetwe cha kekema.

⁵ Hi chibema ko kusambisa akwa uhiso, ni kuhisa akwa kusamba.

⁶ Muze chihepuke mabutuka kuhamika, chili ngwe kanazange amulambe.

⁷ Muze chihepuke akuhanjika, kakulishiha iye mwene, kakufwa mu muheto wa maliji jenyi mwene.

⁸ Maliji a kalundanganyishi kaali ayema ngwe yakulia yize twakuzanga kulia.

⁹ Mukwa ngwaza kali ngwe mukwa kushiha.

¹⁰ Mwene Zambi kali ngwe zuwo lisuku liakukoleka muze akwa ululi maahasa kuchinyina ni kubwa mu uhwimino.

¹¹ Alioze pichi kaakunyonga ngwo, ubite wo kuwakwafunga kanawa ngwe chipanga chisuku chakukoleka chize chajingilika limbo.

¹² Atu kaakulemesa akwa kulikehesa, alioze akwa kulengumuka kumaakafwa.

¹³ Yoze makumbulula shimbu kanda achibanjika kanawa, kali chihepuke, kumevwa sonyi.

¹⁴ Nyi wakuzanga kubwa ni mwono muze unayiji, muchikukwasa, alioze nyi kuushi kuzanga kubwa ni mwono, kuuchi kuhinduka.

¹⁵ Akwa mana kaakulilulika ni kaakuzanga kulilongesa matangwa eswe.

¹⁶ Unazange kubatwiza mutu mulemu, nyi? Mutwalile chawana, mba muchibwa chashi.

¹⁷ Mutu yoze malianga kwambulula mulonga ku chisopelo, atu maamona ngwe kali mukwa ululi, ndoo ni muze yoze ali nenyi mulonga mamuhula yihula.

¹⁸ Nyi akwa tachi aali kaakuhamika ku chisopelo, kuta chela muchihasa kubatula mulonga.

¹⁹ Kwasa mukwenu, neye makufunga ngwe chipanga chakukoleka cha limbo, alioze nyi wamuzwelesa, neye makukalishila mbunge.

²⁰ Maliji eswe waze wakwamba, maakukwasa hanji maakubihisa.

²¹ Maliji je maahasa kufunga mwono we hanji kuwonona; Chenacho Chakutamba kutayiza yuma yize muyikuwana mumu ha maliji je.

²² Kuwana pwo hiwawana Chuma chibema; kafwa chinalumbunuka ngwo, Mwene Zambi halinga kanawa kuli yena.

²³ Muze chiswale akuhanjika, kakuhanjika ni vumbi, alioze muze pichi akukumbulula, kakuhanjika maliji akalu.

²⁴ Masepa akwo keeshi kunyongonona ndoo ni ku songo, alioze akwo kaakulalaminya kuhiana waze asemuka no.