Yilinga 16 - Mukanda Wa Zambi 1970

Timoteu yaya hamwe ni Paulu ni Sila

¹ Paulu yaheta ku membo ja Derbe ni Listra, yawana ko umwe kambaji, jina lienyi Timoteu, mwana wa umwe pwo Kayuda, mukwa kufuliela, alioze tato Kagresia.

² Akwa Kristu ku Listra ni ku Ikoniu yaamushindakenya ngwo, kali mubema.

³ Paulu yazanga Timoteu kuya hamwe nenyi, yamwanda, mba yamupwisa ngalami. Yachilinga mumu hali Ayuda a ku chifuchi chize, mumu eswe te kaamunyingika ngwo, tato Kagresia.

⁴ Shimbu endanganyine mu membo, yaalongesa akwa Kristu hanga afunge Shimbi jize tunganda ni makulwana abatwile ku Yerusaleme.

⁵ Chenacho Yikungulwila yaalikoleza mu ufulielo, tangwa ha tangwa akwa Kristu yooka kuhiana.

Ku Troa: Paulu yamona Usolwelo

⁶ Shimbu abalikile ndusu mu chifuchi cha Frigia ni cha Galashia, Mwiku wa Linanga yiwakinda kwambujola maliji a Zambi mu chifuchi cha Asia.

⁷ Muze haaheta hehi ni chifuchi cha Misia, yeeseka kuya ku chifuchi cha Bitinia, alioze Mwiku wa Yesu kuwaatayijile ko.

⁸ Mba yaaya ku limbo lia Troa.

⁹ Ha ufuku uzewene Paulu yamona mu Usolwelo umwe lunga wa ku chifuchi cha Masedonia, te kanamana nikumulembela ngwenyi: “Zauka, Wize kama kuno ku Masedonia utukwase.”

¹⁰ Muze Paulu hamona Usolwelo, hazehene yitufupa kuya ku Masedonia, mumu te hitwanyingika ngwetu, Zambi hatutambika kwaambujolela Sango Jibema.

Ku Filipu: Lidia yalumuka ku mbunge

¹¹ Yitunjila mu ulungu ku limbo lia Troa, yituzauka pundu ku tungu lia Samotrasia. Muze hikwacha, yituheta ku limbo lia Napolese.

¹² Ha kukatuka ko yituya ku Filipu, limbo lia mu chifuchi chitangu cha mu Masedonia, te chifuchi chili mu chiyulo cha Aroma. Yitutwama amwe matangwa mu limbo lize.

¹³ Ha tangwa lia kuhwima yiutuhuka mu limbo, yituya ku mbumbulu ya lwiji, kuze twanyongene ngwetu, kuma kuze akulembela Ayuda. Yitutwama nikuhanjika ni mapwo waze te akukunguluka.

¹⁴ Umwe pwo hakachi ko, jina lienyi Lidia, wa ku limbo lia Tiatira, te kakulanjisa mahina alemu achila. Mwenawo mukwa kuwayila Zambi. Mwene yamwazulula mbunge yenyi ha kwivwa kanawa yize ahanjekele Paulu.

¹⁵ Muze te hamupapachisa ni akwa zuwo lienyi, yaliumba kuli yetu ngwenyi: “Nyi nunangumono ngwe ngunafuliela Mwene Yesu chamwenemwene, tweyenu nutwame mu zuwo liami.” Yatushinjila, yiutayiza.

Ku Filipu: Paulu ni Sila mu zuwo lia lamba

¹⁶ Limwe tangwa, shimbu te tunayi kuma kwa kulembela, yitutakana ni umwe mwana pwo yoze wabwile ni mwiku wa kutaha. Te kakubichisa miata jenyi ubite unji ha kutaha chenyi.

¹⁷ Yakaula yetu ni Paulu nikukololoka ngwenyi: “Atu wano e tuvumbi twa Zambi Mukwa Mwilu Wahiana. Kaananwambulwila jila ya ulamwino.”

¹⁸ Chuma chino yachilinga matangwa anji. Mba Paulu yevwa kubihia, yatewuluka, yambila mwiku wa luchisa ngwenyi: “Ngunakwambe mu jina lia Yesu Kristu, ngwami, tuhuka muli mwana pwo yono.” Yiumutuhuka shimbu lizeliene.

¹⁹ Muze miata ja mwe mwana pwo haanyingika ngwo, kuyuka cha ubite wo hichahwa, yaakwata Paulu ni Sila, yaatacheka ndoo ku lwaza wa kusopela,

²⁰ yaaneha ku meso ja akwa kuyula nikwamba ngwo: “Atu wano, Ayuda, kaakubihisa limbo lietu.

²¹ Kaakwambujola ndako jize kujatelele kukaula, chibwe kujifunga, yetu enyaho ku wanangana wa Aroma.”

²² Mbunga yaalundumukina nawa. Akwa kuyula yaatanuna mahina ja Paulu ni Sila, mba yaambila hanga alambe ni fimbo (shikote).

²³ Muze haalamba chikolo, yaasa mu zuwo lia lamba, yaambila kafunga hanga afunge kanawa.

²⁴ Neye, ha kutambula Shimbi yize, yaanjisa mu zuwo lia lamba lia muchima, yasa molu jo mu kuli.

²⁵ Alioze, ngwe ha muchima ufuku, Paulu ni Sila te kaanalembe ni kwimba miaso ya kuchichimieka Zambi. Funge akwo yaabanjika.

²⁶ Susumuku yikubwa minyiko yinene. Fundamentu ja zuwo lia lamba yijinyika, Yajilo yeswe yiyazuluka. Ngoji jo jeswe ja utale yijiliholwokela zekelee.

²⁷ Kafunga ka zuwo lia lamba, ha kulaula, yamona yajilo yawashi, yatomona mukwale hanga alishihe, mumu yanyonga ngwenyi, funge haachina.

²⁸ Alioze Paulu yakololoka ni liji linene ngwenyi: “Kanda ulilinga chibi, mumu yetu eswe muno mutuli!”

²⁹ Kafunga yeta lutemo, yanjila mo fuji, aku machikima nganganga nganganga, yasa makungunwa hashi ku molu ja Paulu ni Sila.

³⁰ Yaaneha haze, yaahula ngwenyi: “Miata, yika Changutamba kulinga hanga angulamwine kama?”

³¹ No ngwo: “Fuliela Mwene Yesu, mba makulamwina, yena ni akwa zuwo lie eswe.”

³² No yaamulongesa maliji a Mwene, hamwe ni akwa zuwo lienyi eswe.

³³ Shimbu lizeliene lia ufuku, yaatambula, yaasanyisa yilonda. Mba hazehene tunganda yaamupapachisa hamwe ni akwa zuwo lienyi eswe.

³⁴ Neye yaakandwisa ku zuwo lienyi, yaaha yakulia, yawahilila kuhiana hamwe ni akwa zuwo lienyi eswe, mumu haafuliela Zambi.

³⁵ Muze hikwacha, akwa kuyula yaatumina tujita ni liji ngwo: “Tusula atu waze.”

³⁶ Kafunga yambulula maliji waze kuli Paulu ngwenyi: “Akwa kuyula haatuma liji ngwo, anukasulule. Haliabwila yeenu kwenu ni uhwimino.”

³⁷ Alioze Paulu yakumbulula tujita ngwenyi: “Haatulamba ku meso ja atu eswe, kaatusopesele ko chibwe tuli enyaho ku wanangana wa Aroma. Haatunjisa mu zuwo lia lamba. Haliabwila atutuhwise ku tenga, nyi? Ka! Eze ayo ene atutusule.”

³⁸ Mba yaatwala maliji wano kuli akwa kuyula. No yeevwa woma ha kwivwa ngwo: “tuli enyaho mu wanangana wa Aroma,”

³⁹ yeeza yeeta ukonekeno. Mba yaatuhwisa haze nikwalembela akatuke mu limbo.

⁴⁰ Tunganda yaatuhuka mu zuwo lia lamba, yaaya mu zuwo lia Lidia. Kwe kuze yaawana akwa Kristu, yaatakamisa, mba yaaya kwo.