Yishima 13 - Mukanda Wa Zambi 1970

¹ Mwana wa mana kakubanjika kufumba cha tato, alioze mukwa kulengumuka keshi kutayiza yibi yenyi nichimwe.

² Atu abema kaakuyuka ni maliji waze akuhanjika, alioze akwa kwonga kaakuzanga lume kushiha atu.

³ Tala kanawa chize unambe hanga ufunge mwono we. Mukwa kulimbambwila kakulishiha iye mwene.

⁴ Mukwa ngwaza kechi kumona Chuma chize anazange, chibwe kachi machizanga kuhiana. Alioze mukwa kuhondangana mabwa ni yeswe yize anazange.

⁵ Akwa kutuwika mu mbunge kaakuvutwokela mahuza, alioze maliji ja yingulungulu kaali a sonyi kuhiana.

⁶ Ululi wakufunga waze keeshi mulonga; ungulungulu wakulimbula yivulumunyi.

⁷ Atu amwe kaakulichichimieka ngwo kaali pichi, alioze keeshi nichimwe. Akwo kaakulilelesa ngwo tuli yiswale, alioze kaali pichi.

⁸ Pichi chatamba kushachila ha ubite wenyi nyi mazanga kulamwina mwono wenyi, alioze niumwe wakutoweza chiswale.

⁹ Akwa ululi kaali ngwe ndeya yize yakutemuka, alioze yingulungulu kaali ngwe ndeya yize yinajimi.

¹⁰ Kulengumuka kuchakuneha lamba. Chinalite kwita mana.

¹¹ Nyi muchibwa chashi kutambula ubite we, muutokesa nawa nikawashi. Nyi muchibwa chikalu kuutambula, unji muubwa nawo.

¹² Kusa mbunge ku chize kuchishi kusoloka kuchakuhongesa mutu, alioze kumona chize unazange kuchakuwahisa mutu.

¹³ Nyi muulituna longeso libema, muulikokela lamba, alioze nyi muulibanjika mba muubwa ni uhwimino.

¹⁴ Longeso lia akwa mana lili ngwe meya a mwono; mulikwasa kuchina muze muubwa mu utoji.

¹⁵ Nyi muubwa mukwa mana, atu maakusa vumbi; alioze nyi kuushi ni mbunge yimuwika, muulibihisa yena mwene.

¹⁶ Akwa mana kaakunyonga, mba maalinga; alioze yihepuke kaakusolola uhepuke wo.

¹⁷ Tunganda abi kaakukoka Vunda, alioze tunganda amwenemwene kaakuhwimisa atu mbunge.

¹⁸ Mutu yoze keshi kuzanga kulilongesa mabwa chiswale, mevwa sonyi. Alioze yoze mabanjika longeso, atu maamulemesa.

¹⁹ Kuwaha chinji ha kutambula Chuma chize unazange! Alioze yihepuke keeshi kuzanga kwecha ndako jo jibi.

²⁰ Likate ni akwa mana, mba ni yena muubwa mukwa mana; likate ni yihepuke, mba muulibihisa.

²¹ Lamba kuliakukaula yivulumunyi kweswe, alioze yibema yili fweto ya akwa ululi.

²² Mutu mubema makabwa ni ubite wa kuhichikila ajikulu jenyi, alioze ubite wa yivulumunyi muubwa wa mbala wa akwa ululi.

²³ Minda yize atu keeshi kulima muyihasa kulisa yiswale, alioze akwa uhenge keeshi kuchitayiza.

²⁴ Mutu yoze keshi kumwesa mwanenyi lamba hanga amufumbe, keshi kumuzanga. Alioze yoze wakumuzanga, kaakumufumba.

²⁵ Akwa ululi kaakubwa ni yakulia yinji, alioze yingulungulu kaakufwa zala.