Yilinga 23 - Mukanda Wa Zambi 1970

¹ Paulu yahulikila meso ku Mbunga ya Ngaji ja Ayuda, yamba ngwenyi: “Akwetu, manyonga jami keeshi kunguhisa ku meso ja Zambi hakutwala ku mwono wami ndoo ku tangwa lino.”

² Mwata wa mahako, Anania, yambila waze te ali hamwe nenyi amulambe ku kanwa.

³ Paulu yamwamba ngwenyi: “Zambi makulamba, yena uli ngwe mbango yakukwita ni pemba. Unatwama ungubatwile nikulita ni Shimbi, alioze yena mwene wakushiha Shimbi muze unambe ngwe, angulambe.”

⁴ Waze amanyine hehi ni Paulu yaamuhula ngwo: “Unatuku mwata wa mahako a Zambi, nyi?”

⁵ Paulu ngwenyi: “Mamaa akwetu! Te Chanyingikine ngwami, kali mwata wa mahako. Mumu hichinasonewa ngwo: ‘Kanda uhanjika chibi hali mukwa kuyula atu je.’ ”

⁶ Paulu, muze hamona Chihanda cha Asaduseu ni Chihanda cha Afariseu, yakololoka ni liji linene mukachi ka mbunga ngwenyi: “Akwetu, yami nguli Kafariseu, mwana Kafariseu. Nguli kuno ku usopelo mumu ngunase ko mbunge ngwami, afu kumaakahinduka nawa.”

⁷ Muze te hamba chino, hakachi ka Afariseu ni Asaduseu yihabwa pami jinji. Ye mbunga yaalihandununa.

⁸ (Mumu Asaduseu kaakwamba ngwo, atu keeshi kuhinduka ku kufwa, kukushi kanganda ka mwilu chibwe mwiku. Alioze Afariseu kaakutayiza yino yeswe.)

⁹ Yikubwa zungo linji. Amwe alongeshi a Shimbi, a ku mbunga ya Afariseu, yaakatuka nikuhamika chikolo ngwo: “Kutushi kuwana chibi nichimwe muli yono mutu. Tangwa likwo mwiku wa Zambi hanji kanganda ka mwilu unakahanjika nenyi.”

¹⁰ Yikubwa Vunda jinji. Mwata wa tujita yevwa woma ngwenyi, hanji maatanuna Paulu yihanda yihanda. Kashika yaha tujita twenyi Shimbi hanga apalumuke mukachi ka mbunga, a chize Paulu mukachi ko, ni kumutwala mu zuwo lia tujita.

¹¹ Ha ufuku uze, Mwene Yesu yamana hehi ni Paulu, yamba ngwenyi: “Hamuka lume! Hiwangushindakenyena muno mu Yerusaleme. Chizechene nawa Chakutamba kushindakenya ku Roma.”

Ayuda yaajikinyina Paulu

¹² Muze hikwacha, Ayuda yaatwama punga ni kulishinga ngwo: “Kutuchi kulia chibwe kunwa ndoo hitwashiha Paulu.”

¹³ Waze alishingile, kwoka cho te kuhiana makumi awana.

¹⁴ No yaakatuka, yaaya kuli mahako a lutwe a Zambi ni makulwana nikwamba ngwo: “Yetu hitunalishingi ni Shingo lino, ngwetu, kutuchi kulia nichimwe ndoo hitwashiha Paulu.

¹⁵ Kashika, haliabwila livwenu ni Mbunga ya Ngaji ja Ayuda, nuhanjike kuli mwata wa tujita ngwenu, anehe Paulu ku meso jenu nikusoloka ngwe nunazange kushishika milonga yenyi kanawa. Yetu hitwalilulika ha kumushiha shimbu kanda achiheta.”

¹⁶ Alioze mwihwa wa Paulu yevwa kujikinyina cho. Neye yaya ku zuwo lia tujita, yanjila, yambulwila Paulu maliji waze.

¹⁷ Paulu yatambika umwe wa kuli miata ja tujita, yamwamba ngwenyi: “Twala mukweze yono kuli mwata wenu mumu liji ali nalio lia kumwambulwila.”

¹⁸ Neye yamutwala kuli mwe mwata nikwamba ngwenyi: “Funge Paulu kangutambikanga, ni kungulembejeka hanga ngukunehene mukweze yono, mumu kali ni liji lia kukwambulwila.”

¹⁹ Mwata yakwata mukweze ku kwoko, yaya nenyi ku tenga, yamuhula ngwenyi: “Liji lika uli nalio lia kungwambulwila?”

²⁰ Mukweze yamba ngwenyi: “Ayuda haalitesa ha kukulembejeka kupalumwisa Paulu hamene ku Mbunga ya Ngaji ja Ayuda ni kusoloka ngwe kaanazange kushishika milonga yenyi kanawa.

²¹ Alioze kanda waatayiza kwe, mumu malunga kuhiana makumi awana anamujikinyina. Haanalishingi ngwo: ‘Kutuchi kalia chibwe kunwa ndoo hitwamushiha.’ Haliabwila haalilulika. Kaanatwaminyina kumbululo lie.”

²² Mwata yashika mwe mukweze, nikumwaha koki ngwenyi: “Kanda wambulwila niumwe yize hiwangwambulwila yami.”

Mwata wa tujita yatuma Paulu kuli mukwa kuyula Felix

²³ Mwata yatambika tujita aali nikwamba ngwenyi: “Lulikenu kulakaji jaali ja tujita, ni makumi shimbiali waze akwenda ha tuvwalu, ni kulakaji jaali ja akwa makunga. Lilulikenu eswe ha kuya ku limbo lia Sesarea ha ola ya muchilivwa ya ufuku.

²⁴ Lulikenu tuvwalu, nutwalile ho Paulu kanawa ndoo kuli mukwa kuyula Felix.”

²⁵ Mba mwe mwata yasoneka mukanda uno ngwenyi:

²⁶ “Yami Klaudiu Lisia ngunakusonekena yena mukwa kuyula Felix, mulemu Wahiana, Vulie!

²⁷ Lunga yono, Ayuda haamukwata, te kaanazange kumushiha. Alioze muze hinevwa ngwo, kali mwenyaho wa ku wanangana wa Aroma, yinguya ni tujita nikumupulula ku moko jo,

²⁸ yinguzanga kunyingika chitela chize amusumine nacho, kashika namutwalile ku Mbunga ya Ngaji jo.

²⁹ Yingumona ngwami, kalingile ko chimwe Chuma chibi mwanambala chakutela kufwa, chibwe kumusa mu zuwo lia lamba, alioze haamusuma mumu ha yihula ya Shimbi jo.

³⁰ Mba muze haangulweza ngwo, Ayuda kaanamujikinyina, hinakutumina ye nikawashi. Hinambila waze amusumine, akamusume ku meso je.”

³¹ Tujita, nikulita ni chize aambile, yaatwala Paulu, yaamuneha ha ufuku uze ku limbo lia Antipatri.

³² Mba muze hikwacha, yaahichika akwa tuvwalu kuya hamwe nenyi. Akwa kwenda hashi yaahiluka ku zuwo lia tujita.

³³ Muze akwa tuvwalu haaheta ku limbo lia Sesarea, yaakunjika mukanda kuli mukwa kuyula, yaatumbika Paulu ku meso jenyi.

³⁴ Muze mukwa kuyula hatanga mukanda, yahula Paulu chifuchi chenyi. Ha kunyingika ngwenyi, kali wa ku Silisia,

³⁵ yamukumbulula ngwenyi: “Mungukakwivwa muze akwa kukusuma maakaheta.” Mba yahana Shimbi ha kumufunga mu zuwo lia mwanangana Herode.