Yilinga 20 - Mukanda Wa Zambi 1970

Paulu yenda mu chifuchi cha Masedonia ni cha Gresia

¹ Muze te zungo hiliahola, Paulu yatambika tumbaji, yaashinjila maliji, yalishika no, yakatuka ni kuya ku Masedonia.

² Muze hendangana mu chifuchi chize nikushinjila tumbaji maliji anji, yaheta mu chifuchi cha Gresia,

³ yatwama ko tukweji atatu. Mba yazanga kuzauka ni kuya ku Siria, alioze muze hevwa ngwo, Ayuda kaanamujikinyina, yanyonga kuhiluka mu jila ya Masedonia.

⁴ Waze ayile hamwe nenyi wano: Sopatere, mwana wa Piruse wa ku Berea, ni Aristarku, ni Sekondu a ku Tesalonika, ni Gayu wa ku Derbe, ni Timoteu, ni Tichiku, ni Trofimu, a ku chifuchi cha Asia.

⁵ Wano yaatetekela, yaatutwaminyina ku limbo lia Troa.

⁶ Kulutwe lia chiwanyino cha Mbolo Kuyishi Yitumbo, yitukatuka ku Filipu mu ulungu, ni muze matangwa atano akwo haabalika, yituheta ku limbo lia Troa, yitutwama ko matangwa shimbiali.

Paulu ku Troa

⁷ Ha tangwa lia kuhwima, yitukunguluka ha kulia hamuwika. Paulu yahanjika ku mbunga ndoo ha muchima ufuku, mumu yanyonga kuya muze hikwacha.

⁸ Ndeya jinji jabwile mu chibatulo cha kwilu muze yetu twakungulukile.

⁹ Mukweze umuwika, jina lienyi Utiku, te ha kapenda anatwama. Muze Paulu alongesele shimbu lisuku, tulo yamuhiana, Utiku yanongwoka, mba yaholokela mu chibatulo cha muchitatu cha kwilu. No yaamuzundula te hanafu kulu.

¹⁰ Paulu yasunuka, yamuhetamina, yamukangayika, yamba ngwenyi: “Kanda nunenganyana, kali ni mwono.”

¹¹ Muze hanyina nawa kwilu, yabalula mbolo, yalia, yahanjika nawa Chipinji chisuku ndoo kwabatwokele ngwangwangwa, mba yaya.

¹² Atu yaatwala mwe mukweze ku mahienyi ni mwono wenyi, yaalilembejeka kuhiana mumu hali iye.

Paulu yaya ku Miletu

¹³ Yetu yitutetekela ni kunjila mu ulungu, yituzauka ku limbo lia Asose. Kwe kuze twanyongene kuhitula Paulu ni kuya nenyi mu ulungu. Chenacho atushikile, mumu iye yazanga kwenda hashi.

¹⁴ Muze hatuwana mu Asose, yitunjila mu ulungu, yituheta ku limbo lia Mitilene.

¹⁵ Yitukatuka ko, ni muze hikwacha, yituheta ku tungu lia Chiu. Ha tangwa lia muchaali, yituheta ku tungu lia Samose, ni muze hikwacha, yituheta ku limbo lia Miletu.

¹⁶ Paulu yanyonga ha kuhiana Efesu, mumu te kazangile kushimbula mu chifuchi cha Asia. Yalipupwisa akahete ku Yerusaleme shimbu tangwa lia Pentekoste kanda lichiheta, nyi te muchibwa chashi.

Maliji akusula a Paulu kuli makulwana ja Chikungulwila ku Efesu

¹⁷ Ku Miletu Paulu yatuma liji ku limbo lia Efesu ha kutambika makulwana ja Chikungulwila.

¹⁸ Muze heeza, yaamba ngwenyi: “Yenwene nunanyingika ndako yami chize nabwile hakachi kenu matangwa eswe, chize ku tangwa litangu muze nahetele ku chifuchi cha Asia.

¹⁹ Yingulingila Mwene Yesu ni kulikehesa cheswe ni masoji. Yingumona nawa lamba muze Ayuda angutwahile.

²⁰ Chalitwaminyine kunwambulwila chize cheswe chanubemenene ni kulongesa ku meso ja atu anji ni ku zuwo ni zuwo.

²¹ Hingunashindakenya kuli Ayuda ni kuli waze hi Ayuda ko, ngwe chize chaatamba kwalumuna mbunge jo kuli Zambi ni kufuliela Mwene wetu Yesu.

²² Talenu, haliabwila ngunayi ku Yerusaleme. Mwiku wa Linanga unangushinjika. Chanyingikine Chuma chize muchikanguwana ko,

²³ shina Mwiku wa Linanga wakungushindakenya mu limbo ni limbo ngwenyi: Luyinda ni zuwo lia lamba yinakutwaminyina.”

²⁴ Alioze Chishi kwalula mwono wami ngwe Chuma chilemu. Nakuzanga kuhwisa kwenda chami ni milimo yami yize natambwile kuli Mwene Yesu. Milimo yino yenayi ayi: kushindakenya chikolo Sango Jibema ja utu wa Zambi.

²⁵ “Hinabalika nikwambujola Wanangana wa Zambi hakachi ka yenu eswe. Alioze haliabwila ngunanyingika ngwami, kunuchi kangumona nawa.

²⁶ Kashika musono ngunanushindakenya ngwami, nyi umwe wa kuli yenu watoka, hi mulonga wami ko.

²⁷ Mumu chalitunyine kunwambulwila upale weswe wa Zambi.

²⁸ Kanyamenu yenwene, ni mbunga yeswe yize Mwiku wa Linanga anuhele kufunga. Fungenu kanawa Chikungulwila cha Zambi chize azukile ku kufwa cha Mwanenyi.

²⁹ Mumu ngunanyingika ngwami, muze mungukakatuka, tunganda asasu maakanjila hakachi kenu, waze keechi kevwila mbunga ya mapanga keke.

³⁰ Hakachi ka yenwene nawa malunga maakakatuka ni kuhanjika mahuza, ni kukoka tumbaji ha kwakaula.

³¹ Kashika kanyamenu, iwulukenu ngwenu, ha miaka yitatu, ufuku ni mwalwa, chalitwaminyine kukanyamisa mweswe wa kuli yenu ni masoji.

³² “Haliabwila ngunanukunjika kuli Zambi ni ku liji lia utu wenyi. Kanahase kunukolesa ni kunuwahisa ni yiwape yize aswekelele atu jenyi.

³³ Chevwile ko lwahu wa mbongo, chibwe oru, chibwe mahina ja mutu niumwe.

³⁴ Nunanyingika yenwene chize nalingile milimo ni moko ja yami mwene ha kubwa ni yeswe yize nahonene ni yize ahonene waze abwile hamwe ni yami.

³⁵ Mu yuma yeswe nanuhele chilweza cha kuhondangana ha kukwasa waze keeshi tachi, nikwiwuluka liji lize ambile Yesu ngwenyi: ‘Chinawaha kutambula, alioze Shinaho kulialia.’ ”

³⁶ Muze te hamba yuma yino, Paulu yasa makungunwa hashi hamwe ni ayo eswe, yalemba.

³⁷ Eswe yaalila, yaakangayika Paulu mu moko jo nikumushisa.

³⁸ Yeevwa chinyengo chahiana ha maliji waze ambile ngwenyi: “Kunuchi kangumona nawa.” No yaamushinjikila ndoo ku ulungu.