Yilinga 24 - Mukanda Wa Zambi 1970

Ayuda yaasuma Paulu mulonga ku meso ja Felix

¹ Muze matangwa atano haabalika, Anania, mwata wa mahako yaya ku limbo lia Sesarea ni amwe makulwana, ni hako umuwika, jina lienyi Tertulu. No yaaheta ku meso ja mukwa kuyula Felix, mba yaasolola yuma yize asumine nayo Paulu.

² Muze hatambika Paulu, Tertulu yabutuka kumusuma ni maliji wano ngwenyi: “Mwanangana Felix, twakutwama ni uhwimino unene mumu hali yena. Ku mana je wakuyula milonga ya ku vungu lietu kanawa.

³ Mu yuma yeswe ni kuma kweswe twakuwahilila ne kawape.

⁴ Mwane, Chazangile kunulalwisa. Kashika ngunaliumbu kuli yena utwivwe kama hakepe nikulita ni ubeme wa mbunge ye.

⁵ Twawanyine yono lunga mutu mubi, mukwa kuvundula Ayuda eswe ku yifuchi yeswe ya hashi. Kali mukwa lutwe wa mbunga ya Anazare.

⁶ Iye nawa wesekele kujilula zuwo lia Zambi lia Ayuda, alioze yitumukwata. (Twazangile kumusopesa nikulita ni Shimbi jetu,

⁷ alioze mwata wa tujita Lisia yatulumuka ni kumuchiza ku moko jetu ni tachi jeswe.

⁸ Mba Lisia yambila waze anakamusuma mulonga eze ku meso je.) Nyi muuhula mutu yono, muuhasa kunyingika yena mwene chikuma chize tunamusumina mulonga.”

⁹ Ayuda nawa yaatayiza kusuma chino, ngwo: “Momwene.”

Paulu yalisambisa ku meso ja Felix

¹⁰ Muze mukwa kuyula hatenya Paulu ni mutwe hanga ahanjike, Paulu yamba ngwenyi: “Ngunanyingika ngwami, yena uli ngaji mukulu wa vungu lino. Kashika ngunalisambisa ku meso je ni chiseke.

¹¹ Ngwe muuhasa kuhengula yena mwene, matangwa kanda achizuka kumi ni aali muze nayile ku Yerusaleme mu kuwayila Zambi.

¹² Kaanguwanyine ko nikuhamika chibwe ni mutu umuwika mu zuwo lia Zambi lia Ayuda, chibwe nikuvundula mbunga mu mazuwo ja kuwayila hanji kuma kukwo mu limbo lize.

¹³ Chibwe kaahashile kusolola yuma ya umwenemwene yize anagusumu nayo haliabwila.

¹⁴ Alioze ngunatayiza ku meso je ngwami, nakuwayila Zambi ya tushakulu twetu ni kukaula jila yize akwamba ngwo, ya mahuza. Alioze nakufuliela yuma yeswe yize hiyinasonewa mu mikanda ya Shimbi ni ya akwa munanyi a Zambi.

¹⁵ Nakufuliela Zambi, ngwe ayo ene, ngwami, akwa ululi ni yihenge, eswe aali maakahinduka ku kufwa.

¹⁶ Che chikuma chino ni yami nawa nakulifumba, hanga ngukabwe ni mbunge yibema ku meso ja Zambi ni atu.

¹⁷ “Miaka yinji yabalikile yize chabwile ko ku Yerusaleme. Mba yinguya ko nikwaha vungu liami yawana ni kulambula Zambi milambu.

¹⁸ Hohene yaanguwana nikulibemesa mu zuwo lia Zambi lia Ayuda, hi mukachi ka mbunga ko, chibwe ni Vunda ka.

¹⁹ Alioze amwe Ayuda a ku chifuchi cha Asia abwile ko. Te enoo chaatamba kubwa ku meso je ni kungusuma mulonga nyi Chuma chimwe anguli nacho.

²⁰ Chibwe wano ene, ahanjike, nyi chitela angumwene nacho muze namanyine ku meso ja Mbunga ya Ngaji ja Ayuda.

²¹ Chuma chimuwika lume nalingile, muze namanyine ku meso jo, yingukololoka ngwami: ‘Nunangusopesa musono mumu nakufuliela ngwami, afu kumaakahinduka.’ ”

²² Felix, nikunyingika pundu longeso hakutwala kuli Yesu Kristu, yaashimbwishila, yaamba ngwenyi: “Muze mwata wa tujita Lisia makeza, mba mungukabatula mulonga wenu.”

²³ Felix yahana Shimbi kuli mwata wa tujita akafunge Paulu kanawa ni kumutala ni meso wika, kanda akakwika niumwe wa kuli masepa jenyi ha kumukwasa.

Paulu ku meso ja Felix ni Drusila

²⁴ Muze matangwa amwe haabalika, Felix yaheta hamwe ni mukwo pwo Drusila, Kayuda. Yasaka Paulu, yamwivwa hakutwala ku kufuliela Kristu Yesu.

²⁵ Alioze muze Paulu ahanjekele hakutwala ku ululi, ni kulihumikiza, ni ku ubatwilo uze muukeza, Felix yevwa woma, yamba ngwenyi: “Haliabwila yako. Mungukutambika nawa muze mungubwa ni tangwa libema.”

²⁶ Yasa nawa mbunge ngwenyi, hanji Paulu mamwaha mbongo. Kashika yamutambika kanji nikuhanjika nenyi.

²⁷ Alioze muze miaka yaali hiyamanunuka, Porsiu Festu yasalakana Felix. Te Felix wazangile kuwahisa Ayuda. Kashika yahichika Paulu mu zuwo lia lamba.