Yilinga 19 - Mukanda Wa Zambi 1970

Paulu ku Efesu

¹ Muze te Apolo achili ku limbo lia Korintu, Paulu yabalika ndusu mu yifuchi ya ku tunda, yaheta ku limbo lia Efesu, yawana ko amwe tumbaji,

² yaahula ngwenyi: “Nwatambwile Mwiku wa Lingana muze nwafulielele, nyi?” No yaakumbulula ngwo: “Kanda tuchivwa kama ngwo, Mwiku wa Linanga kuuli.”

³ Paulu yaahula ngwenyi: “Mba ni upapachisa uka anupapachishile?” Ayo ngwo: “Ni upapachiso wa Yoano.”

⁴ Paulu ngwenyi: “Chamwenemwene Yoano te kakupapachisa waze alumwokene ku mbunge nikwambila Aisraele ngwenyi: ‘Fulielenu yoze meza kulutwe liami, Yesu.’ ”

⁵ Muze haachivwa, yaapapachisa mu jina lia Mwene Yesu.

⁶ Paulu yaasa moko, mba Mwiku wa Linanga yiwahulumukina. No yaabutuka kuhanjika maliji waze te kaanyingikine ko, yaahanjika nawa munanyi.

⁷ Malunga eswe te ngwe kumi ni aali.

⁸ Paulu yanjila mu zuwo lia kuwayila lia Ayuda. Ha shimbu lia tukweji atatu yahanjika ni hamu, yeseka kwakununa hakutwala ku Wanangana wa Zambi.

⁹ Alioze akwo yaakala mbunge, yaalituna kufuliela, yaalelesa ku meso ja atu eswe longeso hakutwala kuli Mwene Yesu. Kashika Paulu yakatuka, yatwala tumbaji hamwe nenyi nikwalongesa tangwa ha tangwa mu shikola ya Tiranu.

¹⁰ Chino yichibwa ha miaka yaali. Kashika atu eswe a mu chifuchi cha Asia, Ayuda ni waze hi Ayuda ko, yeevwa sango ja Mwene Yesu.

Ana ja Siva a malunga

¹¹ Zambi yalinga yipupu yinene ku moko ja Paulu.

¹² Atu yaanehena mieji mahina ni yitambala ya ku mujimba wa Paulu, mba mieji yaahindwoka, ni mwiku ubi yiutuhwoka.

¹³ Amwe Ayuda yeendanganyi, akwa kutuhwisa mwiku ubi, yeeseka nawa kuutuhwisa mu jina lia Yesu. Yaambila mwiku wa luchisa ngwo: “Ngunanwambe ngwami, tuhukenu muli mutu yono mu jina lia Yesu yoze anambujola Paulu.”

¹⁴ Waze achilingile te ana malunga shimbiali a hako wa lutwe wa Ayuda, Siva.

¹⁵ We mwiku ubi yiukumbulula ngwenyi: “Yesu namunyingika, ni hingunevu hakutwala kuli Paulu, alioze yenu nuli aya?”

¹⁶ Mutu yoze te uli ni mwiku ubi yaatumbukila, yaazeyesa, yaalamba malunga waze eswe. No yaatuhuka mu zuwo nikuchina fuji uselesele ni yilonda ha mijimba.

¹⁷ Akwa Efesu, Ayuda ni waze hi Ayuda ko, yaachivwa, yeevwa woma, yaalemesa jina lia Mwene Yesu.

¹⁸ Atu anji waze afulielele yaashikisa milonga yo, nikusolola ku meso ja atu eswe yize alingile hatangu.

¹⁹ Anji waze te akulinga yuma ya tufutafuta yaaneha mikanda yo, yaayisa ku meso ja atu eswe, yaayocha, yaalula ndando yayo, te makumi atano a tununu a mbongo ja prata.

²⁰ Chenacho maliji a Zambi yaafumana ni tachi kuhiana.

Vunda ku Efesu

²¹ Kulutwe lia yuma yino, Paulu yanyonga kubalika mu chifuchi cha Masedonia ndoo mu chifuchi cha Gresia, ni kuheta ku limbo lia Yerusaleme. Yamba ngwenyi: “Nyi naheta ko, Changutamba kuya nawa kutala limbo lia Roma.”

²² Yatuma aali a kuli yikwashi jenyi ku Masedonia, Timoteu ni Erastu. Alioze iye mwene yasala shimbu limwe mu chifuchi cha Asia.

²³ Ha mwaka uze yikubwa zungo linji mumu ha longeso hakutwala kuli Mwene Yesu.

²⁴ Yikubwa umwe lunga, jina lienyi Demetriu, fuli ya prata. Te kakufula nayo tuponya twa zambi wa pwo, jina lienyi Artemise. Chenacho Demetriu abichishile akwa milimo jenyi ubite unji.

²⁵ Mwenawo yakungulula akwa milimo jenyi, ni waze te alinga nenyi milimo yimuwika. Yaambila ngwenyi: “Akwetu, nunanyingika ngwenu, ubite wetu wakukatuka ku milimo yino.

²⁶ Nunamono ni nunevu ngwo, mutu yono, Paulu, hanakununa atu anji. Kakwamba ngwenyi: ‘Mazambi waze akulinga ni moko ja atu, hi mazambi ko.’ Chino kachilingile ko mu Efesu wika, kwasala hakepe ni mu chifuchi cheswe cha Asia nawa.

²⁷ Chuma chino chili utoji lume, hi kulelesa milimo yetu wika ko, alioze atu keechi kalula nawa zuwo lia zambi yetu munene wa pwo Artemise, ngwe lili Chuma. Chikwo nawa, zambi yetu, yoze akuwayila akwa Asia ni akwa yifuchi yeswe, malela, ni lufuma wenyi munene maabwa wamokomoko.”

²⁸ Ha maliji wano, yeevwa ufwatulo unji, yaakololoka ni liji linene ngwo: “Artemise, zambi ya Efesu, kali munene!”

²⁹ Limbo heswe yilibwa ni Vunda jinji. Mbunga yaakwata Gayu ni Aristarku, akwa Masedonia, waze te akwenda ni Paulu, yaalundumukina ni mbunge yimuwika nikwatwala ku lwaza.

³⁰ Paulu yazanga kunjila mukachi ka mbunga, alioze tumbaji yaamukanda.

³¹ Amwe akwa kuyula a mu chifuchi cha Asia, masepa jenyi, yaamutumina liji ha kumukanjisa, ngwo: “Kanda unjila mu lwaza.”

³² Ha tangwa lize mbunga yaavundumioka. Amwe yaakololoka yiyi, akwo yaakololoka yeka. Anji kaanyingikine ko chikuma chize akungulukile.

³³ Amwe a ku mbunga yaanyonga ngwo, Alexandre mwe waneha Vunda, mumu Ayuda amushinjikile kulutwe. Mwe Alexandre yaaholesa ni kwoko, yazanga kulisambisa ku meso ja mbunga.

³⁴ Alioze muze atu haasa chinyingi ngwo, kali Kayuda, ayo eswe yaakololoka ni liji linene ngwe ha ola jaali ngwo: “Artemise, zambi ya Efesu, kali munene!”

³⁵ Muze mukwa kusoneka wa limbo haholesa mbunga kuluu, yamba ngwenyi: “Yenu malunga ja mu Efesu, atu eswe kaananyingika ngwo, limbo ha Efesu lili kafunga ka zuwo ha zambi Artemise ni kaponya kenyi yoze waholokele mwilu.

³⁶ Yuma yino niumwe malikala yo. Ha chino, chanutamba kulihumikiza, kanda nulipupwisa.

³⁷ Mumu atu wano nwanehanga kuno keeyile ku mu mazuwo ja zambi, hanji kaashililikile ko zambi yetu wa pwo.

³⁸ Kashika, nyi Demetriu ni akwa milimo jenyi chikuma ali nacho cha kusuma mulonga mweswe mutu, alisume. Mumu matangwa a kubatula milonga tuli no, ni tuli nawa ni ngaji.

³⁹ Alioze, nyi chihula chikwo nuli nacho, chanutamba kuchisopa mu mbunga yinene ya ngaji.

⁴⁰ Chamwenemwene utoji tuli nawo, hanji maatusuma mulonga ha Vunda ja musono, kuchina kutuchi kuhasa kulisambisa hakutwala ku chizungo zungo chino.”

⁴¹ Muze te hashika mbunga, Yaamwanga.