Yishima 14 - Mukanda Wa Zambi 1970

¹ Majiko kaakukola ni mana ja mapwo, alioze uhepuke kuwakwashiha.

² Mukwa kutuwika mu mbunge kakulemesa Mwene Zambi; alioze chihenge kakumulelesa.

³ Kulengumuka cha chihepuke chakumuhanjikisa yuma yinji, alioze maliji a mukwa mana kaakumufunga.

⁴ Kuze kukushi ngombe a kulima no, keeshi kubwa ni yakulia yinji, alioze kuze kuli ngombe yakulia yinji yakubwa ko.

⁵ Chela wamwenemwene keshi kuhanjika mahuza, alioze chela wa kwonga kakuhanjika mahuza matangwa eswe.

⁶ Akwa kulenya kaahashile kubwa ni mana, alioze akwa malinjekela kaakulilongesa nikawashi.

⁷ Kanda ulikata ni yihepuke; keeshi nichimwe chize maakulongesa.

⁸ Mumu yika mukwa malinjekela kali ni mana? Mumu kakunyingika chize chatamba kulinga. Mumu yika chihepuke kali ni uhepuke? Mumu kakunyonga ngwenyi ngunanyingika chize Changutamba kulinga, alioze kachinyingikine.

⁹ Yihepuke nyi maalinga yibi, keeshi kuyalula, alioze akwa ululi kaakufupa ukonekeno.

¹⁰ Chiseke chili cha yena mwene, ni kubiha necho chili cha yena mwene. Niumwe mahasa kuyivwa hamwe ni yena.

¹¹ Zuwo lia mukwa ululi mulimana nguu muze haanunguna kulu zuwo lia chingulungulu.

¹² Jila yize mutu ananyongo ngwenyi yinabeme, muyihasa kumutwala ku kufwa.

¹³ Mukwa kuseha mahasa kusweka yinyengo yenyi, alioze chibwe asehe hindu kali ni yinyengo.

¹⁴ Atu abi maamona lamba ngwe chinalite, alioze akwa ululi maakundulula nikulita ni yitanga yo.

¹⁵ Chizuzuke kakufuliela yuma yeswe yize atu akwamba, alioze chikanyame kakutala kanawa yize iye mwene akulinga.

¹⁶ Akwa mana kaakulifunga ku Vunda; alioze yihepuke keeshi kulihumikiza, kaakulipupwisa kulinga yuma nikawashi.

¹⁷ Atu waze akutenuka nikawashi kaakulinga yuma ya uhepuke, alioze akwa mana kaakulihumikiza.

¹⁸ Yizuzuke kaakumona lamba nikulita ni uhepuke wo; fweto ya akwa kukanyama malinjekela.

¹⁹ Yingulungulu maakahetamina ku meso ja akwa ululi, nikwalweza vumbi.

²⁰ Chiswale keshi kumuzanga chibwe kuli mwenyembo wenyi, alioze pichi kakwete masepa anji.

²¹ Yoze wakulelesa mwenyembo wenyi kakuvulumuna; lweza yiswale utu, mba muwahilila.

²² Nyi muulinga yibema, muufumbula umwenemwene ni vumbi kuli akwenu; alioze nyi muulinga yibi, muubihisa.

²³ Hondangana mba muufumbula mwono we; alioze nyi muuta pande wika ni masepa je muubwa chiswale.

²⁴ Fweto ya akwa mana ubite; alioze yihepuke kaakwanyingikina ku uhepuke wo.

²⁵ Chela wamwenemwene kakulamwina atu; alioze chela wa mahuza kakwonga atu.

²⁶ Yoze wakulemesa Mwene Zambi kakutakama ni uhwimino hamwe ni akwa zuwo lienyi.

²⁷ Unazange kuchina kufwa, nyi? Kulemesa Mwene Zambi chili shima lia meya a mwono.

²⁸ Ulemu wa mwanangana wakukatuka ku kwoka cha atu waze akuyula. Nyi ngwe keshi no, mabwa mutu wamokomoko.

²⁹ Nyi ngwe muulihumikiza, muubwa mukwa mana; alioze nyi muwivwa wuli nikawashi, muusolola uhepuke we.

³⁰ Uhwimino mu mbunge wakutakamisa mujimba, alioze ukwa uli ngwe yikola yize yakubolesa yifwaha.

³¹ Mutu yoze wakubinjisa yiswale, kakulelesa Tangi yo, alioze yoze wakulweza yiswale utu, kakulemesa mwe Tangi.

³² Yingulungulu kaakulimbuka mumu ha yitanga yo yibi, alioze umwenemwene wa akwa ululi kuwakwafunga.

³³ Manyonga ja mukwa malinjekela eswe kaali a mana, alioze yihepuke kaanyingikine nichimwe hakutwala ku mana.

³⁴ Ululi wakulemesa akwa chifuchi; alioze shili yakuvwisa akwa chifuchi sonyi.

³⁵ Mianangana kaakuwahilila ni tuvumbi waze akulinga ni mana, alioze kaakumwesa lamba waze keeshi kulinga kanawa.