Yilinga 13 - Mukanda Wa Zambi 1970

Mwiku wa Linanga yiutongola Saulu ni Barnaba

¹ Mu Chikungulwila cha Antiokia, akwa munanyi a Zambi ni alongeshi te atwama mo: Barnaba, ni Simone (yoze te akuvuluka ngwo, mutu mulaa), ni Lusiu (Kasirene) ni Manaene (yoze alelele hamwe ni mukwa kuyula Herode), ni Saulu.

² Limwe tangwa, shimbu te anawayila Mwene ni kulitwamina kulia, Mwiku wa Linanga yiwamba ngwenyi: “Nguselenu Barnaba ni Saulu ku milimo yize naatambikilile.”

³ Muze te haalitwamina kulia ni haalemba, yaasa moko, yeecha akaye.

Barnaba ni Saulu yaambujola ha tungu lia Shipre

⁴ Mwiku wa Linanga yiutuma Barnaba ni Saulu. No yaaya ku limbo lia Selusia. Kwe kuze azaukile mu ulungu ndoo ku tungu lia Shipre.

⁵ Muze haaheta mu limbo lia Salamina, yaambujola maliji a Zambi mu mazuwo a kuwayila a Ayuda. Yoano te chikwashi cho.

⁶ Yaabalika mu tungu lieswe ndoo ku limbo lia Pafo Yaawana mo umwe lunga, Kayuda, jina lienyi Bar-Yesu, mukwa munanyi wa mahuza te mukwa kulinga tufutafuta.

⁷ Te kali hamwe ni mukwa kuyula Sergiu Paulu, mukwa malinjekela. Mwe mukwa kuyula yatambika Barnaba ni Saulu, mumu yazanga kwivwa maliji a Zambi.

⁸ Alioze mukwa kulinga tufutafuta, Elima (lie jina lienyi mu greke), yamanangana no, yazanga kukwika mukwa kuyula ku ufulielo.

⁹ Alioze Saulu, jina lienyi likwo Paulu, ni kuzala ni Mwiku wa Linanga, yamuhulikila meso,

¹⁰ yamba ngwenyi: “Ayena mwana wa Sakwonga, mukwa kole wa ululi weswe, uli ni mahuza eka ni eka. Kuusolo kulitwamina nichimwe kubinjisa jila ja ululi ja Mwene Yesu, nyi?

¹¹ Tala, haliabwila kwoko lia Mwene lili hali yena. Kumuubwa kapuputa, kuuchi kamona pangu lia mwalwa ha shimbu, ndoo tangwa lize Zambi makazanga.” Hohene mbundu ni milima yimufuka meso. Neye yafupa mutu wa kumukwata ku kwoko.

¹² Ha kuchiimona, mukwa kuyula yafuliela, yalishikishila ha longeso Hakutwala kuli Mwene Yesu.

Paulu ni Barnaba ku Antiokia mu chifuchi cha Pisidia

¹³ Paulu ni waze endele nenyi yaakatuka ku Pafo, yaazauka mu ulungu, yaaheta ku limbo lia Perga mu chifuchi cha Pamfilia. Alioze Yoano Marku yeehuka, yahiluka ku Yerusaleme.

¹⁴ No yaakatuka ku Perga, yaaheta ku limbo lia Antiokia mu chifuchi cha Pisidia. Ha tangwa lia kuhwima yaanjila mu zuwo lia kuwayila lia Ayuda, yaatwama tumbaa.

¹⁵ Muze te haatanga mikanda ya Shimbi ni ya akwa munanyi ja Zambi, akwa lutwe ja zuwo lia kuwayila yaatumina liji ngwo: “Akwetu, nyi nuli ni maliji a kutakamisa no atu, ahanjikenu.”

¹⁶ Petulu yakatuka, yalahula ni kwoko, yamba ngwenyi: “Akwetu Aisraele, ni yenu akwo waze nwakuwayila Zambi, banjikenu!

¹⁷ Zambi ya atu wano, Aisraele, yatongola tushakulu twetu muze te ali mu Egiptu, yaapwisa anene anene, yaatuhwisa mu chifuchi chize ni kwoko lienyi lia ndundo,

¹⁸ yalihumikiza no ngwe miaka makumi awana mu puya,

¹⁹ yonona mavungu shimbiali mu chifuchi cha Kanana, yakunjika chifuchi cho kuli atu jenyi ngwe chihinga,

²⁰ ha shimbu ngwe miaka kulakaji jiwana ni makumi atano. “Hohene, yaaha ngaji ndoo ku miaka ya Samuele, mukwa munanyi wa Zambi.

²¹ Mba Aisraele yeeta mwanangana. Zambi yaaha Saulu, mwana wa Kishi, wa ku vungu lia Benjamine. Mwenawo waayulile miaka makumi awana.

²² Muze te Zambi hamuchiza mu wanangana, yaaha David ha kubwa mwanangana wo. Zambi yashindakenya hakutwala kuli David ngwenyi: ‘Hinamona David, mwana wa Jese, mutu yoze unalite ni manyonga jami. Mwenawo makamanununa kulinga yeswe yize ngunazange.’

²³ Ku vungu lize lia mwanangana David, Zambi yasa Yesu ha kubwa Chilamwina cha Aisraele ngwe chize alakenyene.

²⁴ Muze te Yesu kanda achiza, Yoano yalongesa atu ngwenyi: ‘Alumukenu ku mbunge, anupapachise.’

²⁵ Shimbu Yoano machimanununa milimo yenyi, yahula atu ngwenyi: ‘Nunanyongo ngwenu, yami iya? Hi nguli ko yoze nwakunyongena. Yami chatelele kujitula sapato ja yoze meza kulutwe liami.’

²⁶ “Akwetu, ana ja Abrahama, Zambi hanatumu sango jino ja ulamwino kuli yetu, ni kuli yenu waze nwakuwayila Zambi hamwe ni Ayuda.

²⁷ Mumu chibwe akwa Yerusaleme ni akwa lutwe jo kaanyingikine ko Yesu ni maliji ja akwa munanyi a Zambi, waze atu akutanga ha tangwa lieswe lia kuhwima. Hindu muze ahishile Yesu, yaamanununa maliji ja akwa munanyi a Zambi.

²⁸ Chibwe kamwene ko chitela cha kumushihila, hindu yeeta kuli Pilatu hanga akamushihe.

²⁹ Muze te haamanununa yeswe yize yasonewene hali iye, yaamusunwisa ha kulusu, yaamusa mu fuka.

³⁰ Alioze Zambi yamuhindwisa ku kufwa.

³¹ Yesu yalisolola matangwa anji ku meso ja waze te akwenda nenyi, chize ku Galilea ndoo ku Yerusaleme. Enoo e yela jenyi kuli Aisraele.

³² Mba yetu tunanwambulwila Sango jino Jibema, jize Zambi alakenyene tushakulu twetu.

³³ Haliabwila Zambi hajimanununa kuli yetu muze hahindwisa Yesu ku kufwa, ngwe hichinasonewa mu Mwaso (Samu) wa muchaali ngwo: ‘Yena uli Mwanami. Hinakusema musono uno.’

³⁴ Zambi yanyingikisa chize makamuhindwisa ku kufwa, ni chize kechi kubola, ni maliji wano ngwenyi: ‘Mungukakuwahisa ni yiwape ya kulinanga ni ya shindakenyo yize nalakenyene David.’

³⁵ Kanambe nawa mu Chisoneko chikwo ngwenyi: ‘Kuuchi katayiza munangi we kubola.’

³⁶ David yalinga milimo ya Zambi ku mwaka wenyi, yafwa, no yamufunda hakamwihi ni tushakulu twenyi, neye yabola.

³⁷ Alioze yoze ahindwishile Zambi kabolele ko.

^38-39 Akwetu, chinyingikenu ngwenu, mumu ha yize alingile Yesu, tunanwambulwila ukonekeno wa milonga. Mweswawo mafuliela matusuka ku shili yeswe ku yize Shimbi ja Mose kujahashile kunutusula.

⁴⁰ Kanyamenu kashika, kuchina chize ahanjikile akwa munanyi ja Zambi kanda chikeza hali yenu ngwo:

⁴¹ ‘Talenu akwa kaleleso, lishimwokenu, fwenu! Mumu mungulinga milimo ha matangwa jenu yize kunuchi kufuliela, chibwe muze manwambulwila yo.’ ”

⁴² Muze Paulu ni Barnaba haatuhuka mu zuwo lia kuwayila, akwa limbo yaaliumba kuli ayo hanga akahanjike nawa chikuma chizechene ha tangwa lia kuhwima lia kulutwe.

⁴³ Muze te waze ali mu zuwo lia kuwayila haamwangana, atu anji, Ayuda ni akwa kufuliela a ku mavungu akwo, yaakaula Paulu ni Barnaba. No yaashinjila amane nguu mu utu wa Zambi.

⁴⁴ Ha tangwa likwo lia kuhwima hakamwihi ni atu eswe a mu limbo yaalikungulula ni kwivwa maliji a Mwene Yesu kuli Paulu ni Barnaba.

⁴⁵ Ha kumona mbunga yize, Ayuda yeevwila ukwa unji, yaahangulula Paulu, yaamushililika.

⁴⁶ Alioze Paulu ni Barnaba yaahanjika no ni hamu ngwo: “Chinalite kuhanjika maliji a Zambi kuli yenu hatangu. Alioze, mumu nunalituno ni nunabatula ngwenu, kunwatelele mwono wa miaka yeswe, haliabwila tunatewulukila kuli waze hi Ayuda ko.

⁴⁷ Mumu Chenacho Zambi atuhele Shimbi ngwenyi: ‘Hingunakusa pangu lia mavungu ha kutwala ulamwino ndoo ku songo lia hashi.’ ”

⁴⁸ Muze waze hi Ayuda ko haachivwa, yaawahilila, yaachichimieka Zambi; ni eswe waze Zambi hanatongola kubwa ni mwono wa miaka yeswe, yaafuliela.

⁴⁹ Maliji a Mwene Yesu yaafumana ndusu mu chifuchi chize cheswe.

⁵⁰ Alioze Ayuda yaavundula mapwo pichi waze te akuwayila hamwe no, ni atu ja lufuma mu limbo. No yaahungumiona Paulu ni Barnaba, yaahanga mu chifuchi cho.

⁵¹ Mba Paulu ni Barnaba yaakukumuna fufuta ya ku molu jo, yaaya ku limbo lia Ikoniu.

⁵² Alioze tumbaji a ku Antiokia yaawahilila kuhiana, yaazala ni Mwiku wa Linanga.