Yilinga 4 - Mukanda Wa Zambi 1970

Petulu ni Yoano ku meso ja Mbunga ya Ngaji ja Ayuda

¹ Shimbu te Petulu ni Yoano anahanjika ni atu, mahako a Zambi, ni mwata wa tufunga twa zuwo lia Zambi, ni Asaduseu yaaheta.

² Yaabihilila chikolo mumu tunganda wano yaalongesa atu ngwo, Yesu hanahinduka. Chize chinalumbunuka ngwo, afu kumaakahinduka.

³ Yaakwata nikwasa mu zuwo lia lamba ndoo hikwacha, mumu te hikwatoka kulu.

⁴ Alioze anji a kuli waze evwile liji, yaafuliela; malunga abwile ngwe tununu atano.

⁵ Muze hikwacha, akwa kuyula ja Ayuda, ni makulwana, ni alongeshi a Shimbi yaalikungulula mu Yerusaleme.

⁶ Mukachi ko yimubwa atu wano: Ana, mwata wa mahako, ni Yoano, ni Alexandre, ni Kaifa, ni akwo a ku vungu lia mwata wa mahako.

⁷ Yaatumbika tunganda mukachi ko, yaahula ngwo; “Ni tachi jika, hanji mu jina liaya nunakalinga chino?”

⁸ Hohene Petulu, nikuzala ni Mwiku wa Linanga, yaakumbulula ngwenyi: “Akwa kuyula ja atu ni makulwana,

⁹ nyi musono nunatusopesa hakutwala ku chitanga chibema chize chinalingiwa hali Chilema yono, hanji ngwe chize hahinduka,

¹⁰ Aisraele eswe ni yenu eswe chanutamba kunyingika ngwenu, mutu yono kanamana ku meso jenu mungunu ku tachi ja jina lia Yesu Kristu wa ku Nazare, yoze nwahachile ha kulusu, alioze Zambi hanamuhindwisa ku kufwa.

¹¹ Yesu mwe yoze Mukanda wa Zambi unambe ngwo: ‘Liwe lize yenu tungi nwalitunyine hiliabwa liwe lia mu mbango, lize liakolesa zuwo.’

¹² Kukushi ulamwino muli mukwo niumwe, mumu Zambi kahanyine ko jina lia mutu mukwo kuli atu hano hashi lize mutuhasa kulilamwina nalio.”

¹³ Ha kumona hamu lia Petulu ni Yoano, akwa lutwe yaalishimwoka, mumu te kaananyingika ngwo, kaali atu waze kaajaminyine ha kulilongesa. No yaasa chinyingi ngwo, wano e abwile hamwe ni Yesu.

¹⁴ Alioze ha kumona mutu yoze awukile kanamana hamwe ni Petulu ni Yoano, hikaahashile kwamba nawa nichimwe.

¹⁵ Yatuhwisa mu chibatulo cha kusopela. Mba yaabutuka kulihanjekesa.

¹⁶ Ngwo: “Atu wano, kuchi mutwalinga? Mumu eswe a mu Yerusaleme kaananyingika ngwo, haalinga chipupu chinene, ni yetu kutwahashile kulikala cho.

¹⁷ Alioze, hanga kuchichi kafumana kuhiana hakachi ka atu, twaakanjisenu ngwetu, kanda akahanjika nawa kuli mutu niumwe mu jina lino.”

¹⁸ Mba yaatambika nikwaha koki ngwo: “Litwaminenu lume kuhanjika, chibwe kulongesa mu jina lia Yesu.”

¹⁹ Alioze Petulu ni Yoano yaakumbulula ngwo: “Batulenu yenwene, nyi chinalite ku meso ja Zambi kwononokena atu kuhiana Zambi.

²⁰ Mumu yetu kutwahashile kuhola ha yize twevwile ni yize twamwene.”

²¹ Muze akwa lutwe haaha chikolo koki, yeecha aye. Kaamwene ko chikuma nichimwe cha kwahela lamba, mumu atu eswe yaachichimieka Zambi ha chikuma chize.

²² Mutu yoze alingilile chipupu cha kumuwuka, te hahiana kulu miaka makumi awana.

Akwa kufuliela yaalemba Zambi hanga akabwe ni hamu

²³ Mba muze akwa kuyula heecha, Petulu ni Yoano yaahiluka ku mbunga yo, yalumbunwina yeswe yize akwa lutwe ni makulwana aambile.

²⁴ Ha kwivwa liji lino, yaalemba Zambi ni mbunge yimuwika ngwo: “Mwene, yena watangile lilu, ni hashi, ni kalunga lwiji, ni yeswe yize yilimo.

²⁵ Yena, ku tachi ja Mwiku wa Linanga, wahanjikile kuli David, tata yetu, kavumbi ke ngwe: ‘Kuchi mba waze hi Ayuda ko analikungulula ni chizungozungo, kuchi mba atu anatwama punga jamokomoko?

²⁶ Mianangana a hashi haalilulika, ni akwa kuyula haakunguluka hamuwika mu kulimika ni Mwene Zambi ni Chilamwina chenyi yoze alakenyene.’

²⁷ Mumu chamwenemwene mu limbo lino Herode ni Ponteu Pilatu haalichinga ni yilambala ni Aisraele mu kulimika ni Kavumbi ke wa Linanga, Yesu, Chilamwina yoze walakenyene.

²⁸ Haalinga chino amanunune chize yena wabatwile kulu mu upale we ni zango lie.

²⁹ Mba haliabwila, Mwene, tala kama kuhalila cho. Ha chino, twehe kama hamu, yetu tuvumbi twe, lia kwambujola nalio liji lie.

³⁰ Olola kwoko lie ha kuwuka, ni kwokesa yilayi ni yikomokeso mu jina lia Kavumbi ke wa Linanga, Yesu.”

³¹ Muze haalemba, muma muze akungulukile yimunyika. Ayo eswe yaazala ni Mwiku wa Linanga, mba yaabutuka kwambujola liji lia Zambi ni hamu.

Akwa kufuliela yaachinga yuma yo yeswe hamuwika

³² Mbunga ya akwa kufuliela yaabwa ni mbunge yimuwika ni nyonga limuwika. Mutu niumwe hakachi ko wambile ngwenyi: “Chuma chize nguli nacho cha yami mwene.” Alioze yaalianyina yuma yo mukachi ko eswe.

³³ Ni tachi jinji tumbaji twa Yesu yaashindakenya uhindukilo wa Mwene Yesu. Zambi yaawahisa eswe.

³⁴ Mutu niumwe hakachi ko wahonene Chuma, mumu eswe waze abwile ni minda hanji mazuwo, yaayilanjisa. Yaaneha mbongo ja yuma yize alanjishile,

³⁵ yaajikunjika kuli tunganda twa Yesu. No yaalianyina mbongo jize kuli mutu ni mutu nikulita ni kuhona chenyi.

³⁶ Yikubwa mutu umuwika jina lienyi te Josefe, Kalevi, yoze wasemukine ku tungu lia Shipre. Tunganda twa Yesu yaamuluka jina likwo ngwo, Barnaba (kulumbunuka ngwo, mukwa kutakamisa atu.)

³⁷ Neye yalanjisa umwe munda wenyi, yaneha mbongo, yajikunjika kuli tunganda twa Yesu.