Yilinga 8 - Mukanda Wa Zambi 1970

¹ Saulu neye te kanatayiza ngwenyi, amushihe. Ha tangwa lizeliene, yaabutuka kuhungumiona chikolo Chikungulwila cha Yerusaleme. Akwa Kristu eswe yaamwangana mwamwaa mu yifuchi ya Yudea ni Samaria, alioze tunganda twa Yesu kaamwanganyine ko.

Saulu yahungumiona Chikungulwila

² Amwe akwa kuwayila Zambi yaafunda Estevau (Etienne), yaamulila mbimbi chikolo.

³ Alioze Saulu yeseka kwonona Chikungulwila, yanjila mu zuwo ni zuwo, yatuhwisa malunga ni mapwo haze, yaasa mu zuwo lia lamba.

Filipe yambujola Sango Jibema mu chifuchi cha Samaria

⁴ Akwa kufuliela waze amwanganyine yaaya kweswe nikwambujola Sango Jibema.

⁵ Filipe yaya ku limbo lia mu Samaria, yambujola Sango ja Chilamwina yoze Zambi alakenyene.

⁶ Mbunga yaabanjika longeso lia Filipe ni mbunge yimuwika, yaamona yipupu yize te akulinga.

⁷ Mumu mwiku wa luchisa yiutuhwoka muli anji nikukololoka ni liji linene. Akwa kalepa anji ni yilema yaahindwoka

⁸ Akwa limbo lize yaawahilila kuhiana.

⁹ Alioze mu limbo lize yimubwa mutu umuwika, jina lienyi Simone. Yashimwokesa Asamaria ha shimbu lisuku ni tufutafuta twenyi, neye yalialula kubwa mutu munene.

¹⁰ Atu eswe, malunga ni mapwo, makulwana ni twanuke, te kaakumubanjika. Yaamba ngwo: “Mutu yono je tachi ja Zambi jize anajivuluka ngwo Tachi Jinji.”

¹¹ Te kaakumwivwa mumu hasuku achijile ni kwonga ni tufutafuta twenyi.

¹² Alioze muze malunga ni mapwo haafuliela Sango Jibema jize alongesele Filipe, yaapapachisa. Te kanalongesa hakutwala ku Wanangana wa Zambi ni jina lia Yesu Kristu.

¹³ Chibwe Simone iye mwene yafuliela. Ni muze te hamupapachisa, yanyongonona ni Filipe, yalishimwoka ha yipupu ni yikomokeso yize te akulinga.

¹⁴ Muze tunganda twa Yesu heevwa ngwo, Asamaria haatambula liji lia Zambi, yaatumina Petulu ni Yoano.

¹⁵ No, muze te haaheta, yaalemba hanga akwa kufuliela atambule Mwiku wa Linanga.

¹⁶ Mumu te hanaapapachisa mu jina lia Mwene Yesu, alioze Mwiku te kanda uchihulumuka kama muli umwe wa kuli ayo.

¹⁷ Mba Petulu ni Yoano yaasa moko; no yaatambula Mwiku wa Linanga.

¹⁸ Muze mwe Simone hamona ngwenyi, kusa cha moko cha tunganda hichahana Mwiku wa Linanga, yazanga kwaha mbongo,

¹⁹ nikwamba ngwenyi: “Ni yami ngwehenu tachi jino, hanga mweswawo mungusa moko atambule Mwiku wa Linanga.”

²⁰ Alioze Petulu ngwenyi: “Fwako hamwe ni mbongo je, mumu hiwanyonga kuzuka chawana cha Zambi ni mbongo.

²¹ Kuushi Chihanda chibwe chitundo mu milimo yino, mumu mbunge ye kuyalulamine ku meso ja Zambi.

²² Lemba Mwene Zambi, nyi muchilita, akukonekene kama nyonga lia mbunge ye.

²³ Mumu ngunamono ngwami, mbunge ye yinasase ngwe kasashisa mu jimo lia mutu. Unakashiwa mu ngoji ja shili.”

²⁴ Simone yamba ngwenyi: “Ngulembelenu kama Mwene Zambi, hanga yuma yize hinwamba kanda yinguwana kama chibwe hakepe.”

²⁵ Mba muze tunganda haashindakenya ni haalongesa liji lia Mwene Yesu, yaahiluka ku Yerusaleme. Mu jila yaambujola Sango Jibema mu yihunda yinji ya mu Samaria.

Filipe ni Kaetiopia

²⁶ Kanganda ka mwilu yambila Filipe ngwenyi; “Katuka, uye ku sude, mu jila yize yinakatuka ku Yerusaleme, yiipalumuka ku Gaza.” (Jila yize te hiyinalambe.)

^27-28 Filipe yakatuka, yaya. Kuma mu jila yamona umwe mutu, Aetiopia, wakutunguna, kafufuchi ka mwanangana wa pwo Kandase, wa ku chifuchi cha Etiopia. Mwenawo te wakulama ubite wenyi weswe. Te ku Yerusaleme anakatuka, kwe ayile ni kuwayila. Muze anahiluka ku mahio, yatwama mu temba lienyi nikutanga mukanda wa mukwa munanyi wa Zambi, Izaya.

²⁹ Mwiku wa Linanga yiwambila Filipe ngwenyi. “Kundama ku temba lino.”

³⁰ Filipe yazomboka fuji, yamwivwa nikutanga mukanda wa mukwa munanyi Izaya. Yamuhula ngwenyi: “Kuunevu yize unatange, nyi?”

³¹ Neye ngwenyi: “Ngwe kuchi munguhasa, nyi kukushi yoze mangulumbunwina yo?” Yaliumba kuli Filipe anyine atwame nenyi.

³² Chihanda cha Mukanda wa Zambi chize atangile chino ngwo: “Yaamutwala ku chishihilo ngwe panga. Ngwe mwana panga yoze unaholo kuluu ku meso ja yoze unamukambe mona. Kabakwile ko kanwa lienyi.

³³ Yaamulelesa, kaamubatwilile ko ni ululi. Iya mahasa kwambulula sango ja vungu lienyi? Mumu mwono wenyi hiunahu hano hashi.”

³⁴ Kafufuchi yahula Filipe ngwenyi: “Ngunakulembe ungulumbunwine kama, iya mukwa munanyi wa Zambi anambila chino? Iye mwene, nyi? Hanji mukwo weka?”

³⁵ Filipe yabutuka kuhanjika. Chize ku Chisoneko chize, yamulumbunwina Sango Jibema ja Yesu.

³⁶ Muze te anayi mu jila, yaaheta ku amwe meya, mba kafufuchi yamba ngwenyi: “Talenu meya, yika yinanguvumu ha kungupapachisa?” [

³⁷ Filipe ngwenyi: “Nyi unafuliela ni mbunge ye yeswe, muchilita.” Neye yamukumbulula ngwenyi: “Ngunafuliela ngwami, Yesu Kristu mwe Mwana Zambi.”]

³⁸ Yamanyisa temba lienyi. Eswe aali yaanjila mu meya, mba Filipe yamupapachisa.

³⁹ Muze haatuhuka mu meya, Mwiku wa Linanga yiuzundula Filipe. Kafufuchi kamwene ko nawa Filipe, alioze yaya ni uwahililo mu jila yenyi.

⁴⁰ Filipe yasolokela ku limbo lia Azoto. Mba yabalika mu limbo ni limbo nikwambujola Sango Jibema kweswe, ndoo yaheta ku Sesarea.