Yishima 11 - Mukanda Wa Zambi 1970

¹ Mwene Zambi kakuvutwokela pezo ja uhenge, alioze kakuwahilila ni pezo jize jinalite.

² Akwa kulengumuka meevwa sonyi nikawashi, alioze akwa kulikehesa kaali ni mana.

³ Nyi muubwa mubema, kutuwika cha mbunge muchikakusongwela, alioze yihenge kaakulishiha ni uhepuke wo.

⁴ Ubite kuwahashile kukukwasa nichimwe ha tangwa lia kufwa, alioze kutuwika cha mbunge muchihasa kulamwina mwono we.

⁵ Kutuwika cha mbunge kuchakuwahisa mwono wa mutu, alioze chingulungulu kakulivulumwisa iye mwene.

⁶ Ululi wa yoze watuwika mbunge, kuwakumulamwina; alioze lwahu wa ubite kakushihisa chihenge.

⁷ Muze yingulungulu akufwa, Chuma chize akusa mbunge, necho kuchakufwa. Kushachila ha ubite kuchishi kukwasa nichimwe.

⁸ Zambi kakufunga akwa ululi ku lamba, alioze yingulungulu kaakumona lamba lize.

⁹ Maliji ja akwa kulelesa Zambi maahasa kushiha atu, alioze mana ja akwa ululi maahasa kwalamwina.

¹⁰ Muze akwa ululi akutwama kanawa, akwa limbo kaakuwahilila; alioze muze yingulungulu akufwa, akwa limbo kaakukololoka ni uwahililo.

¹¹ Limbo mulibwa ni lufuma mubema muze akwa ululi maaliwahisa; alioze maalionona ku maliji ja yingulungulu.

¹² Mutu yoze wakulelesa mwenyembo wenyi, keshi mana; alioze mukwa mana kakuhola kuluu.

¹³ Mukwa kalundanganyishi kakusolola yuma yize chatamba kusweka, alioze mukwa kushishika kakuyisweka kanawa.

¹⁴ Vungu lize kulishi mukwa kuyula, mulitoka; alioze kwoka cha akwa kuyula kuchakuhana uhwimino.

¹⁵ Mutu yoze matayiza kufweta kongo lia chilambala mamona lamba, alioze yoze kechi kuchilinga mabwa ni uhwimino.

¹⁶ Atu maalemesa pwo mukwa vumbi, alioze pwo mubi sonyi mevwa. Mukwa ngwaza kechi kubwa ni mbongo, alioze mukwa kuhondangana kumabwa pichi.

¹⁷ Mutu yoze wakukwasa akwa utu kakuliwahisa, alioze chiswii kakulibihisa.

¹⁸ Yingulungulu keeshi kufumbula nichimwe, alioze waze akulinga chize chinalite, kaakufumbula.

¹⁹ Yoze wakulikoleleza kulinga yize yinalite mabwa ni mwono, alioze yoze wakuvulumiona kumafwa.

²⁰ Mwene Zambi kakuvutwokela yingulungulu, alioze kakuzanga waze akulinga chize chinalite.

²¹ Nyingika pundu ngwe, yingulungulu lamba maakaamwesa, alioze akwa ululi kumaakaalamwina.

²² Pwo mubema ku meso, yoze keshi mana, kali ngwe kazeya ka oru ku muhombo wa ngulu.

²³ Yize akwa ululi akuzanga yakuwahisa, alioze muze yingulungulu akutambula yize akuzanga, atu eswe kaakwivwa wuli.

²⁴ Atu amwe kaakuhana ubite wo hindu wakwoka nawa. Akwo kaakuumina hindu kaakulikokela uswale.

²⁵ Chilianyi kumabwa pichi; yoze wakukwasa akwo, neye kumaamukwasa.

²⁶ Atu kaakushinga yoze wakumina akwo mbuto, ndoo ni muze ndando muyibwa yinji, alioze kaakuwahisa yoze wakuyilanjisa.

²⁷ Nyi wakuzanga yuma yize yinalite, atu maakulemesa, alioze nyi wakuzanga Vunda, nyingika ngwe muyikuwana.

²⁸ Atu waze akushachila ha ubite wo, kumaakalukumuka ngwe mafwo a ha lushiho, alioze akwa ululi kumaakawaha ngwe mafwo a lwiza.

²⁹ Mutu yoze wakuneha Vunda hakachi ka jiko lienyi, ku songo kechi kubwa ni Chuma nichimwe. Yihepuke maabwa matangwa eswe tuvumbi twa akwa mana.

³⁰ Ululi wakupwisa ni mwono, alioze upupilo wakushiha atu.

³¹ Akwa ululi kaakwakundulula hano hashi. Nyi Chenacho, nyingika nawa ngwe, yingulungulu ni yivulumunyi maakamwesa lamba.