Yilinga 2 - Mukanda Wa Zambi 1970

Mwiku wa Linanga yiuhulumuka

¹ Muze tangwa lia chiwanyino cha Pentekoste hiliaheta, ayo eswe yaabwa hamuwika, muma mumuwika.

² Susumuku mwilu yimwiza lundunjila ngwe fuji ya tachi, yiizalisa zuwo lieswe muze te anatwama.

³ Yimusoloka malimi ngwe milengi ya kahia, yaalihandununa, mba yaabwa hali mutu ni mutu.

⁴ No eswe yaazala ni Mwiku wa Linanga, yaabutuka kuhanjika mu maliji eka ni eka ngwe chize Mwiku waahele yakuhanjika.

⁵ Ku Yerusaleme te Ayuda atwama ko, akwa kuwayila Zambi waze akatukile ku yifuchi yeswe ya hashi.

⁶ Muze te heevwa zungo lize, mbunga yaalikungulula. Eswe yaakakashana, mumu mutu ni mutu yevwa akwa kufuliela nikuhanjika mu liji lienyi mwene.

⁷ Yaatungumuka, yaalishimwoka kuhiana nikwamba ngwo: “Puu! Atu wano eswe anahanjika, hi akwa Galilea ko, nyi?

⁸ Kuchi mba tunevu mutu ni mutu mu liji lienyi lia Chisemuko?

⁹ Tuli atu ja mu yifuchi ya Parte, ni Meda, ni Elame, ni Mesopotamia, ni Yudea, ni Kapadosia, ni Pontu, ni Asia,

¹⁰ ni Frigia, ni Pamfilia, ni Egiptu, ni ku Chihanda cha Libia chize chasulangana ni Sirene, ni njize waze akatukile ku Roma,

¹¹ ni Ayuda, ni akwa kufuliela a ku mavungu akwo, ni akwo tuli akwa Kreta ni akwa Arabia. Alioze yetu eswe tuneevu nikuhanjika mu maliji ja yetwene milimo yinene ya Zambi!”

¹² No eswe yaakomoka, yaakakashana nikulihula ngwo: “Ayiyene yika?”

¹³ Alioze akwo yaaseha ngwo: “Haazengewa ni vinyu.”

Petulu yambujola ha tangwa lia chiwanyino cha Pentekoste

¹⁴ Mba Petulu yakatuka hamwe ni tumbaji akwo kumi ni kashi, yakololoka ngwenyi: “Akwetu Ayuda, ni yenu eswe waze nwatwama mu Yerusaleme, achivwenu, ngubanjikenu.

¹⁵ Ngwami, atu wano kaazengewele ni vinyu ngwe chize nunanyongo, mumu tuli lume ha ola ya muchilivwa ya chichamene.

¹⁶ Alioze Chuma chino nunamono, Zambi walambile kuli mukwa munanyi wenyi Joele, ngwenyi:

¹⁷ ‘Ha matangwa akusula mungukalinga chino. Mungukamwangina Mwiku wami wa Linanga muli atu eswe. Ana jenu a malunga ni a mapwo maakambujola yuma yize muyikeza ho. Akweze jenu maakamona Usolwelo; tushinakaji twenu maakalota yilota.

¹⁸ Ewa, ha matangwa waze, mungukamwangina Mwiku wami wa Linanga, chibwe muli tuvumbi twami a malunga ni a mapwo, mba maakambujola yuma yize muyikeza ho.

¹⁹ Mungukasolola yuma ya kulishimwoka ya mwilu, ni yikomokeso ya hano hashi, ni manyinga, ni kahia, ni mwishi unji.

²⁰ Tangwa mulikalaa, kakweji makachila ngwe manyinga, mba Tangwa lia Mwene Yesu mulikeza, tangwa linene ni lia uhenya.

²¹ Hohene mweswawo malemba ngwenyi, Mwene ungulamwine kama, mamulamwina.’

²² “Malunga ja Israele, ngubanjikenu! Zambi hanashindakenya hakutwala kuli Yesu wa ku Nazare, ni yipupu, ni yikomokeso, ni yilayi. Yuma yino Zambi wayilingile muli iye, ngwe chize nunanyingika yenwene, mumu wayilingile hakachi kenu.

²³ Zambi, mu upale wenyi ni chinyingi chenyi, hanabatula kulu kunukunjika Yesu. Nwamushihile muze nwatayijile yivulumunyi amuhate ha kulusu.

²⁴ Alioze Zambi hanamuhindwisa, hanamujitula ku lamba lia kufwa, mumu kufwa kuchahashile kumukwata nawa.

²⁵ Mumu David hanahanjika kulu hakutwala kuli iye ngwenyi: ‘Namwene mwe Mwene ku meso jami matangwa eswe. Kali ku chindume chami, chichi kwivwa woma nichimwe.

²⁶ Kashika nakuwahilila, nakuhanjika ni chiseke. Chibwe nguli mu mujimba wa uutu, mungukalinduluka ni kusa mbunge ha yibema,

²⁷ mumu kuuchi katayiza mwono wami kusala muma lia afu, kuuchi katayiza munangi we kubola.

²⁸ Hiunangunyingikisa jila jize jakutwala ku mwono. Nakuwahilila nyi nguli ku meso je.’

²⁹ “Akwetu, ngutayizenu kama kuhanjika mwazu kuli yenu hakutwala kuli kashakulu ketu David. Hanafu, haanamufundu. Fuka lienyi lili mukachi ketu ndoo musono uno.

³⁰ Te mukwa munanyi wa Zambi, mba yanyingika ngwenyi, Zambi hanamulakenya ni Shingo ngwenyi: ‘Mungukapwisa umwe wa ku vungu lie mwanangana ngwe yena.’

³¹ David yanyingika yuma yize Zambi makalinga kulutwe. Kashika yahanjika hakutwala ku uhindukilo wa Kristu ngwenyi: ‘Kamwehukile ko muma lia afu, mujimba wenyi kuwabolele.’

³² Yono Yesu, Zambi hanamuhindwisa ku kufwa. Yetu eswe tuli yela ja chikuma chino.

³³ Zambi hanamuzundula, hanamuse ku kwoko lienyi lia chindume. Ni Yesu hanatambula kuli Tata, Mwiku wa Linanga uze alakenyene, hanatumwangina wo. Yuma yize nunevu ni yize nunamono yili yitanga ya Mwiku uze.

³⁴ Mumu David kazezukile ko iye mwene mwilu, alioze yamba ngwenyi: ‘Mwene Zambi yambila Mwene wami ngwenyi: Twama ku chindume chami

³⁵ ndoo mungukasa akwa kole je ngwe Chuma cha kunangika molu je.’

³⁶ “Aisraele eswe chaatamba kunyingika kanawa ngwo, Yesu yoze nwahachile ha kulusu, Zambi hanamupwisa Mwene kanda Chilamwina yoze iye mwene alakenyene.”

³⁷ Muze atu haachivwa, yaalibikala mu mbunge, yaahula Petulu ni tunganda twa Yesu ngwo: “Akwetu, kuchi kevwe mutulinga?”

³⁸ Petulu ngwenyi: “Mutu ni mutu hakachi kenu alumuke ku mbunge, amupapachise mu jina lia Yesu Kristu ha ukonekeno wa milonga. Mba munutambula chawana cha Zambi, Mwiku wa Linanga.

³⁹ Mumu chilakenyo chino chili cha yenu, ni cha ana jenu, ni cha eswe waze ali kusuku, ni cha eswe waze Mwene Zambi yetu hanaatambika iye mwene.”

⁴⁰ Ni maliji anji akwo Petulu yashindakenya, yaalembejeka ngwenyi: “Lilamwinenu ku ubatwilo uze muukeza hali atu wano abi!”

⁴¹ Mba waze afulielele longeso lienyi, yaapapachisa. Ha tangwa lize tununu atatu yaalichinga no.

⁴² Yaalihanahana ha kwivwa longeso lia tunganda twa Yesu, ni kuliendela, ni kulia hamuwika, ni kulemba.

Chikungulwila chitangu

⁴³ Tunganda twa Yesu yaalinga yikomokeso ni yilayi yinji. Atu eswe yeevwa woma.

⁴⁴ Akwa kufuliela yaanyongonona ni kulikata, yaachinga yuma yo yeswe hamuwika,

⁴⁵ yaalanjisa yuma ni yikumba yo, yaalitetela mbongo jize nikulita ni kuhona cha mutu ni mutu.

⁴⁶ Tangwa ha tangwa yaalikungulula mu zuwo lia Zambi lia Ayuda, yaalia yakulia yo hamuwika mu mazuwo jo ni kutuwika cha mbunge,

⁴⁷ yaachichimieka Zambi. Atu eswe yaasa vumbi. Tangwa ha tangwa Mwene yawezela ku mbunga yo waze te Zambi analamwina.