Yilinga 15 - Mukanda Wa Zambi 1970

Makulwana ja Chikungulwila yaatwama punga ku Yerusaleme

¹ Amwe malunga yaakatuka ku Yudea, yaaheta ku Antiokia, yaalongesa akwa Kristu ngwo: “Kunwahashile kulilamwina shina munwononokena Shimbi ja Mose ha kunupwisa ngalami.”

² Paulu ni Barnaba yaalihangulula no chikolo hakutwala ku chikuma chize. Kashika Chikungulwila yaatongola Paulu ni Barnaba ni atu akwo hakachi ko ha kuya ku Yerusaleme kuli tunganda twa Yesu ni makulwana mumu ha chikuma chize.

³ Chikungulwila yaashinjikila mu jila. No yaabalika ndusu mu chifuchi cha Fenishia ni cha Samaria. Muze te anabalika yaambujola ngwe chize waze hi Ayuda ko haanatewulukila kuli Zambi. Yuma yize yiiwahisa akwa Kristu kuhiana.

⁴ Muze Paulu ni Barnaba haaheta ku Yerusaleme, akwa Kristu, ni tunganda twa Yesu, ni makulwana yaasambilila. Paulu ni Barnaba yaambulula yuma yeswe yize Zambi alingile no.

⁵ Alioze yakukatuka amwe a ku mbunga ya Afariseu, waze te haanafuliela Kristu, yaamba ngwo: “Waze hi Ayuda ko, chatamba kwapwisa ngalami, ni kwaambila ononokene Shimbi ja Mose.”

⁶ Mba tunganda twa Yesu ni makulwana yaakunguluka ni kusopa chikuma chize.

⁷ Muze haalihamika shimbu lisuku, Petulu yakatuka, yaamba ngwenyi: “Akwetu, nunanyingika kanawa ngwenu, hasuku Zambi hanangutongola mukachi kenu, hanga waze hi Ayuda ko akevwe Sango Jibema kuli yami, akajifuliele.

⁸ Ni Zambi, yoze wanyingika mbunge ja atu, hanaahe shindakenyo ha kwaha Mwiku wa Linanga chizechene ngwe yetu.

⁹ Kulisa chakuhi hakachi ko ni yetu. Zambi hanatomesa mbunge jo mumu haanafuliela.

¹⁰ Kuchi nuneseka Zambi ni kuzanga kusa yiteli hali tumbaji yize chibwe akaka jetu ni yetu kutwahashile kuyimbata?

¹¹ Alioze tunafuliela ngwetu, hanatulamwina ku utu wa Mwene Yesu, ni ayo nawa chizechene.”

¹² Chizavu cheswe yaahola kuluu, ha kubanjika Paulu ni Barnaba ni kulumbununa yipupu ni yilayi yize Zambi halinga ni moko jo hakachi ka waze hi Ayuda ko.

¹³ Muze haalitwamina kuhanjika, Tiangu (Jake) yakumbulula ngwenyi: “Akwetu ngwivwenu.

¹⁴ Simone hatunyingikisa ngwe chize hatangu Zambi hewuluka waze hi Ayuda ko, ni kutongola hakachi ko atu waze maabwa nienyi.

¹⁵ Maliji a Zambi kuli akwa munanyi kaanalite ni maliji wano, ngwe hichinasonewa mu Mukanda wa Zambi. Ngwo:

¹⁶ ‘Muze yuma yino hiyabalika, mungukeza nawa, mungutungulula zuwo lia David lize liabuzukile. Mungukatungulula yikulu yalio ni kumika lie zuwo

¹⁷ hanga atu eswe akafupe Mwene Zambi, ni hanga mavungu eswe waze natambikile akabwe ni ami.

¹⁸ Chenacho anambe Mwene, yoze wanyingikishine yuma yino ku shakulu.’ ”

¹⁹ Tiangu (Jake) yaweza ngwenyi: “Kashika, ngunanyongo ngwami, kuchalitele kusa yilemu hali mavungu akwo waze haatewulukila kuli Zambi.

²⁰ Alioze twasonekenenu ngwetu: ‘Kanda nulia yifwo yize akukombelela ku mahamba, ni tushitu a kuhonda, ni manyinga: kanda nulinga utanji.

²¹ Mumu, chize ku miaka yikulu, atu kaakwambujola Shimbi ja Mose mu limbo ni limbo, kaakujitanga mu mazuwo ja kuwayila mu matangwa a kuhwima.’ ”

Kumbululo lia Chikungulwila ku Yerusaleme

²² Hohene yichibemena tunganda twa Yesu, ni makulwana, hamwe ni Chikungulwila cheswe kutongola amwe hakachi ko ni kwatuma ku limbo lia Antiokia hamwe ni Paulu ni Barnaba. Yaatongola Yudase, jina lienyi likwo Barsaba, ni Sila, akwa lufuma hakachi ka akwa Kristu.

²³ Tunganda yaaha mukanda uno ha kutuma ko. Ngwo: “Yetu tunganda twa Yesu ni makulwana, usoko wenu mu ufulielo, tunanumeneka yenu akwetu hi Ayuda ko nwatwama mu limbo lia Antiokia, ni mu chifuchi cha Siria, ni cha Silisia.

²⁴ Hitunevu ngwo, amwe hanakatuka kuli yetu ni kunubinjisa nikunubikalisa ni maliji jo. Yetu kwetu kutwaahele Shimbi niyimwe ha chikuma chino.

²⁵ Kashika tunakalikungulula ni nyonga limuwika ha kutongola malunga amwe akunutumina hamwe ni akwetu Barnaba ni Paulu

²⁶ Barnaba ni Paulu haanakunjika mwono wo, chibwe ndoo ku kufwa, mumu ha jina lia Mwene wetu Yesu Kristu.

²⁷ Tunanutumina Yudase ni Sila. Enoo maakanwambulwila yuma yize hitwanusonekena.

²⁸ Mumu hichabemena Mwiku wa Linanga ni yetu hi kunutwika ko yilemu yahiana yize kuyalitele, shina yize yinalite.

²⁹ Ngwetu, kanda nulia yifwo yize akukombelela ku mahamba, chibwe manyinga, hanji yifwo ya tushitu a kuhonda, ni kanda nulinga utanji. Nyi nwalifunga ku yuma yino, mba munulinga kanawa. Mwoyo wenu.”

³⁰ Kashika, muze akwa lutwe haashika, atu waze yaaya ku Antiokia. Kwenako yaakungulula mbunga yeswe ya akwa kufuliela, yaaha mukanda.

³¹ Ha kuutanga, yaawahilila, mumu mukanda uze yiwatakamisa.

³² Yudase ni Sila ayo ene te kaali akwa munanyi a Zambi. Yaashinjila akwa Kristu ni maliji anji ha kwatakamisa ni kwakolesa.

³³ Muze haatwama ko kashimbu, yaalishika ni akwa Kristu, yaahiluka ni sambukila kuli waze aatumine. [

³⁴ Alioze chabemenene Sila kutwama ko.]

³⁵ Paulu ni Barnaba yaasala matangwa anji ku limbo lia Antiokia. Yaalongesa, yaambujola maliji a Mwene Yesu, hamwe ni akwo anji.

Paulu ni Barnaba yaalihandununa

³⁶ Muze matangwa amwe haabalika, Paulu yambila Barnaba ngwenyi: “Tuhiluke nawa ku membo nikutala akwetu kuze twambujolele maliji a Mwene Yesu, hanga tukanyingike chize anatwama.”

³⁷ Barnaba yazanga Yoano, jina lienyi likwo Marku, akaye hamwe no.

³⁸ Alioze Paulu yanyonga ngwenyi, hi chibema ko kuya ni yoze kayile ko ku milimo, yoze waahichikile ku limbo lia Pamfilia.

³⁹ Yaalihamika kuhiana, kashika yaalihandununa. Barnaba yaya ni Marku, yaanjila mu ulungu, yaazauka ku tungu lia Shipre.

⁴⁰ Alioze Paulu yatongola Sila. Akwa Kristu yaakunjika ku utu wa Zambi, mba yaaya mu jila.

⁴¹ Yeendangana ndusu mu chifuchi cha Siria ni cha Silisia nikutakamisa Yikungulwila.