Yishima 16 - Mukanda Wa Zambi 1970

¹ Mutu kakushinginyeka, alioze Mwene Zambi kali ni maliji akusula.

² Muuhasa kunyonga ngwe yuma yeswe yize wakulinga yinalite, alioze Mwene Zambi kakweseka mbunge ya mutu.

³ Kunjika milimo ye mu moko ja Mwene Zambi, mba muyiwaha.

⁴ Yuma yeswe yize atangile Mwene Zambi yili ni songo liayo; songo lia yingulungulu lili kufwa.

⁵ Mwene Zambi kakuvutwokela akwa kulengumuka eswe; kumakaamwesa lamba.

⁶ Bwako mukwa kushishika ni mukwa umwenemwene, mba Zambi makukonekena milonga ye. Ononokena Mwene Zambi, mba chibi nichimwe kuchichi kukuwana.

⁷ Nyi muulinga chize Mwene Zambi akuzanga, chibwe akwa kole je maabwa masepa je.

⁸ Chili chibema kubwa ni yikepe yize watambula ni ululi, alioze hi chibema ko kubwa ni yinji yize watambula ni uhenge.

⁹ Mutu kakushinginyeka, alioze Zambi kakululika yitanga yenyi.

¹⁰ Mwanangana kakuhanjika ni chiyulo cha Zambi; ubatwilo wenyi kuwalita matangwa eswe.

¹¹ Mwene Zambi kakuzanga ngwenyi, kupezalisa ni kweseka yeswe yibwe ya ululi, ni ndando ya yuma yeswe yilite.

¹² Mianangana kaahashile kulihumikiza ni yibi, mumu ululi we Wakukolesa wanangana.

¹³ Mwanangana kakuzanga kubanjika umwenemwene, kakulweza vumbi kuli waze akuhanjika umwenemwene.

¹⁴ Nyi ngwe mwanangana matenuka mahasa kushiha atu. Kashika mukwa mana kakweseka kumuhwimisa mbunge.

¹⁵ Nyi ngwe mwanangana mawahilila ni atu; muchibwa ngwe vula musazu yoze wakubuzuka yuma yeswe.

¹⁶ Chibema kubwa ni oru ni prata, alioze chibema kuhiana kubwa ni mana ni malinjekela.

¹⁷ Akwa ululi kaakwenda mu jila yize ya kukondolwela yuma yibi. Kashika tala kanawa kuze unayi, mba muuhasa kulamwina mwono we.

¹⁸ Kulengumuka chakutwala ku kufwa, kulizata kuchakuvulumwisa.

¹⁹ Chili chibema kubwa mukwa kulikehesa ni kubwa chiswale, alioze hi chibema ko kubwa mukwa kulengumuka nikulianyina ubite wa kububa.

²⁰ Banjika ku chize akulongesele, mba yuma ye muyiwaha; Shachila hali Mwene Zambi, mba muwahilila.

²¹ Mukwa mana kaakumunyingikina ku malinjekela jenyi. Nyi mahanjika maliji a zango, atu maamufuliela.

²² Malinjekela kaali ngwe shima lia meya a mwono kuli mukwa mana, alioze kweseka kufumba yihepuke chili kutokesa tangwa.

²³ Akwa mana kaakushinginyeka, mba maahanjika; kashika yuma yize akuhanjika yikwete shindakenyo.

²⁴ Maliji a zango kaali ngwe wuchi; kaakuyema ni kaakutakamisa mujimba.

²⁵ Jila yize mutu ananyongo ngwenyi yinabeme, muyihasa kumutwala ku kufwa.

²⁶ Katuwa mwe wakuhondanganyisa mukwa milimo, mumu kazangile kufwa zala.

²⁷ Yingulungulu kaakufupa kulinga akwo yibi, chibwe maliji jo kaali akalu.

²⁸ Yingulungulu kaakulamikiza atu akwo; kaakukoka Vunda ni kushiha usepa.

²⁹ Akwa kushiha atu kaakwonga masepa jo, kaakwatwala mu jila ya lamba.

³⁰ Tala kanawa akwa kusehejela ku meso ni akwa kuchola ku meso; kaali ni manyonga abi.

³¹ Mwono usuku uli fweto ya akwa ululi; kambu jitoma jili chipangula cha uhenya.

³² Chili chibema kubwa chihumikiji, kuhiana kubwa mukwa ndundo. Chili chibema kuliyula yena mwene, kuhiana kuyula membo.

³³ Atu kaakuta chela anyingike chize Zambi anazange, alioze Zambi iye mwene kaakubatula chize maakumbulula.