Yishima 12 - Mukanda Wa Zambi 1970

¹ Mutu yoze wakuzanga malinjekela, kakutayiza nyi atu maamufumba. Chihepuke kakuvutwokela kufumba.

² Mwene Zambi kakuwahilila ni atu abema, alioze kakuhisa waze akutaka yibi.

³ Ungulungulu kuushi kuhana uhwimino, alioze akwa ululi kaakumana nguu.

⁴ Pwo wa mbunge yibema kali ngwe chipangula ha mutwe wa lunga lienyi; alioze pwo yoze Wakukolesa lunga lienyi sonyi kali ngwe yikola yize yakubolesa yifwaha.

⁵ Akwa kutuwika mu mbunge kakulinga yibema, alioze yingulungulu kaakuzanga lume kukwonga.

⁶ Maliji ja yingulungulu kaakushiha atu, alioze maliji ja akwa ululi kaakulamwina atu.

⁷ Yingulungulu kaakulimbuka, keeshi kubwa ni vungu; alioze majiko ja akwa ululi kaakulinduluka.

⁸ Nyi ngwe muubwa mukwa malinjekela, maakakuchichimieka; alioze nyi muubwa chihepuke kumaakulelesa.

⁹ Chibema kubwa mukwa kulikehesa yoze uli ni milimo, alioze hi chibema ko kulisuta ngwe uli mukwa lufuma, hindu kufwa ni zala.

¹⁰ Mutu mubema kakulisa kanawa yimuna yenyi, alioze yingulungulu kaakuyimwesa lamba.

¹¹ Njimi yoze wakuhondangana kali ni yakulia yinji, alioze yoze wakulinga yuma yamokomoko keshi mana.

¹² Yingulungulu kaakuzanga kulinga lume yuma yibi, alioze akwa ululi kaakumana nguu.

¹³ Chingulungulu kakulihisa ku maliji jenyi mwene, alioze mukwa kutuwika mu mbunge kakulichiza mu lamba.

¹⁴ Muuyuka nikulita ni yize wakwamba ni yize wakulinga, muutambula yeswe yize yinalite.

¹⁵ Yihepuke kaakunyonga ngwo, yize akulinga yinalite. Alioze akwa mana kaakubanjika ku longeso lia atu akwo.

¹⁶ Chihepuke nyi wevwa wuli, kakutenuka nikawashi; alioze mukwa ululi nyi amutuka, kakulihumikiza.

¹⁷ Mutu yoze wakuhanjika umwenemwene, kakukwasa kubatula milonga ni ululi; alioze yoze wakuhanjika mahuza, kakukolesa uhenge.

¹⁸ Maliji akutungumioka kaakulemeka ngwe mukwale, alioze maliji a mana kaakuhwimisa mbunge.

¹⁹ Mahuza keeshi kulinduluka, alioze umwenemwene wakulinduluka ndoo ku miaka yeswe.

²⁰ Atu waze akutaka yuma yibi maamona lamba, alioze waze akulinga yibema maawahilila.

²¹ Akwa ululi keeshi kumona chibi nichimwe, alioze yingulungulu kaakumona shina lamba wika.

²² Mwene Zambi kakuvutwokela akwa mahuza, alioze kakuwahilila ni atu waze akumanununa yilakenyo yenyi.

²³ Yikanyame kaakusweka yuma yize ananyingika, alioze yihepuke kaakwambujola uhepuke wo.

²⁴ Mukwa kuhondangana kakuyula atu akwo, alioze mukwa ngwaza kakulipwisa ndungo.

²⁵ Kulibikala kuchakuchiza uwahililo, alioze maliji a zango kaakukuwahilisa.

²⁶ Mukwa ululi kali kasongo kuli masepa jenyi, alioze chingulungulu kakwapiangula.

²⁷ Nyi muubwa mukwa ngwaza, kuuchi kumona chize unazange; alioze nyi muubwa mukwa kuhondangana, muumona yuma yinji.

²⁸ Ululi uli jila ya mwono, alioze ungulungulu uli jila ya kufwa.