Yilinga 21 - Mukanda Wa Zambi 1970

Paulu yaheta ku Yerusaleme

¹ Muze hitwalihandununa no, yitwenda mu ulungu, yituya pundu ku limbo lia Kose. Ha tangwa lia muchaali, yituheta ku limbo lia Rodese. Katu kwenako, yituheta ku limbo lia Patara.

² Yituwana ko ulungu te unazauka nikuya ku chifuchi cha Fenishia, yitunjila mo, yituya.

³ Muze hitwamona tungu lia Shipre, yitulihichika ku kwoko lia chindume, yitwenda ndoo ku chifuchi cha Siria, ni kuheta ku limbo lia Tiru, kuze te maalongolwela yikashi mu ulungu.

⁴ Yituwana tumbaji, mba yitutwama ko matangwa shimbiali. Ku tachi ja Mwiku wa Linanga, e tumbaji yaambila Paulu ngwo: “Kanda uya ku Yerusaleme.”

⁵ Muze hitwatwama matangwa shimbiali mu limbo lize, yitukatuka ni kuya mu jila yetu, ayo eswe, ni mapwo jo ni ana jo, yaatushinjikila ndoo haze lia limbo. Yitusa makungunwa hashi ku mbumbulu ya kalunga lwiji, yitulemba.

⁶ Muze hitwalishika no, yitunjila mu ulungu. No yaahiluka ku mahio.

⁷ Muze hitwakatuka ku Tiru, yituzauka ku limbo lia Tolemaisa. Chenacho twamanunwine wenyi wetu mu ulungu. Ku Tolemaisa, yitulimeneka ni akwetu akwa Kristu, yitutwama ko tangwa limuwika.

⁸ Muze hikwacha, yituya, yituheta ku limbo lia Sesarea yitunjila ni kutwama mu zuwo lia Filipe, mukwa kwambujola Sango Jibema, te wa hakachi ka atu shimbiali waze atongwele ku Yerusaleme ha kukwasa tunganda.

⁹ Lunga yono wabwile ni anenyi awana a mapwo waze kaayile ko ku malo, te akwa munanyi a Zambi.

¹⁰ Shimbu twatwamine ko amwe matangwa, mukwa munanyi umuwika, jina lienyi Agabu, yoze te unakatuka ku chifuchi cha Yudea, yaheta ko.

¹¹ Neye yeza kuli yetu, yanda muya wa Paulu, yalijichika molu ni moko, mba yamba ngwenyi: “Mwiku wa Linanga unambe ngwenyi, chechize Ayuda ku Yerusaleme maakajichika mwenya muya uno, mba maakamukunjika kuli yilambala.”

¹² Muze twachivwile, yetu ni akwa Sesarea, yitulembejeka Paulu ngwetu, kanda uya ku Yerusaleme.

¹³ Alioze yakumbulula ngwenyi: “Kuchi nunalingi, nikulila, nikungulezumuna? Hinalilulika hi kukashiwa wika ko, alioze chibwe kufwa ku Yerusaleme mumu hali Mwene Yesu.”

¹⁴ Mba, muze kutwahashile kumukununa, yitwecha kumulembejeka, yitwamba ngwetu: “Zambi akalinge upale wenyi.”

¹⁵ Kulutwe lia matangwa waze, yitukasa yuma yetu, yituya ku Yerusaleme.

¹⁶ Amwe tumbaji a ku Sesarea yaaya hamwe ni yetu, yaatuhetesa ku zuwo lia Nasone, mutu wa ku tungu lia Shipre, hanga tukatwame ko. Mutu yono te kambaji mukulu.

Paulu yanangisa Tiangu (Jake)

¹⁷ Muze hitwaheta ku Yerusaleme, akwetu akwa Kristu yatusambilila.

¹⁸ Muze hikwacha, Paulu yaya hamwe ni yetu maha Tiangu (Jake). Makulwana eswe a mu Chikungulwila te kwe ali.

¹⁹ Muze Paulu haameneka, yaambulwila mwazu yuma yeswe yize Zambi alingile hakachi ka waze hi Ayuda ko hakutwala ku milimo yenyi.

²⁰ No, muze haachivwa, yaachichimieka Zambi, yamwamba ngwo: “Mukwetu, unamono tununu twa atu hakachi ka Ayuda haafuliela. Eswe kaakulisela ku Shimbi.

²¹ Haanambulwila ngwo, wakulongesa Ayuda eswe waze atwama mu yifuchi ya yilambala kwehuka Shimbi ja Mose. Ngwo, wakwamba ngwe, kanda nupwisa ana jenu ngalami chibwe kanda nukaula ndako ja Ayuda.

²² Kuchi mutulinga? Mumu chamwenemwene kumaachivwa ngwo, hiweza.

²³ Linga chize tunambe. Ngwetu, tuli ni malunga awana hano waze ali ni chilakenyo.

²⁴ Yako hamwe no ha kulibemesa. Waafwete hanga alitewule mitwe, mba atu eswe maakanyingika ngwo, yize atu ambulwile mumu hali yena hi yamwenemwene ko, alioze maamba ngwo ni yena nawa wakwononokena Shimbi ja Mose.

²⁵ Alioze kuli waze hi Ayuda ko, waze haafuliela, twatuminyine mukanda nikubatula ngwetu, kanda akalia yuma ya kulambula ku mahamba, chibwe manyinga, chibwe tushitu a kuhonda, ni kanda alinga utanji.”

²⁶ Paulu yatwala e malunga. Muze hikwacha yaya hamwe no ha kulibemsa, yanjila mu zuwo lia Zambi lia Ayuda, yambulula kumanununa cha matangwa a kuliwahisa, yalweza nawa tangwa lize mutu ni mutu makahana mulambu.

Ayuda yaakwata Paulu mu zuwo lia Zambi lia Ayuda

²⁷ Muze e matangwa shimbiali a kuliwahisa haamanunuka, Ayuda a ku chifuchi cha Asia, yaamona Paulu mu zuwo lia Zambi, yaavundula mbunga yeswe, yaamukwata,

²⁸ yaakololoka ngwo: “Malunga a Israele, tukwasenu. Mutu yono kakuya kweswe nikwambujola ha kulimika ni Aisraele, ni Shimbi, ni zuwo lino. Chibwe haliabwila hanjisa waze hi Ayuda ko mu zuwo lino lia Zambi, hajilula muma muno mwa chijila.”

²⁹ (Yaamba chino mumu te hamona Trofimu, Kaefesu, hamwe ni Paulu mu limbo. Kashika yaashinginyeka ngwo, Paulu wamunjisa mu zuwo lia Zambi.)

³⁰ Limbo heswe yilibwa ni Vunda. Atu yaalundumuka fuji, yaakwata Paulu, yaamukoka haze lia zuwo lia Zambi. Shimbu lizeliene yaajila ku yikolo.

³¹ Shimbu ambile kumushiha, liji yiliheta kuli mwata wa tujita ngwo, limbo heswe ha Yerusaleme hiliavunduka ni zungo.

³² Hohene yanda tujita ni miata jo nikuzomboka fuji. Muze hamona mwata ni tujita, Ayuda yaalitwamina kulamba Paulu.

³³ Mwata wa tujita yakundama kuli Paulu, yamukwata, yamba hanga amukase ni ngoji ja utale, yahula ngwenyi: “Yono iya? Kuchi anakalinga?”

³⁴ Alioze mukachi ka mbunga amwe yaakololoka chichi, akwo yaakololoka chikwo. Mba muze mwata kahashile kusa shindakenyo chize ye mbunga anambe mumu ha Vunda, yaamba atwale Paulu mu zuwo ha tujita.

³⁵ Muze haheta ku ndalo, tujita yaamuzundula mumu ha Vunda ja ye mbunga,

³⁶ mumu eswe yaamukaula nikukololoka ngwo: “Mushihenu!”

Paulu yalisambisa

³⁷ Alioze shimbu te himaamunjisa mu zuwo ha tujita, Paulu yahula mwata wa miata ja tujita ngwenyi: “Ngunahase kuhanjika kama chimwe Chuma kuli yena, nyi?” Mwe mwata yamuhula ngwenyi: “Unanyingika greke, nyi?

³⁸ Yena hi uli Kaegiptu ko yoze wanehene Vunda hatangu ni kutwala mu puya tununu awana twa akwa kushihana, nyi?”

³⁹ Paulu ngwenyi: “Yami nguli Kayuda wa ku Tarsu mu chifuchi cha Silisia. Nguli mwenya limbo ha lufuma. Ngutayize kama ngunakulembe nguhanjike ni atu.”

⁴⁰ Muze te hamutayiza, Paulu yamana ha ndalo, yaholesa atu ni kwoko. Muze e atu haahola kuluu, Paulu yahanjika mu liji ha hebreu ngwenyi: