Yilinga 17 - Mukanda Wa Zambi 1970

Ku Tesalonika yikubwa Vunda

¹ Muze haabilika mu membo ja Amfipoli ni Apolonia, yaaheta ku limbo lia Tesalonika, kuze te kuli zuwo lia kuwayila lia Ayuda.

² Paulu, nikulita ni ndako yenyi, yanjila mo, yalongesa Mukanda wa Zambi matangwa atatu a kuhwima,

³ yaalumbunwina pundu nikwalweza ngwenyi, Kristu chamutamba kumona lamba ni kuhinduka ku kufwa. Ngwenyi: “Yono Yesu, yoze ngunanwambulwila, mwe Chilamwina yoze Zambi alakenyene.”

⁴ Akwo hakachi ko yaafuliela, yaalichinga ni Paulu ni Sila. Chimuwika nawa, mbunga yinene ya Agresia akwa kuwayila Zambi, ni mapwo anji a lufuma yaafuliela.

⁵ Alioze Ayuda yeevwa ukwa, yaakambila amwe yingulungulu, atu amokomoko, ni kukungulula mbunga. Yaaneha Vunda jinji mu limbo, yaajingilika zuwo lia Jasone nikufupa Paulu ni Sila hanga aakunjike ku mbunga ya akwa limbo.

⁶ Alioze kawanyine ko. Kashika atachekele Jasone ni akwa Kristu akwo ku meso ja akwa kuyula ja limbo nikukololoka ngwo: “Atu wano haavundula yifuchi yeswe ya hashi. Haliabwila heeza nawa kuno.

⁷ Ni Jasone haatambula ku zuwo lienyi. Atu wano kaakulinga chilingila ni Shimbi ja mwanangana wa Aroma. Kaakwamba ngwo: ‘Mwanangana mukwo uliko, jina lienyi Yesu.’ ”

⁸ Maliji wano yaaneha Vunda ku mbunga ni kuli akwa kuyula limbo

⁹ Muze haatambula chifungo kuli Jasone ni kuli akwo, yeecha, yaaya kwo.

Ku Berea

¹⁰ Hazehene ha ufuku, akwa Kristu yaatwala Paulu ni Sila ku limbo lia Berea. Muze haaheta ko, yaanjila mu zuwo lia kuwayila lia Ayuda.

¹¹ Atu wano abemene kuhiana waze a ku Tesalonika, mumu atambwile maliji a Mwene Yesu ni mbunge yimuwika. Tangwa ha tangwa te kaakuhengula mu Mukanda wa Zambi, hanga amone nyi yuma yize analongesa Paulu yinalite,

¹² Ayuda anji yaafuliela. Agresia nawa yaafuliela: mapwo alemu ni malunga.

¹³ Alioze, muze Ayuda a ku Tesalonika heevwa ngwo, Paulu kanambujola maliji a Zambi ku Berea, yeeza nawa kwe kuze ni kubinjisa ni kuvundula mbunga.

¹⁴ Hohene akwa Kristu yaatwala Paulu ndoo ku kalunga lwiji, alioze Sila ni Timoteu yaasala ko.

¹⁵ Waze atwalile Paulu yaamuhetesa ndoo ku limbo lia Atene. Mba yaahiluka ku Berea ni liji lize ashikile Paulu kuli Sila ni Timoteu ngwenyi amuhele nikawashi.

Ku Atene

¹⁶ Muze te Paulu anashimbula mu Atene, yalibikala kuhiana ha kumona mahamba anji mu limbo.

¹⁷ Kashika yaahanjeka mu zuwo lia kuwayila kuli Ayuda ni kuli akwa kuwayila Zambi a ku mavungu akwo. Yalongesa nawa mu yitanda tangwa ha tangwa atu waze te akwiza ko.

¹⁸ Mba amwe a kuli akwa mana jo, Apikuria ni Astoika yaahamika nenyi. Amwe yaahula ngwo: “Mutu yono sakulimbambwila, yika anazange kwamba?” Akwo ngwo: “Kanasoloka ngwe yoze unambujola mazambi ja yilambala.” Yaamba chino, mumu Paulu walongesele yikuma ya Yesu ni uhindukilo ku kufwa.

¹⁹ No yaamwanda, yaamutwala ku meso ja mbunga ya Areopago, yaamuhula ngwo: “Muuhasa kutulongesa longeso lie liaha, nyi?

²⁰ Mumu unatwambulwila yuma yaha, ni tunazange kwivwa ulumbunwiso wayo kanawa.”

²¹ (Atu eswe a mu Atene ni ngeji waze te atwama mo, te keeshi kulinga Chuma chikwo shina kwambujola ni kubanjika sango jaha.)

²² Mba Paulu yamana ku meso ja mbunga ya Areopago nikwamba ngwenyi: “Yenu malunga ja Atene, ha yuma yeswe ngunamono yenu kunwahiana kuwayila mazambi.

²³ Mumu muze nabalikile mu limbo lienu, namwene yilumbilo ya kuwayila chenu. Chisoneko namwene ha chimwe chilumbilo ngwo: ‘Kuli Zambi yoze kutwanyingikine.’ Yoze nwakuwayila nikwalajala, mwe ngunanwambulwila.

²⁴ Zambi yoze watangile mwilu ni hashi ni yuma yeswe yize yilimo, mwe Mwanangana wa mwilu ni hashi, keshi kutwama mu mazuwo a kuwayila a kutunga ni moko ja atu.

²⁵ Chibwe keshi kuhona chimwe Chuma chize atu maahasa kumwaha cho, mumu iye mwene wakuhana mwono, ni mwiku wa mujimba, ni yuma yeswe yikwo kuli atu eswe.

²⁶ Mwenawo watangile mavungu eswe a hashi kuli mutu umuwika. Neye yaamwanga hashi heswe, yaalulikila shimbu kanda, miaka ya kutwama cho ni ngiza ja yifuchi muze maakatwama.

²⁷ Hachilinga, hanga akamufupe, akapapate kama hali iye, akamuwane. Hindu katwamine kwenyi kusuku ni mweswe wa kuli yetu.

²⁸ Mumu, ‘Ku tachi jenyi tuli ni mwono, twakwendangana, chenacho tuli.’ Chili ngwe amwe akwenu, akwa kutomba miaso haanambe ngwo: ‘Ni yetu nawa tuli ana jenyi.’

²⁹ Kashika, mumu tuli ana ja Zambi, hi chibema ko kunyonga ngwetu, Zambi kalifwa ni oru, hanji prata, hanji liwe lia kusonga ni utotombo ni mana ja atu.

³⁰ Zambi keshi kwalula miaka ya kwalajala, alioze haliabwila kakwambila atu eswe a kuma kweswe alumuke ku mbunge.

³¹ Mumu te hanatongola kulu tangwa lize makabatwila akwa hashi ni ululi, kuli lunga yoze hanatongola. Hanahana chinyingi kuli atu eswe ha kumuhindwisa ku kufwa.”

³² Muze heevwa sango ja uhindukilo wa afu, akwo yaamuseha, alioze akwo ngwo: “Mutukakwivwa tangwa likwo nawa.”

³³ Kashika Paulu yatuhuka mukachi ko.

³⁴ Alioze amwe malunga yaalichinga nenyi, yaafuliela. Hakachi ko Dionisiu, wa ku mbunga ya Areopago, ni umwe pwo, jina lienyi Damari, ni amwe akwo.