Yilinga 10 - Mukanda Wa Zambi 1970

Petulu ni Korneliu

¹ Yikubwa umwe lunga mu limbo lia Sesarea, jina lienyi Korneliu, mwata wa mbunga ya tujita yize anayivuluka ngwo: “Mbunga ya Italia.”

² Te mukwa vumbi ku meso ja Zambi. Iye ni akwa zuwo lienyi te kaakuwayila hamwe ni Ayuda. Neye te kakuhana yawana kuli Ayuda nikulemba Zambi matangwa eswe.

³ Limwe tangwa chingoloshi, ngwe ha ola ya muchitatu, yamona zwalala mu Usolwelo kanganda ka mwilu kananjila ku mahienyi nikwamba ngwenyi: “Korneliu!”

⁴ Neye yamutala ni woma, yamuhula ngwenyi: “Mwene kuchi?” Kanganda ngwenyi: “Zambi hatayiza yilemba ye ni yawana yize wakuhana kuli yiswale, hakwiwuluka.

⁵ Haliabwila tuma malunga ku Jope akusakile umwe lunga, Simone, jina lienyi likwo Petulu.

⁶ Kakutwama maha Simone, mukwa kukotongola malambu. Zuwo lienyi lili ku mbumbulu ya kalunga lwiji.”

⁷ Muze kanganda ka mwilu haya, yoze te anahanjika nenyi, Korneliu yatambika ngamba aali a mu zuwo lienyi ni kajita umuwika, wa kuli waze akumulingila matangwa eswe, te mukwa kuwayila Zambi.

⁸ Neye yaambulwila yuma yeswe, mba yaatuma ku limbo lia Jope.

⁹ Muze hikwacha, shimbu te achili mu jila hakamwihi ni Jope, ngwe tangwa ha muchima, Petulu yakanduka ha fulumba lia zuwo mu kulemba.

¹⁰ Neye yevwa zala ni yazanga kulia. Shimbu maachiteleka, yamona mu Usolwelo

¹¹ lilu liakwazuluka, ni Chuma chalifwa ngwe hina linene, liakukasa ku mbango jiwana, chinahulumuka ndoo hashi.

¹² Mu hina yimubwa tushitu eka ni eka, ni tututu a hashi, ni tujila.

¹³ Petulu yevwa liji ngwo: “Petulu, katuka kwe, shiha, ulie.”

¹⁴ Alioze Petulu ngwenyi: “Ka, Mwene! Nilimwe tangwa kanda ngulia kama Chuma chibi hanji cha chijila.”

¹⁵ Petulu yevwa nawa liji ngwo: “Chuma, nyi Zambi hanachibemesa kulu, kanda uchivuluka ngwe: ‘Cha chijila.’ ”

¹⁶ Chuma chino yichibwa katatu. Mba susumuku Zambi yachitambula mwilu.

¹⁷ Petulu yalihulahula ulumbunwiso wa Usolwelo uze hamona. Ha shimbu lizeliene atu waze atumine Korneliu yaahula ha kunyingika zuwo lia Simone, yaamana ku chikolo kikilii.

¹⁸ Yaahula ni liji linene ngwo: “Kuchi, Simone yoze akuvuluka ngwo Petulu, muno mwatwama, nyi?”

¹⁹ Shimbu lize Petulu machinyonga ulumbunwiso wa Usolwelo, Mwiku wa Linanga yiumwamba ngwenyi: “Unevu ko? Atu anakufupu haze.

²⁰ Katuka, Palumuka, uye hamwe no. Kanda uyambashana, mumu yami ngunakaatuma.”

²¹ Petulu yapalumuka, yambila malunga waze ngwenyi: “Yoze nunafupu yami. Yika nunakaula?”

²² No yaamukumbulula ngwo: “Mwata wa tujita Korneliu unakatutuma. Kali mukwa ululi, ni kakuwayila Zambi hamwe ni Ayuda. Ayo eswe kaakumushindakenya. Kanganda ka mwilu wamulwezele ha kwiza ni kukusaka, uye ku zuwo lienyi akevwe maliji kuli yena.”

²³ Petulu yaatambula, yaalweza homa ha kubomba. Muze hikwacha, yakatuka, yaya hamwe no. Amwe akwa kufuliela a ku Jope yaamutwala.

²⁴ Tangwa lia muchaali yanjila mu limbo lia Sesarea. Korneliu yamutalila, te hakungulula usoko wenyi ni masepa jenyi.

²⁵ Muze Petulu ahetele ku zuwo, Korneliu yamubatwiza, yafulamana ku molu jenyi, yamuwayila.

²⁶ Alioze Petulu yamukatwisa, ngwenyi: “Katuka kwe, mumu yami nawa nguli mutu.”

²⁷ Muze te anahanjika nenyi, yanjila mu zuwo, yawana mo atu anji te kanakunguluka,

²⁸ yaamba ngwenyi: “Nunanyingika yenwene ngwenu, Shimbi jetu kujishi kutayiza umwe Kayuda kuliendela ni chilambala hanji kunjila mu zuwo lienyi. Alioze Zambi hanguweza ngwenyi, kuchatambile kuvuluka mutu niumwe ngwe, wa luchisa hanji wamokomoko.

²⁹ Kashika, muze unakangutambika chalitunyine ha kwiza. Ngunakuhula ngwami, yika nunakangutambikila?”

³⁰ Korneliu yakumbulula ngwenyi: “Ha ola ngwe yinoyene, matangwa atatu haabalika, te ngunalembe mu zuwo liami ha ola ya muchitatu ya chingoloshi. Susumuku mutu kanamana ku meso jami, te kanazala mahina abeyima.

³¹ Ngwenyi: ‘Korneliu, Zambi hevwa kuliumba che, hewuluka yawana ye yize wakuhana kuli yiswale.

³² Kashika tuma atu ku Jope hanga akasake Simone, jina lienyi likwo Petulu. Kakutwama mu zuwo lia Simone, mukwa kukotongola malambu, yoze watwama ku mbumbulu ya kalunga lwiji.’

³³ Shimbu lizeliene, natumine atu ni kukusaka. Walinga kanawa ha kwiza. Haliabwila yetu eswe tuli kuno ku meso ja Zambi, mu kwivwa yuma yeswe yize Mwene akwambile ha kutulongesa.”

Petulu yalongesa mu zuwo lia Korneliu

³⁴ Petulu yabutuka kuhanjika ngwenyi: “Mba hinanyingika chamwenemwene ngwami, Zambi keshi katonde.

³⁵ Mweswawo wakumusa vumbi ni wakulinga ululi, kakumutambula, chibwe wa ku vungu lieswaho.

³⁶ Nunanyingika liji lize Zambi atumine kuli Aisraele muze ambujolele Sango Jibema ja uhwimino ku tachi ja Yesu Kristu, mwe Mwene wa atu eswe.

³⁷ Nunanyingika yikuma yinene yize yafumanyine mu Yudea mweswe, butu ku Galilea, muze Yoano hamanyisa kwambujola chenyi hakutwala ku upapachiso.

³⁸ Ngwami, yikuma ya Yesu wa ku Nazare, ngwe chize Zambi hanamuwayisa ni Mwiku wa Linanga ni tachi. Yesu hanendangana kweswe ni kulinga yibema, ni kuwuka eswe waze amwesene lamba kuli Sakwonga, Yesu yabwa ni tachi ja kuchilinga mumu te Zambi kali hamwe nenyi.

³⁹ Yetu tuli yela ja yuma yeswe yize alingile mu chifuchi cha Ayuda ni mu Yerusaleme. Mwenawo amuhachile ha kulusu nikumushiha.

⁴⁰ Alioze Zambi yamuhindwisa ku kufwa ha tangwa lia muchitatu, mba yamusolola ni mwono,

⁴¹ hi kuli Ayuda eswe ko, alioze kuli yetu waze Zambi atongwele hatangu ngwe yela. Twalile, twanwine hamwe nenyi muze te hahinduka ku kufwa.

⁴² Yatwaha Shimbi ya kwambujola kuli atu ni kushindakenya ngwetu, Yesu mwe asele ngaji ya amwono ni ya waze haanafu kulu.

⁴³ Akwa munanyi eswe a Zambi haanamushindakenya ngwo, mweswawo wakumufuliela, Zambi kakumukonekena milonga yenyi ku tachi ja jina lia Yesu.”

Waze hi Ayuda ko yaatambula Mwiku wa Linanga

⁴⁴ Shimbu lize te Petulu machihanjika maliji wano, Mwiku wa Linanga yiuhulumukina waze evwile liji lienyi.

⁴⁵ Akwa kufuliela ja Ayuda waze ejile hamwe ni Petulu yaalishimwoka, mumu Zambi hahinjila chawana chenyi cha Mwiku wa Linanga nawa muli waze hi Ayuda ko.

⁴⁶ Mumu yeevwa nikuhanjika maliji waze te kanyingikine ko, nikuchichimieka unene wa Zambi. Mba Petulu yahula ngwenyi:

⁴⁷ “Atu wano hatambula nawa Mwiku wa Linanga ngwe yetu. Umwe mahasa kutukinda ha kwapapachisa ni meya, nyi?”

⁴⁸ Neye yamba aapapachise mu jina lia Yesu Kristu. No yaaliumba kuli Petulu atwame hamwe no amwe matangwa.