Yilinga 22 - Mukanda Wa Zambi 1970

¹ “Akwetu ni atata, ivwenu haliabwila kulisambisa chami ku meso jenu.”

² Muze atu evwile chize ahanjikile mu liji ha hebreu, yaahola kuhiana. Paulu yaweza ngwenyi:

³ “Yami nguli Kayuda. Nasemukine mu Tarsu, limbo ha mu chifuchi cha Silisia. Alioze yaangulelela mu limbo lino. Gamaliele mwe wangulongesele kanawa Shimbi ja tushakulu twetu. Nalihanyine kuli Zambi ngwe chize nwakulihana yenu musono.

⁴ Nahungumionene ndoo ku kufwa waze akawile longeso hakutwala kuli Mwene Yesu. Nakwachile malunga ni mapwo nikwasa mu zuwo ha lamba.

⁵ Mwata wa mahako ni makulwana kaanahase kushindakenya ngwo, ngunahanjika umwenemwene. Natambwile kuli ayo mikanda yize asonekene kuli akwetu Ayuda a ku limbo ha Damasku. Mba nayile mu jila ya Damasku mu kukwata akwa Kristu ni kwaneha ku Yerusaleme ha kwamwesa lamba.”

Paulu yambulula kwalumuka cha mbunge yenyi

⁶ “Muze nendele mu wenyi nikukundama ku Damasku, tangwa ha muchima, susumuku pangu ha mwilu yilingupangukila.

⁷ Yingulimbuka hashi. Yingwivwa liji lize liangwambile ngwo: ‘Saulu, Saulu, kuchi unanguhungumiona?’

⁸ Yingukumbulula ngwami: ‘Mwene, yena iya?’ Yangulweza ngwenyi: ‘Yami nguli Yesu Kanazare, yoze wakuhungumiona.’

⁹ Waze te ali hamwe ni yami yaamona pangu, alioze keevwile ko liji lize lianguhanjikishile.

¹⁰ Mba yinguhula ngwami: ‘Mwene, kuchi Changutamba kulinga?’ Mwene yangukumbulula ngwenyi: ‘Katuka uye ku Damasku. Kwe kuze maakakwambulwila yeswe yize Zambi hanakusela ha kulinga.’

¹¹ Te chahashile kumona mumu ha pangu linji. Kashika waze te ali hamwe ni yami yaangukwata ku kwoko, yaangutwala ku Damasku.

¹² “Yikubwa umwe mutu, jina lienyi Anania, mukwa kuwayila Zambi, yoze wononokenene Shimbi jetu. Ayuda eswe a mu Damasku yaamushindakenya ngwo, kali mubema.

¹³ Yeza, yamana hehi ni yami yamba ngwenyi: ‘Mukwetu Saulu, laula nawa ku meso!’ Ha shimbu lizeliene yingulaula, yingumutala.

¹⁴ Neye yamba ngwenyi: ‘Zambi ya tushakulu twetu hanakutongola hanga unyingike upale wenyi, hanga umone mwe Mukwa Ululi, ni kwivwa liji lienyi.

¹⁵ Mumu muukabwa chela chenyi kuli atu eswe ha yeswe yize hiwamona ni yize hiwevwa.

¹⁶ Mba haliabwila kuchi unalaluka? Katuka, akupapachise, ulikose milonga ye ha kulemba kuli Yesu Kristu.’ ”

Paulu yambulula ngwe chize Zambi amutumine kuli waze hi Ayuda ko

¹⁷ “Yinguhiluka ku Yerusaleme. Ni muze te ngunalembe mu zuwo lia Zambi, yingumona Usolwelo.

¹⁸ Yingumona Mwene Yesu. Yangwamba ngwenyi: ‘Lipupwise, ukatuke ku Yerusaleme, mumu atu wano keechi katayiza shindakenyo ye hakutwala kuli yami.’

¹⁹ Ami ngwami: ‘Mwene, ayo kaananyingika ngwo, mu mazuwo eswe ja kuwayila ja Ayuda te nakukwata akwa kufuliela, nikwasa mu zuwo lia lamba.

²⁰ Muze ashihile Estevau, (Etienne), chela che, ni yami nawa kwe nabwile, nachitayijile, nafungile mahina ja waze amushihile.’

²¹ Mwene yangwamba ngwenyi: ‘Yako, mumu kusuku mungukakutuma kuli waze hi Ayuda ko.’ ”

Paulu ni mwata wa makulwana a tujita

²² Atu yaabanjika Paulu ndoo ku liji lino: “waze hi Ayuda ko.” Mba yaakololoka ni liji linene ngwo: “Chizenu mutu yono, mushihenu, katelele kutwama ni mwono!”

²³ Yaakololoka nikumbila mahina jo nikutakumuna fufuta mu tetela.

²⁴ Mwata wa tujita yahana Shimbi kuli tujita ngwenyi, atwale Paulu mu zuwo lia tujita ni kumulamba ni fimbo (shikote), hanga ase chinyingi ha chikuma chize akalumiokenene chocho hali iye.

²⁵ Alioze shimbu amukashile ni kusa hanga amulambe, Paulu yahula mwata wa tujita yoze te uli ko ngwenyi: “Chinalite ni Shimbi ha kulamba mwenyaho wa ku wanangana wa Aroma yoze kanda achimusopesa, nyi?”

²⁶ Ha kwivwa liji lino, mwata wa tujita yaya ni kuhula mwata wenyi ngwenyi: “Kuchi unambe kulinga? Mutu yono kali mwenyaho wa ku wanangana wa Aroma!”

²⁷ Mwe mwata yeza kuli Paulu, yamuhula ngwenyi: “Ngwambulwile, yena uli mwenyaho wa ku wanangana wa Aroma, nyi?” Paulu ngwenyi: “Ewa!”

²⁸ Mwata ngwenyi: “Nafwetele mbongo jinji ha kubwa mwenyaho wa ku wanangana wa Aroma.” Alioze Paulu ngwenyi: “Yami nasemukine mwenyaho.”

²⁹ Hazehene waze ambile kumulamba hanga ahanjike, yaamukatuka. Mwe mwata yevwa woma muze hasa chinyingi ngwenyi, Paulu kali mwenyaho, mumu hamukasa ni ngoji ja utale.

Paulu ku meso ja Mbunga ya Ngaji ja Ayuda

³⁰ Mwata wa tujita yazanga kunyingika pundu chikuma chize Ayuda asuminyine Paulu mulonga. Kashika muze hikwacha, yamujitula ngoji. Yahana Shimbi kuli mahako a lutwe ni Mbunga ya Ngaji ja Ayuda kulikungulula. Mba yaneha Paulu, yamusa ku meso jo.