Yilinga 14 - Mukanda Wa Zambi 1970

Paulu ni Barnaba ku Ikoniu

¹ Chizechene nawa ku limbo lia Ikoniu. Paulu ni Barnaba yanjila mu zuwo lia kuwayila lia Ayuda. Mumu ha kulongesa cho, chizavu chinene cha Ayuda ni Agresia yaafuliela.

² Alioze Ayuda akwo, waze kaafulielele ko, yaavundula waze hi Ayuda ko nikwalumbula hakutwala kuli akwa kufuliela.

³ Paulu ni Barnaba yaatwama ko shimbu lisuku, yaalongesa ni hamu hakutwala kuli Mwene Yesu. Mwenawo yashindakenya maliji jo hakutwala ku utu wenyi ni kwaha tachi ja kulinga yilayi ni yipupu.

⁴ Alioze chizavu cha mu limbo yaalihandununa, amwe yaabwa hamwe ni Ayuda, akwo hamwe ni tunganda twa Yesu.

⁵ Mba Ayuda ni waze hi Ayuda ko, hamwe ni akwa lutwe jo, yaanyonga kumwesa Paulu ni Barnaba lamba, ni kwashiha ni mawe.

⁶ Alioze, muze tunganda haachivwa, yaachinyina ku Listra ni Derbe, membo a mu chifuchi cha Likaonia, ni ku yifuchi yakusulangana.

⁷ Kwenako yaambujola Sango Jibema.

Paulu ni Barnaba ku Listra

⁸ Ku limbo lia Listra umwe lunga te watwama ko, Chilema chize ku kusemuka chenyi, kendele ko nilimwe tangwa.

⁹ Yabanjika yize ahanjekele Paulu. Mwenawo yamuhulikila meso nee. Paulu yamumona ngwe kali ni ufulielo wa kubwa mungunu,

¹⁰ yamwamba ni liji linene ngwenyi: “Katuka, umane!” Mwe mutu yatumbuka, yabutuka kwenda.

¹¹ Ha kumona yize Paulu halinga, mbunga yaakololoka mu liji lia Likaonia ngwo: “Mazambi haahulumuka kuli yetu nikulifwa cha atu!”

¹² No yaaluka Barnaba ngwo, Zeuse ni Paulu ngwo, Herme, mumu te mwe mukwa lutwe ha kuhanjika.

¹³ Haze lia limbo yihabwa limwe zuwo lia kuwayila zambi yo, Zeuse. Hako wa zuwo lize yaneha ku yikolo makuji a ngombe akuhenyesa ni yitemo. Hamwe ni mbunga, yazanga kwalambula mulambu kuli tunganda.

¹⁴ Alioze muze Barnaba ni Paulu haachivwa, yaatanuna mahina jo, yaazomboka kuli atu nikukololoka ngwo:

¹⁵ “Yenu malunga, yika nunalingila Chuma chino? Tuli lume atu ngwe yenu. Tunanwambulwila Sango Jibema, ngwetu, mbilenu yuma yino yamokomoko, nutewulukile kuli Zambi ya mwono, yoze watangile lilu ni hashi, ni kalunga lwiji, ni yeswe yize yilimo.

¹⁶ Ha miaka ya kunyima, Zambi yatayiza mavungu kukaula jila jo ene,

¹⁷ hindu yalisolola matangwa eswe ha yiwape yize akulinga. Kakunokesa vula kwilu, kakunwaha yilimalima ku yanga yayo, kakunwaha yakulia, kakuwahisa mbunge jenu.”

¹⁸ Chibwe tunganda haamba maliji wano, hindu yichibwa chikalu kukinda atu kwalambula mulambu.

¹⁹ Alioze yikwiza Ayuda a ku Antiokia mu chifuchi cha Pisidia ni a ku limbo lia Ikoniu, yaalumbula mbunga. No yaamwasa Paulu mawe, yaamukokela haze lia limbo nikunyonga ngwo, hafwa.

²⁰ Alioze muze tumbaji haamukunguluka, Paulu yakatuka, yanjila mu limbo. Muze hikwacha, yaya ni Barnaba ku limbo lia Derbe.

Paulu ni Barnaba yaahiluka ku Antiokia mu chifuchi cha Siria

²¹ Kwenako Paulu ni Barnaba yaambujola Sango Jibema. Atu anji yaatayiza kubwa tumbaji. Mba e tunganda yaahiluka ku Listra, ni ku Ikoniu, ni ku Antiokia mu chifuchi cha Pisidia,

²² yaakolesa tumbaji, yaatakamisa amane nguu mu ufulielo, yaamba ngwo: “Chatutamba kunjila mu Wanangana wa Zambi ni lamba linji.”

²³ Mu Chikungulwila ni Chikungulwila yaatongola makulwana. Ha kulemba ni kulitwamina kulia, yaakunjika makulwana waze kuli Mwene Yesu yoze haafuliela.

²⁴ Muze haabalika ndusu mu chifuchi cha Pisidia, tunganda yaaheta mu chifuchi cha Pamfilia,

²⁵ yaambujola maliji a Zambi mu limbo lia Perga, mba yaapalumuka ku limbo lia Atalia.

²⁶ Muze haakatuka ko, yaanjila mu ulungu, yazauka aye ku limbo lia Antiokia. Kwenako makulwana ja Chikungulwila akunjikile Paulu ni Barnaba ku utu wa Zambi, ni ku milimo yize te haamanununa.

²⁷ Muze haaheta ko, yaakungulula akwa Chikungulwila eswe, yaalumbunwina yeswe yize Zambi alingile no, ni ngwe chize hanazulwila waze hi Ayuda ko chajilo, hanga no afuliele.

²⁸ No yaatwama ko shimbu lisuku hamwe ni tumbaji.