Yilinga 28 - Mukanda Wa Zambi 1970

Paulu ku tungu lia Malta

¹ Muze te hitwalilamwina, hohene yitusa chinyingi ngwetu, jina lia tungu lize Malta.

² Atu jaho, yaatulweza utu unji. Vula yabutuka kunoka, yikubwa nawa chishika. Kashika yaawika kahia, yaatutambula kanawa.

³ Muze Paulu hakunga jimwe tete, hanga ajise ha jiko, chihili yatuhuka mumu ha chivukuminya, yamusuma ku kwoko.

⁴ Muze akwa tungu haamona chihili kanasukama ku kwoko lienyi yaalihanjekesa ngwo: “Chamwenemwene lunga yono mukwa kushiha atu, mumu chibwe halilamwina ku kalunga lwiji, hindu Zambi yoze Wakuhilwisa yibi ku yibi kamutayijile ko kubwa ni mwono.”

⁵ Alioze Paulu yakukumwina mwe chihili mu kahia, kevwileko yikola niyimwe.

⁶ No yaatala ngwe hanji majimba, hanji malimbuka hashi susumuku, afwe. Hindu muze te hashimbula shimbu lisuku, kamwene nichimwe hali iye, mba yaalumuna manyonga jo nikwamba ngwo: “Yono kuma Zambi umwe.”

⁷ Talanganyi ni homa haze, habwile minda ya mukwa lutwe wa tungu lize, jina lienyi Publiu. Mwenawo yatutambula ni utu weswe, yatuzumbula matangwa atatu.

⁸ Tato ya Publiu te kanayiji yikola ya kachiki, ni kulokoka mu jimo. Paulu yanjila mu zuwo lienyi, yamulembela ni kumusa moko. Neye yahinduka.

⁹ Muze halinga chino, mieji eswe a mu tungu yeeza. Neye yaahindwisa.

¹⁰ Akwa mu tungu yaatuvumbika ni vumbi linji; ni ha kukatuka chetu, yaatwaha mianu.

Paulu yaheta ku Roma

¹¹ Muze tukweji atatu haabalika, yitunjila mu ulungu ni kuya. (Ulungu uze, wa ku limbo lia Alexandre, jina liawo “Mazambi enoo mapasa.” We ulungu watwamine mu tungu ha mwaka wa chishika.)

¹² Yituheta ku limbo lia Sirakusa, yitutwama ko matangwa atatu.

¹³ Katu kwe kuze, yituya hehi ni ku tunda, yituheta ku limbo lia Rejiu. Muze hikwacha, fuji ya ku sude yiyalumuka. Ha tangwa lia muchaali, yituheta ku limio lia Puteolu.

¹⁴ Kwenako twawanyine akwetu akwa Kristu. Yaatulembela ha kutwama no matangwa shimbiali. Mba yituheta ku limbo lia Roma.

¹⁵ Akwetu akwa Kristu a ku Roma yeevwa sango jetu, mba yeeza ndoo ku Chitanda cha Apiu ni ku limbo lia Mazuwo Atatu a Ngeji ni kutubatwiza. Muze Paulu haamona, yaasakwila Zambi, yalikoleza mu mbunge.

¹⁶ Muze hitwaheta ku Roma, mwata wa miata ja tujita yatayiza Paulu kutwama ukawenyi hamwe ni kajita yoze te wamufunga.

Paulu yambujola mu Roma

¹⁷ Muze matangwa atatu haabalika, Paulu yatambika akwa lutwe ja Ayuda. Muze haalikungulula, yaamba ngwenyi: “Akwetu, chalingile chibi nichimwe kuli usoko wetu Ayuda, hanji hakutwala ku ndako ja tushakulu twetu. Hindu yaangukwata ku Yerusaleme, yaangukunjika kuli Aroma.

¹⁸ No, muze haangusopesa, yaazanga kungutusula mumu kangumwene ko ni chitela cha kungushihila.

¹⁹ Alioze, muze Ayuda alitunyine, mba yingwita mwanangana wa Aroma angubatwile. Alioze Chishi kwami ni Chuma cha kusumina vungu liami mulonga.

²⁰ Kashika hinanutambika nikuhanjika nenu. Haangukasa ni ngoji jino ja utale mumu hali yoze Aisraele akusa mbunge.”

²¹ No yaamukumbulula ngwo: “Yetu kutwatambwile mukanda niumwe ku chifuchi cha Yudea mumu hali yena. Chibwe mukachi ka akwetu, mutu niumwe unakeza ni kutunyingikisa hanji kwamba chibi chimwe hali yena.

²² Alioze tunazange kwivwa manyonga je chize Unanyongo, mumu tunanyingika ngwetu, kuma kweswe atu kaakulimika ni mbunga yize yena uli.”

²³ No yaatongola tangwa lia kuhanjika ni Paulu. Mba mbunga yinene yeezaza ni kumunangisa ku zuwo lize te atwama. Chize ku chichamene ndoo ku chingoloshi Paulu yaalumbunwina nikushindakenya hakutwala ku Wanangana wa Zambi, yeeseka kwakununa ha chikuma cha Yesu. E maliji waze alongesele te a mu mukanda wa Shimbi ja Mose ni mu mikanda ya akwa munanyi a Zambi.

²⁴ Amwe yaakunuka ku yuma yize te anambe, alioze akwo kaayifulielele ko.

²⁵ Muze kaalivwile ko, yaakatuka. Mba Paulu yamba liji lino ngwenyi: “Kanawa Mwiku wa Linanga wahanjikile kuli tushakulu twenu kuli Izaya, mukwa munanyi wa Zambi,

²⁶ ngwenyi: ‘Yako kuli atu wano nikwamba ngwe: Munukatala kubanjika, alioze kunuchi kevwa, munukatala kutala, alioze kunuchi kumona.

²⁷ Mumu mbunge ja atu wano hijinaleme, haanajiki matwi jo, haanafuku meso jo, kuchina maamona ni meso jo ni meevwa ni matwi jo, ni maanyingika ni mbunge jo, kuchina maalumuka kuli yami, mba mungwawuka. Chenacho anambe Zambi.’ ”

²⁸ Paulu yawezela maliji ngwenyi: “Nyingikenu ngwenu, liji lia ulamwino hilinatumiwa kuli waze hi Ayuda ko. No maakalivwa.” (

²⁹ Muze te Paulu hamba chino, Ayuda yaakatuka nikulihamika chikolo.)

³⁰ Paulu, miaka yaali yamuundu atwamine mu zuwo lize te akufwetela. Yatambula kanawa eswe waze te akumunangisa,

³¹ yambujola Wanangana wa Zambi nikulongesa yikuma yakutwala kuli Mwene Yesu Kristu ni hamu heswe. Kukwabwile chikwiko nichimwe.