Yilinga 6 - Mukanda Wa Zambi 1970

Chikungulwila yaasakula malunga shimbiali akwase tumbaji

¹ Ha matangwa waze, muze tumbaji hooka kuhiana, Ayuda waze te akuhanjika liji lia greke yaaketeka waze te akuhanjika hebreu mumu mapwo jo, waze haanafwisa malunga, te keeshi kwakwasa ha kupangila cha tangwa ha tangwa.

² Kashika tunganda kumi ni aali yaakungulula chizavu cha tumbaji, yaambila ngwo: “Kuchalitele yetu kwehuka milimo ya kulongesa maliji a Zambi mumu ha kupangila yakulia.

³ Ha chino, akwetu, Sakulenu a kuli yenwene malunga shimbiali a lufuma mubema, anazala ni Mwiku wa Linanga, akwa mana, hanga twaahe milimo yino.

⁴ Alioze yetu mutunyongonona mu kulemba ni kulongesa liji lia Zambi.”

⁵ Maliji wano yaawahisa mbunga yeswe. No yaasakula Estevau (Etienne), mutu yoze te unazala ni Mwiku wa Linanga, mukwa kufuliela wamwenemwene. Yaatongola nawa Filipe, ni Prokoru, ni Nikanore, ni Timone, ni Parmena, ni Nikalau, wa ku limbo lia Antiokia, mukwa vungu likwo yoze watayijile longeso lia Ayuda.

⁶ Mbunga yaatwala kuli tunganda. No yaalembela, yaasa moko.

⁷ Mba maliji a Zambi yaafumana. Tumbaji yooka kuhiana mu limbo lia Yerusaleme. Mbunga yinene ya mahako a Zambi yoononokena e maliji.

Ayuda yaakwata Estevau (Etienne)

⁸ Estevau (Etienne) yalinga yipupu yinene ni yikomokeso mukachi ka atu, mumu Zambi yamwaha tachi, yamuwahisa kuhiana.

⁹ Alioze yikukatuka amwe akwa kuvundula a ku zuwo lia kuwayila, lize te akuvuluka ngwo: “Kule.” Mukachi ko yimubwa Ayuda a ku membo ja Sirene, ni Alexandria. No yaabutuka kuhamika ni Estevau (Etienne) hamwe ni Ayuda akwo a ku Silisia ni Asia.

¹⁰ Alioze kaahashile ko kulimika nenyi, mumu yahanjika ni mana waze amuhele Mwiku wa Linanga.

¹¹ Hohene yaavundula amwe atu ku tenga hanga ahanjike maliji a mafwefwe ngwo: “Hitunamwivu mashililika Mose ni Zambi.”

¹² Chenacho akatwishile mbunga ya atu, ni makulwana, ni alongeshi a Shimbi, yaalundumukina hali Estevau (Etienne), yaamukwata, mba yaamutwala ku meso ja Mbunga ya Ngaji ja Ayuda.

¹³ Yaaneha nawa yela ja mahuza waze ambile ngwo: “Mutu yono keshi kulitwamina kushililika zuwo lia Zambi lia chijila ni Shimbi ja Mose.

¹⁴ Hitunamwivu mamba ngwenyi: ‘Yesu yono, wa ku Nazare, makonona zuwo lino lia Zambi ni kwalumuna Shimbi jize atuhele Mose.’ ”

¹⁵ Eswe waze atwamine mu Mbunga ya Ngaji ja Ayuda yaahulikila Estevau (Etienne) meso, yaamona kulifwa cha meso jenyi ngwe a kanganda ka mwilu.