Yilinga 26 - Mukanda Wa Zambi 1970

Paulu yalisambisa ku meso ja Agripa

¹ Agripa yambila Paulu ngwenyi: “Hinakutayiza ulihanjikile yena mwene.” Mba yolola kwoko lienyi, yalisambisa ni maliji wano ngwenyi:

² “Mwanangana Agripa! Ngunawaha ha kulisambisa musono hakutwala ku yikuma yeswe yize Ayuda anangusumu nayo mulonga.

³ Kuhiana chikolo mumu Unanyingika ndako jeswe ja Ayuda ni kuhamika cho. Ngunaliumbu ngwami, ungwivwe kama ni uhumikizo.

⁴ “Ayuda eswe kaananyingika ngwe chize natwamine chize ku ukweze wami. Hatangu te natwama mu chifuchi chami, mba kulutwe yingutwama nawa mu Yerusaleme.

⁵ Kaanangunyingika kulu. Maahasa kushindakenya, nyi kaanazange. Nguli wa ku mbunga yize ya Afariseu, waze akwete tachi jahiana ja kuwayila Zambi.

⁶ Haliabwila kanagusopesa mumu ngunase mbunge ku chize Zambi alakenyene tushakulu twetu.

⁷ Mavungu jetu kumi ni aali kaakusa ko mbunge ha kumanununa cha chilakenyo chino nikulingila Zambi ufuku ni mwalwa. Mwanangana, ha che kusako mbunge, kashika Ayuda anangusumina mulonga.

⁸ Kuchi kevwe yenu Ayuda kunwahashile kufuliela ngwenu, Zambi mahasa kuhindwisa afu?

⁹ “Chamwenemwene, yami mwene nanyongene ngwami, Changutamba kulinga yuma yeka ni yeka ha kujimuna jina lia Yesu Kanazare.

¹⁰ Chenacho nalingile mu Yerusaleme. Yingutambula chiyulo kuli mahako a lutwe a Zambi, mba yingusa akwa kufuliela anji mu zuwo lia lamba. Ni muze abatwile ha kwashiha, yinguchitayiza.

¹¹ Yisuho yinji naamwesene lamba mu mazuwo ja kuwayila, nikwashinjika kulikala ufulielo wo. Yingwevwila ufwatulo, yingwahungumiona ndoo ku membo ja yilambala.”

Paulu yambulula kwalumuka cha mbunge yenyi

¹² “Chenacho nayile ku limbo lia Damasku ni chiyulo ni tachi ja mahako a lutwe a Zambi.

¹³ Mwanangana, muze te nguli mu jila tangwa ha muchima, yingumona pangu linakatuka mwilu liahiana pangu lia tangwa lize liangupangukilile, yami ni waze nayile no.

¹⁴ Yetu eswe yitulimbuka hashi mbuu! Mba yingwivwa liji mu hebreu nikungwamba ngwo: ‘Saulu, Saulu, kuchi kevwe wakunguhungumiona? Wakulilemeka ngwe chize akulilemeka ngombe ha kulamba kulu ku songo lia mutondo wa kako!’

¹⁵ Yinguhula ngwami: ‘Aa Mwene! yena iya?’ Neye ngwenyi: ‘Yami Yesu, yoze wakuhungumiona.

¹⁶ Alioze katuka, umane. Hinakusolokela ha kukupwisa kavumbi kami, ha kwambujola kuli akwo chize hiwangumona musono, ni chize mungukakulweza nawa kulutwe.

¹⁷ Mungukupulula kuli Ayuda ni kuli waze hi Ayuda ko. Mungukutuma kuli waze hi Ayuda ko,

¹⁸ mu kwalawisa meso hanga akatuke ku milima atale ku Pangu, akatuke ku tachi ja Sakwonga eze kuli Zambi; hanga ku ufulielo, Zambi aakonekene milonga yo, mba abwe ni chihinga mukachi ka atu waze Zambi atongwele iye mwene.’ ”

Paulu yalumbununa milimo yenyi

¹⁹ “Kashika, mwanangana Agripa, Chakolemene ku Usolwelo wa mwilu.

²⁰ Alioze hatangu yingwambujola mu Damasku ni mu Yerusaleme, mba mu chifuchi cheswe cha Yudea, ni mukachi ka waze hi Ayuda ko. Yingwambujola ngwami: ‘Alumukenu ku mbunge, nutewulukile kuli Zambi. Nulinge yitanga yize yinalweze kwalumuka cha ku mbunge.’

²¹ Ha che chikuma chino, Ayuda angukwachilile mu zuwo lia Zambi, yaazanga kungushiha.

²² Alioze Zambi hanangukwase ndoo musono uno. Kashika, ngunamana hano ni kushindakenya kuli eswe, alelu ni alemu. Chichi kwambulula yuma yikwo shina yizeyene ambulwile akwa munanyi a Zambi ni Mose ngwo:

²³ ‘Chilamwina yoze Zambi alakenyene chamutamba kumona lamba nikubwa mutangu kuhinduka ku kufwa, Makambujola pangu lia ulamwino kuli Ayuda ni kuli waze hi Ayuda ko.’ ”

Paulu yalembejeka Agripa kufuliela Yesu Kristu

²⁴ Muze te Paulu machihanjika maliji wano ha kulisambisa chenyi, Festu yakololoka ngwenyi: “Paulu, unazaluka! Kulilongesa che chinji chinakuzalwisa.”

²⁵ Alioze Paulu ngwenyi: “Vulie Festu mulemu Wahiana, chazalukile. Ngunahanjika maliji amwenemwene ni a mana.

²⁶ Mwanangana Agripa! Ngunahase kuhanjika ni hamu kuli yena, mumu Unanyingika yuma yino. Chafulielele ngwami, kuwayinyingikine, mumu kuyalingiwile ko ku tenga.

²⁷ Mwanangana Agripa! Unafuliela akwa munanyi a Zambi, nyi? Ngunanyingika unaafuliela.”

²⁸ Agripa yamwamba Paulu ngwenyi: “Hasala hakepe Unanyongo kungupwisa mukwa Kristu, nyi?”

²⁹ Paulu ngwenyi: “Chibwe ha shimbu likepe hanji ha shimbu linene nakulemba Zambi ngwami, yena ni atu eswe waze anangwivu musono, abwe ngwe yami, alioze hi mu ngoji jino ko.”

³⁰ Mwanangana, ni mukwa kuyula, ni Berenise, ni waze eswe atwamine hamwe no yaakatuka.

³¹ Mba muze haaya ku punga, yaalihanjekesa ngwo: “Mutu yono kalingile chibi nichimwe cha kufwa chibwe chakumusa mu zuwo lia lamba.”

³² Agripa yambila Festu ngwenyi: “Mutu yono, nyi kechile mwanangana wa Aroma abatule milonga yenyi, kachi te twamutusula.”