Yilinga 11 - Mukanda Wa Zambi 1970

Ulumbunwiso wa Petulu ku Chikungulwila cha Yerusaleme

¹ Tunganda twa Yesu ni akwa kufuliela a mu Yerusaleme yeevwa ngwo, waze hi Ayuda ko nawa haatambula liji lia Zambi.

² Muze Petulu haheta mu Yerusaleme, Ayuda akwa kufuliela waze azangile ngwo, yilambala apwise ngalami, yaamuhamikisa ngwo:

³ “Yena wanjilile mu zuwo lia waze hi Ayuda ko, waze kanda achibwa ngalami, yiwulia hamwe no.”

⁴ Mba Petulu yaalumbunwina yikuma yeswe chize ku kabutu ndoo ku songo.

⁵ Ngwenyi: “Nalembele mu limbo lia Jope. Yingubwa ngwe mu tulo mba yingumona Usolwelo. Chimwe Chuma ngwe hina linene liakukasa ku mbango jiwana yichihulumuka, yichiza ndoo kuli yami.

⁶ Yinguchihulikila meso, mba yingumona tushitu eka ni eka: ngongo, ni tututu, ni tujila.

⁷ Mba yingwivwa liji ngwo: ‘Petulu, katuka kwe, shiha, ulie.’

⁸ Alioze ngwami: ‘Ka, Mwene! Nilimwe tangwa Chuma chibi hanji cha chijila kanda chinjila kama mu kanwa liami.’

⁹ Yingwivwa nawa liji mwilu ngwo: ‘Chuma, nyi Zambi hanachibemesa, kanda uchivuluka ngwe, cha chijila.’

¹⁰ Chino yichibwa yisuho yitatu, mba cheswe yichihiluka nawa mwilu.

¹¹ Ha shimbu lizeliene, malunga atatu, waze angutuminyine ku Sesarea, yaaheta ku zuwo lize te natwama.

¹² Mwiku wa Linanga yiungwamba hanga nguye no, kuyambashana ka. Akwetu wano asambano yeeza hamwe ni yami ku Sesarea. Yetu eswe yitunjila mu zuwo lia Korneliu.

¹³ Neye yatulumbunwina ngwe chize amwene kanganda ka mwilu mu zuwo lienyi, te kanamana nikwamba ngwenyi: ‘Tuma atu ku Jope akusakile Simone, jina lienyi likwo Petulu.

¹⁴ Maliji waze makakwambulwila, maakakulamwina yena ni akwa zuwo lie eswe.’

¹⁵ Shimbu lize nabutukile kuhanjika, Mwiku wa Linanga yiwahulumukina, ngwe chize watuhulumukinyine yetu hatangu.

¹⁶ Mba yingwiwuluka liji lize ambile Mwene Yesu ngwenyi. ‘Yoano wapapachishile ni meya, alioze yenu makanupapachisa ni Mwiku wa Linanga.’

¹⁷ Nyi Zambi hanaahe chawana chimuwika ngwe chize atuhele yetu muze twafulielele Mwene Yesu Kristu, mba yami nguli iya te munguhasa kukinda Zambi?”

¹⁸ Muze heevwa maliji wano, kaahamikine ko nawa. Yaachichimieka Zambi nikwamba ngwo: “Chamwenemwene Zambi hahana nawa kuli waze hi Ayuda ko kwalumuka cha mbunge hanga abwe ni mwono.”

Chikungulwila cha mu limbo lia Antiokia

¹⁹ Lamba lize liakawile kushiha cha Estevau (Etienne) yilimwanga akwa k ufuliela mwamwaa. Akwo yaaya ndoo ku chifuchi cha Fenishia, ni ku tungu lia Shipre, ni ku limbo lia Antiokia. Kaambile ko maliji a Zambi kuli niumwe shina kuli Ayuda wika.

²⁰ Alioze hakachi ko habwile malunga akwo a ku tungu lia Shipre ni ku limbo lia Sirene, muze haaheta ku Antiokia, yambujola nawa kuli mavungu akwo, yaanyingikisa Sango Jibema ja Mwene Yesu.

²¹ Ndundo ja Mwene jabwile hamwe no, ni atu anji yaafuliela, yaatewuluka kuli Mwene.

²² Sango jino jahetele ku Chikungulwila cha Yerusaleme, mba yaatuma Barnaba ku Antiokia.

²³ Muze haheta ko, yamona chize Zambi awahishile akwa kufuliela. Neye yawahilila, yaatakamisa eswe ha kulalaminya Mwene Yesu ni mbunge yeswe.

²⁴ Barnaba te mutu mubema ni ufulielo unji, yazala ni Mwiku wa Linanga. Mbunga yinene yaafuliela nikutewuluka kuli Mwene.

²⁵ Hohene Barnaba yaya ku limbo lia Tarsu nikufupa Saulu.

²⁶ Muze hamumona, yamutwala ku Antiokia. Mwaka wa muundu yaakunguluka hamwe ni akwa Chikungulwila, yaalongesa mbunga yinene. Ku Antiokia, kwenako aliangile kuluka tumbaji ngwo, akwa Kristu.

²⁷ Ha matangwa waze, amwe akwa munanyi a Zambi yaatuhuka mu Yerusaleme, yaaya ku Antiokia.

²⁸ Umwe hakachi ko, Agabu, yakatuka, yalweza ku tachi ja Mwiku wa Linanga ngwenyi: “Zala yinji muyikabwa hashi heswe.” (Zala yize yejile ha mwaka wa mwanangana wa Aroma, Klaudiu.)

²⁹ Tumbaji yaalitesa ngwo, mutu ni mutu ahane nikulita ni kuhasa chenyi, ha kutumina akwa kufuliela waze atwama mu Yudea akalikwase najo.

³⁰ Yaachilinga, yaatuma mbongo kuli makulwana ku moko ja Barnaba ni Saulu.