Yilinga 12 - Mukanda Wa Zambi 1970

Herode yashiha Tiangu (Jake), yanjisa Petulu mu zuwo lia lamba

¹ Ha mwaka uze, mwanangana Herode yakwata amwe a mu Chikungulwila nikwamwesa lamba.

² Yashiha Tiangu (Jake), yayo ya Yoano, ni mukwale.

³ Ha kumona ngwenyi, chinawahisa Ayuda, yakwata nawa Petulu. (Chino chabwile ha matangwa a chiwanyino cha Mbolo Yize Kuyishi Yitumbo.)

⁴ Muze te hakwata Petulu, yamusa mu zuwo lia lamba, yamukunjika ku mbunga jiwana ja tujita awana awana. Herode yazanga kumutuhwisa ku meso ja Ayuda ha kumanyisa cha chiwanyino cha kwiwuluka Kubalika.

⁵ Chenacho afungile Petulu mu zuwo lia lamba, alioze akwa Chikungulwila yaamulembela Zambi chikolo.

Kanganda ka mwilu yatuhwisa Petulu mu zuwo lia lamba

⁶ Ha ufuku uzewene, muze Herode hazanga kumutuhwisa kuli atu, Petulu te mu tulo ali mukachi ka tujita aali, wakukasa ni ngoji ja utale jaali. Ku chikolo tufunga te anafungu zuwo lia lamba.

⁷ Susumuku kanganda ka mwilu yasoloka, pangu yilipanguka mu zuwo lia lamba. Kanganda yalamba Petulu mu pachi hakepe, yamulawisa ngwenyi: “Katuka nikawashi.” Ngoji yijikasuluka ku moko.

⁸ Kanganda yamwamba ngwenyi: “Lijichike muya we ni sapato je.” Petulu yachilinga. Mba kanganda yamwamba ngwenyi: “Zala chikuto che, ungukaule.”

⁹ Petulu yakaula kanganda ka mwilu, yatuhuka haze. Alioze kanyongene ngwenyi, chize alinga kanganda ka mwilu chili chamwenemwene, yanyonga ngwenyi, Usolwelo anamono.

¹⁰ Yaahiana tufunga atangu, ni a muchaali, mba yaaheta ku chikolo cha utale chize chatala mu limbo. Yichiliazulukila ku meso jo. No yaatuhuka, yaahiana mukala umuwika, mba susumuku kanganda yamuhichika.

¹¹ Hohene Petulu yalinyingika, yamba ngwenyi: “Haliabwila, hinanyingika chamwenemwene ngwami, Mwene hatuma kanganda kenyi ka mwilu, ni hangupulula ku moko ja Herode ni ku yuma yeswe yize Ayuda ambile kungulinga.”

¹² Muze halinyingika pundu, yaya ku zuwo lia Maria, naye ya Yoano, jina lienyi likwo Marku. Kwenako atu anji te akukunguluka nikulemba.

¹³ Petulu yangongwela ku chikolo cha haze. Umwe mwana pwo, kavumbi, jina lienyi Roda, yakundama ha kwazulula.

¹⁴ Ha kunyingika liji lia Petulu, yevwa chiseke chinji. Kazulwile ko, alioze yazomboka fuji mu zuwo nikwamba ngwenyi: “Yanwaa! Petulu kanamana ku chikolo.”

¹⁵ No ngwo: “Unazaluka!” Alioze iye yashindakenya ngwenyi: “Chamwenemwene mala!” Ayo ngwo: “Kali kanganda kenyi ka mwilu!”

¹⁶ Alioze Petulu yanyongonona nikungongwela. No yaazulula chajilo, yaamumona, yaalishimwoka.

¹⁷ Petulu yaaholesa ni kwoko, yaalumbunwina ngwe chize Mwene wamutuhwishile mu zuwo lia lamba. Yamba nawa ngwenyi: “Chambulwilenu Tiangu (Jake) ni akwetu akwo.” Mba yakatuka, yaya kweka.

¹⁸ Muze hikwacha, yikubwa zungo linji hakachi ka tujita, yaalihula chize chabwile hali Petulu.

¹⁹ Herode yahana Shimbi hanga amufupe, alioze kaamuwanyine ko. Kashika yasopesa tufunga twa zuwo lia lamba, yahana Shimbi aashihe. Mba Herode yakatuka mu chifuchi cha Yudea, yaya ku limbo lia Sesarea nikutwama ko.

Kufwa cha Herode

²⁰ Herode yevwila akwa Tiru ni akwa Sidone ufwatulo. Kashika e atu yeeza kuli iye mu mbunga. Hatangu yaalembejeka Blastu, mukwa lutwe wa zuwo lia mwanangana Herode. Mba yaaheta kuli Herode nikwita uwanyino, mumu chifuchi cho te kaakuchihoka ku chifuchi cha mwanangana Herode.

²¹ Ha tangwa lize atongwele, Herode yazala mahina jenyi a wanangana, yatwama ha chitwamo cha wanangana, yalongesa atu.

²² No yaakololoka ngwo: “Ali liji lia zambi umwe, hi lia mutu ko!”

²³ Ha shimbu lizeliene, kanganda ka mwilu yamulamba, mumu kalemesene ko Zambi. Mavuno yamulia, yafwa kwenyi.

²⁴ Alioze maliji a Zambi yaafumana, ni akwa Kristu yooka.

²⁵ Muze Barnaba ni Saulu haamanununa milimo yo mu Yerusaleme, yaahiluka ku Antiokia nikutwala hamwe no Yoano, jina lienyi likwo Marku.