Yilinga 27 - Mukanda Wa Zambi 1970

Akwa lutwe yaatuma Paulu mu ulungu ku Roma

¹ Muze habatula ngwo, mutwenda mu ulungu ku chifichi cha Italia, yaakunjika Paulu ni funge akwo kuli mwata wa tujita, jina lienyi Juliu, wa ku mbunga ya tujita yize anavuluka ngwo, Mbunga ya mwanangana wa Aroma,

² Yitunjila mu umwe ulungu wa ku chifuchi cha Adramitinu, uze te unayi ku membo a ku mbaka ya Asia. Aristarku, Kamasedonia wa ku Tesalonika, yaya hamwe ni yetu.

³ Muze hikwacha yituheta ku limbo lia Sidone. Juliu yalweza utu kuli Paulu, yamutayiza kuya kuli masepa jenyi, amuzumbule.

⁴ Muze hitwakatuka ko, yikubwa fuji yinji, yiilimika ni yetu. Kashika, muze twakatukile ku Sidone yitubalika mu ulungu ku mbumbulu lia tungu lia Shipre, kuze te kukushi fuji yinji.

⁵ Muze hitwazauka kalunga lwiji hakamwihi ni yifuchi ya Silisia ni Pamfilia, yituheta ku Mira, limbo lia mu chifuchi cha Lisia.

⁶ Mwata wa tujita yawana ko ulungu wa ku limbo lia Alexandre, te himuuya ku chifuchi cha Italia, yatunjisa mo.

⁷ Amwe matangwa yituzauke hakepe hakepe, yituheta ni lamba linji hakamwihi ni limbo lia Snidu. Fuji yiilimika ni yetu, kashika kutwahashile kuya kulutwe, alioze yitubalika ku mbumbulu lia tungu lia Kreta, kuze fuji kuyabwile yinji, hehi ni chifuchi cha Salmone.

⁸ Yitubalika ni lamba linji ku mbumbulu ya kalunga lwiji ndoo ni kumwe kuma akuvuluka ngwo: “Zuzu Jibema,” hakamwihi ni chifuchi cha Lasea.

⁹ Te matangwa anji haabalika ndoo kwenda mu ulungu yichibwa cha utoji, mumu tangwa lia kulitwamina kulia ha kuwayila Zambi te hiliabalika kulu. Kashika, Paulu yaakanyamisa ngwenyi:

¹⁰ “Yenu malunga, ngunamono kwenda chino muchibwa cha utoji ni kufulwa chinji, hi yuma ni ulungu wika ko, alioze ni miono yetu nawa.”

¹¹ Alioze mwata wa tujita yabanjika kuli mukwa kusongwela ni kuli mwenya ulungu, hi ku maliji a Paulu ko.

¹² Zuzu lize te kuliabemene ha kutwama ko ha mwaka wa chishika. Kashika anji anyongene ha kukatuka ko. Yaazanga kweseka, nyi te muchilita, kuheta ku chifuchi cha Fenisia, akatwame ko ha mwaka wa chishika. Zuzu ya Kreta yakutalikisa ku chivumbuko cha tangwa ku tunda ni ku mwanda.

Kangonga ha kalunga lwiji

¹³ Muze fuji ya ku mwanda yahehukile hakepe, akwa ulungu yaanyonga ngwo, hichalita ni nyonga lio, yaazundula chikungo cha kumika nacho ulungu, ni kusesesa hakamwihi ni tungu lia Kreta.

¹⁴ Alioze susumuku kakundukundu yakatuka ku tungu, yaheta. Jina lienyi, Fuji ya ku Chivumbuko.

¹⁵ Kakundukundu yabinjisa ulungu. Muze kutwahashile kutalikisa ulungu ku fuji yituwecha ukahungumuke kulutwe liayo.

¹⁶ Yitubalika ku tungu lize akuvuluka ngwo, Klauda, yitweseka kukasa wato wa ulungu, hindu chikalu.

¹⁷ Muze haasosa, yaajichikila ngoji ku ulungu hanga ubwe ni tachi. Yeevwa woma ngwo, maasakaminya ha masekeseke ku mbumbulu ya chifuchi cha Libia. Kashika yaahulumuna hina linene lia ulungu. Mba yituhungumioka ni fuji.

¹⁸ Kakundukundu yatulamba chikolo, kashika muze hikwacha akwa ulungu yaabutuka kumbila yuma mu kalunga lwiji.

¹⁹ Ha tangwa lia muchitatu, yaambila ni moko jo ene yuma ya kwendesa nayo ulungu.

²⁰ Matangwa anji kutwamwene ko tangwa chibwe matongonoshi. Kakundukundu yabwa munene. Te hitwachiza kulu mbunge ya kulilamwina.

²¹ Shimbu lisuku liabalikile, mutu niumwe walile yakulia. Mba Paulu yamana ku meso jo nikwamba ngwenyi: “Yenu malunga, nyi nwevwile kama liji liami, kachi kutwakatukile ku Kreta, ha kubwa ni lamba lino ni kufulwa chino.

²² Alioze haliabwila ngunanushinjila ngwami, kolesenu mbunge jenu, mumu niumwe mukachi kenu matokesa mwono wenyi, shina ulungu wika muutoka.

²³ Mumu ufuku uno kanganda ka mwilu kamananga hehi ni yami. Kali kanganda ka Zambi yami yoze nakulingila.

²⁴ Ngwenyi: ‘Paulu, kanda wivwa woma! Chakutamba kumana ku meso ja mwanangana wa Aroma. Ni chikwo nawa, Zambi, ku utu wenyi, hakwaha mwono wa eswe waze unazauka no.’

²⁵ Kashika machilinga. Kolesenu mbunge, mumu ngunafuliela Zambi ngwami, kumuchikabwa chizechene ngwe angulwezanga.

²⁶ Alioze chatutamba kumbiliwa ku mbumbulu lia limwe tungu.”

²⁷ Mba yituhungumioka kweka ni kweka mu kalunga lwiji Adria. Ha tangwa kumi ni lia muchiwana, ngwe ha muchima ufuku, akwa kwendesa ulungu yaanyonga ngwo, haakundama ku chimwe chifuchi.

²⁸ Yeeseka ha mashima ja meya, yaamona metro makumi atatu ni shimbiali. Ha shimbu likepe yeeseka nawa, mba yaamona ngwo, makumi aali ni metro nake.

²⁹ Yeevwa woma ngwo, ulungu wetu muusakaminya ha mawe. Kashika yaambila yikungo yiwana kunyima lia ulungu yakumika nayo ulungu, yaazanga mwalwa usoloke.

³⁰ Akwa kwendesa yaafupa kuchina, yaasunwisa wato ha meya nikulinga ngwe kaanazange kukasa yikungo yakumika nayo wato ku zulu lia kulutwe.

³¹ Alioze Paulu yambila mwata ni tujita ngwenyi: “Atu wano, nyi atuhuka mu ulungu, kunwahashile kulilamwina.”

³² Hohene e tujita yaateta mihipu ya wato, yaawecha uhungumuke mu meya.

³³ Muze te himukubatwoka, Paulu yalembejeka eswe hanga alie, ngwenyi: “Musono lie tangwa kumi ni lia muchiwana waze nwashimbula, kunwalile nichimwe.

³⁴ Ngunanulembela ngwami, lienu kama, mumu chinalite nyi nunazange kulilamwina. Mutu niumwe matokesa lukambu wa ku mutwe wenyi.”

³⁵ Muze te hamba yuma yino, yanda mbolo, yasakwila Zambi ku meso ja eswe, yayibalula, yabutuka kulia.

³⁶ Hohene ayo eswe yaajikiza, yaalia.

³⁷ Yetu eswe yitubwa kulakaji jaali ni makumi shimbiali ni asambano a malunga.

³⁸ Muze te haakuta, yaambila tiriku mu meya, hanga ulungu ulele.

Ulungu yilifwa mu kalunga lwiji

³⁹ Muze hikwacha, yaamona chikonja cha musesa, alioze che chifuchi kaachinyingikine ko. Ku tunda yikubwa masekeseke. Kwenako anyongene kuhengeka ulungu nyi te muchilita.

⁴⁰ Mba yaabatula yikungo yakumika nayo we ulungu, yaayecha mu meya. Hazehene nawa yaajitula mihipu ya Chuma chakuhingulula nacho ulungu, yaasosa mahina waze akuhana fuji ku zulu lia kulutwe, yaakandwisa hanga fuji yikwate ko. Mba yaaya ku chikonja.

⁴¹ Alioze muze hitwaheta ha mwaa, ulungu yiusakaminya ha masekeseke, zulu lia kulutwe yilikwata hashi. Alioze Chipinji cha kunyima yichimakuka ni miavu ya meya.

⁴² Tujita yaazanga kushiha funge, hanga niumwe kechi kusana ku mbumbulu ni kuchina.

⁴³ Alioze mwata wa tujita yazanga kulamwina Paulu. Kashika yaakinda kuchilinga, alioze yaaha malunga eswe Shimbi, ngwenyi, waze anyingika kusana maaumbila mu meya hatangu nikusana ndoo maatuhuka ku tunda.

⁴⁴ Akwo chaatamba kukaula nikukwata ku mabaya hanji ku yihanda ya ulungu. Chenacho yetu twatutukile kanawa ndoo ni ku tunda.