Yilinga 9 - Mukanda Wa Zambi 1970

Kwalumuka cha Saulu

¹ Alioze Saulu te kasolo kulitwamina kuhalila mu kushiha tumbaji twa Mwene Yesu. Yaya kuli mwata wa mahako,

² yamwita mikanda ya kunjila nayo mu mazuwo ja kuwayila ja Ayuda mu limbo lia Damasku Yazanga kufupa atu waze te akukaula jila ya Yesu, malunga ni mapwo, ha kwakwata ni kwaneha ku Yerusaleme.

³ Mba ha kuya ku Damasku, muze te anakundama ku limbo lize, susumuku pangu lia mwilu yilimupangukila.

⁴ Saulu yalimbuka hashi, yevwa liji lize liamwambile ngwo: “Saulu; Saulu, kuchi kevwe wakunguhungumiona?”

⁵ Neye yahula ngwenyi: “Mwene yena iya?” Liji yilimukumbulula ngwo: “Yami Yesu yoze wakuhungumiona.

⁶ Alioze katuka unjile mu limbo. Kwenako maakakwambulwila chize Chakutamba kulinga.”

⁷ Atu waze endele nenyi yaamana kikilii. Kaahashile ko kwamba liji nilimwe, yeevwa liji, alioze kaamwene ko mutu niumwe.

⁸ Saulu yakatuka hashi. Alioze ha kulaula ku meso, kahashile kumona. Kashika atu yaamukwata ku kwoko, yaamutwala ku Damasku.

⁹ Matangwa atatu te kahashile kumona, kulia ka, kunwa ka.

¹⁰ Mu Damasku yimubwa umwe kambaji jina lienyi te Anania. Mwene Yesu yahanjika nenyi mu Usolwelo ngwenyi: “Anania!” Neye yamukumbulula ngwenyi: “Yami uno, Mwene.”

¹¹ Mwene ngwenyi: “Katuka, uye mu jila yize akuvuluka ngwo, Jila Yalulama. Yako ku zuwo lia umwe mutu, jina lienyi Yuda. Uhule mutu wa ku Tarsu, jina lienyi Saulu—kanalembe.

¹² Neye hamona kulu mu Usolwelo lunga jina lienyi Anania, kananjila ni kumusa moko, hanga alaule ku meso.”

¹³ Anania ngwenyi: “Aa Mwene! Anji haanangwambulwila hakutwala kuli lunga yoze. Haanangulweza yibi yeswe yize hanalingi kuli atu je a mu Yerusaleme.

¹⁴ Kezanga kuno ku Damasku ni chiyulo kuli mahako a lutwe cha kukwata eswe waze akufuliela jina lie.”

¹⁵ Alioze Mwene yamwamba ngwenyi: “Yako, hingunamutongola ha kunyingikisa jina liami kuli waze hi Ayuda ko, ni kuli mianangana jo, ni kuli Aisraele.

¹⁶ Yami mwene mungukamulweza lamba lize chamutamba kumona mumu ha jina liami.”

¹⁷ Mba Anania yaya, yanjila mu zuwo, yasa moko hali Saulu, ngwenyi: “Mukwetu Saulu, Mwene wangutumanga, mwe Yesu yoze unakatakana mu jila. Hangutuma hanga umone, ni hanga uzale ni Mwiku wa Linanga.”

¹⁸ Hazehene yuma yalifwa ngwe mahalo ja yishi yiiholoka mu meso ja Saulu, neye yamona nawa, yakatuka, mba Anania yamupapachisa.

¹⁹ Hohene Saulu yalia, yalitakamisa, yatambula nawa tachi. Saulu yatwama amwe matangwa hamwe ni tumbaji mu limbo lia Damasku.

Saulu yambujola mu Damasku

²⁰ Hazehene yabutuka kwambujola mu mazuwo ja kuwayila hakutwala kuli Yesu, ngwenyi: “Mwe Mwana Zambi.”

²¹ Eswe waze amuvwile, yaalishimwoka nikwamba ngwo: “Haa puu! Mutu awu hi yoze ko washihile mu Yerusaleme waze te akufuliela jina lia Yesu, nyi? Ni kuno kejile ko akaatwale a kukasa kuli mahako a lutwe, nyi?”

²² Hindu Saulu yahiana tachi mu kwambujola chenyi, yakomwesa Ayuda waze te atwama mu Damasku. No kaahashile ko kumukumbulula muze waalumbununwine ngwenyi: “Yesu mwe Chilamwina yoze Zambi alakenyene.”

²³ Muze matangwa anji haabalika, Ayuda yamutwama punga akamushihe,

²⁴ alioze Saulu yevwa hakutwala ku punga yo. Mwalwa ni ufuku Ayuda yaafunga yikolo ya limbo ha kumushiha.

²⁵ Alioze ha ufuku amwe tumbaji yaamutwala, yaamuzeza mu chituwa cha mu chipanga, ni kumusunwisa hashi mu chisoka.

Saulu mu limbo lia Yerusaleme

²⁶ Ha kuheta ku limbo lia Yerusaleme, Saulu yeseka kulinunga ni tumbaji ni akwo. Alioze eswe yaamuvwila woma, mumu kaafulielele ko ngwo, habwa kambaji chamwenemwene.

²⁷ Alioze Barnaba yamwanda nikumutwala kuli tunganda twa Yesu, yaalumbunwina ngwe chize Saulu atakanyine ni Mwene Yesu mu jila, ni ngwe chize Yesu ahanjikile nenyi, yaalweza nawa chize alongesele ni hamu mu jina lienyi mu Damasku.

²⁸ Mba Saulu yalinunga no, yendangana mu Yerusaleme mweswe, nikulongesa ni hamu mu jina lia Mwene Yesu.

²⁹ Yahanjika nawa ni Ayuda waze te akuhanjika greke nikulihangujola no, alioze yaafupa kumushiha.

³⁰ Muze akwa kufuliela haachivwa, yaatwala Saulu ku limbo lia Sesareai nikumutuma ku limbo lia Tarsu.

³¹ Mba Chikungulwila cheswe mu Yudea, ni mu Galilea, ni mu Samaria yaabwa ni uhwimino, yeenda ni woma ku meso ja Mwene Yesu, yooka ku tachi ja Mwiku wa Linanga.

Petulu yawuka Enea

³² Petulu yendangana mu chifuchi cheswe. Limwe tangwa yaheta kuli akwa kufuliela waze te atwama mu limbo lia Lida.

³³ Yawana ko ume lunga jina lienyi Enea, te kayiza musongo wa kalepa; habomba kulu ha muhela miaka nake.

³⁴ Petulu yamwamba ngwenyi: “Enea, Yesu Kristu kanakuhindwisa, katuka, alula muhela we.” Hazehene yakatuka.

³⁵ Eswe waze te atwama ku Lida ni mu chana cha Sarone yaamumona, no yaatewuluka kuli Mwene Yesu.

Petulu yahindwisa Dorkase ku kufwa

³⁶ Mu limbo lia Jope yimubwa umwe kambaji wa pwo, jina lienyi Tabita (Mu liji lia greke Dorkase, kulumbunuka ngwo, Kayi.) Te yitanga yenyi yibema, ni kakuhana yawana kuli yiswale.

³⁷ Ha matangwa waze, yayiza, yafwa. Muze atu haasanyisa mujimba wenyi, yaausa mu chibatulo cha kwilu.

³⁸ Lida kali hakamwihi ni Jope. Kashika muze tumbaji a mu Jope heevwa ngwo, Petulu ku Lida ali, yaamutumina malunga aali ni liji lino ngwo: “Tweya kama ku mahietu, kanda ushimbula.”

³⁹ Petulu yakatuka, yaya no. Muze haaheta, yaamutwala ku chibatulo cha kwilu. Mapwo waze haanafwisa malunga yaamukundama nikulila, yaamulweza yikuto ni mahina waze Dorkase aatungilile muze te achili ni mwono.

⁴⁰ Petulu yatuhwisa atu eswe, yasa makungunwa hashi, yalemba, mba yatewuluka ku mujimba, ngwenyi: “Tabita, hinduka!” Neye yalaula, yamona Petulu, yahinduka.

⁴¹ Petulu yamukwata ku kwoko, yamukatwisa. Mba yatambika akwa kufuliela ni mapwo waze haanafwisa malunga, yaakunjika yo ni mwono.

⁴² Yuma yino yaayinyingika mu limbo lieswe lia Jope, mba atu anji yaafuliela Mwene Yesu.

⁴³ Petulu yatwama matangwa anji mu Jope hamwe ni Simone, mukwa kukotongola malambu.