Yilinga 3 - Mukanda Wa Zambi 1970

Petulu ni Yoano yaawuka Chilema

¹ Petulu ni Yoano yaakanduka ku zuwo lia Zambi lia Ayuda ha ola ya kulemba, ola ya muchitatu, ya chingoloshi.

² Hehi ni chikolo cha ku zuwo lia Zambi, chize anachivuluka ngwo, Chikolo Chibema, mutu umuwika wabwile ko, te Chilema chize ku kusemuka chenyi. Tangwa ha tangwa yaamuneha nikumusa kwe kuze, hanga ete yawana kuli waze te akunjila mu zuwo lia Zambi.

³ Ha kumona Petulu ni Yoano himanjila mu zuwo lia Zambi, yeeta chawana.

⁴ No yaamuhulikila meso. Mba Petulu yamwamba ngwenyi: “Tutale!”

⁵ Iye yaatala nikunyonga ngwenyi, kota chimwe Chuma mangwaha.

⁶ Alioze Petulu ngwenyi: “Mbongo Chishi najo, alioze chize nguli nacho ngunakwehe cho. Ngwami, mu jina lia Yesu Kristu Kanazare, katuka, wende!”

⁷ Mba yamukwata ku kwoko lia chindume, yamukatwisa. Hazehene yiliato yenyi ni tusendengele twenyi yijikiza.

⁸ Neye yanyangumuka, yamana, yabutuka kwenda, yanjila hamwe no mu zuwo lia Zambi, nikutumbuka, nikuchichimieka Zambi.

⁹ Atu eswe yaamunona nikwenda nikuchichimieka Zambi.

¹⁰ Yaamusa chinyingi ngwo, yono mwe uze te wakutwaminyina yawana ku Chikolo Chibema cha ku zuwo lia Zambi. No yaakomoka, yaalishikishila ha chize amulingile.

Petulu yambujola mu chisambwe cha zuwo lia Zambi

¹¹ Shimbu mutu yoze unachikwachilila Petulu ni Yoano, atu eswe yaalishimwoka nikuzomboka kuli ayo mu chisambwe cha ku zuwo lia Zambi chize anachivuluka ngwo, Chisambwe cha Solomone.

¹² Ha kuchimona, Petulu yaamba ngwenyi: “Malunga Aisraele, kuchi nunatuhulikila meso ngwe ni tachi hanji ni kulinanga cha yetwene twamwendesanga?

¹³ Zambi ya Abrahama, ni ya Isake, ni ya Yakoba, ni ya tushakulu twetu hanahenyesa kavumbi kenyi Yesu. Yenwene nwamukunjikile kuli mianangana, nwalitunyine ye ku meso ja Pilatu muze iye abatwile ha kumutusula,

¹⁴ nwalitunyine mwe Munangi kanda mukwa ululi, nwechile Pilatu hanga anutuswile mukwa kushiha atu,

¹⁵ nwashihile Kabutu ka mwono, alioze Zambi hanamuhindwisa ku kufwa. Yetu tuli kwetu yela ja yuma yino.

¹⁶ Ndundo ja jina lia Yesu hijahindwisa mutu yono. Nunamumono, nunamunyingika. Habwa ni tachi mumu hafuliela jina lize. Jina lia Yesu hiliamwaha ufulielo, kushika habwa mungunu ngwe chize nunamono yenu eswe.

¹⁷ “Akwetu, ngunanyingika kanawa ngwami, yenu ni akwa kuyula jenu nwachilingile ni kwalajala.

¹⁸ Alioze Zambi hanamanununa chize ahanjikile shimbu kanda kuli akwa munanyi jenyi ngwenyi, Chilamwina wa kuli Zambi, yoze iye mwene alakenyene, makamona lamba.

¹⁹ Kashika alumukenu ku mbunge, nuhiluke kuli Zambi, hanga anukonekene milonga yenu,

²⁰ hanga Zambi akanwehe matangwa ja kuhwima, ni kunutumina Yesu, Chilamwina yoze iye mwene atongwele shimbu kanda.

²¹ Yesu makashimbula mwilu ndoo ni muze Zambi makalulika yuma yeswe, ngwe chize hanachambulula kuli akwa munanyi jenyi a kulinanga ku miaka yikulu.

²² Mumu Mose hanambe ngwenyi: ‘Mwene Zambi yenu makanutumina mukwa munanyi ngwe yami. Makabwa wa kuli usoko wenu. Chanutamba kumwivwa ha yuma yeswe yize makanwamba.

²³ Mweswawo kechi kwivwa mukwa munanyi wa Zambi yoze, Zambi makamuchiza hakachi ka Aisraele nikumwonona liakulu.’

²⁴ Akwa munanyi eswe waze ahanjikile, chize kuli Samuele ndoo kuli waze asulile ko, ambujolele yuma ya matangwa wano.

²⁵ Yenu nuli ana ja akwa munanyi a Zambi. Nuli ni Chihanda mu Usendo uze Zambi hanamanununa ni tushakulu twenu, muze ahanjikile kuli Abrahama ngwenyi: ‘Ni vungu lie mungukawahisa mavungu eswe a hashi.’

²⁶ Ha chino, Zambi hanahindwisa Kavumbi kenyi, hanamutumu hatangu kuli yenu, mu kunuwahisa nikutewulula mutu mweswe hakachi kenu ku shili yenyi.”