Yilinga 1 - Mukanda Wa Zambi 1970

Yesu yalakenya kwiza cha Mwiku wa Linanga

¹ Mukwetu Teofilu: Mu mukanda wami utangu, nasonekene yuma yeswe yize Yesu alingile ni alongesele, chize ku kabutu ka milimo yenyi,

² ndoo ku tangwa lize Zambi wamutambwile mwilu. Muze kanda achizezuka mwilu, ku tachi ja Mwiku wa Linanga, yaaha tumbaji waze atongwele Shimbi.

³ Kulutwe lia kufwa chenyi, yaasolokela ni mwono ni yinyingi yinji matangwa makumi awana. Yaalongesa yikuma ya Wanangana wa Zambi.

⁴ Muze haalikungulula, yaaha koki ngwenyi: “Kanda nukatuka mu Yerusaleme, alioze twaminyinenu chawana chize Tata alakenyene, chize nanulwezele.

⁵ Yoano te kakupapachisa ni meya, alioze kulutwe lia matangwa akepe, mungukanupapachisa ni Mwiku wa Linanga.”

Yesu yazezuka mwilu

⁶ Kashika muze tunganda alikungulwile ni Yesu, yaamuhula ngwo: “Mwene, haliabwila muuhilwisa Wanangana kuli Aisraele, nyi?”

⁷ Yesu ngwenyi: “Hi cha yenu ko kunyingika miaka ni mashimbu waze Tata asele mu chiyulo chenyi mwene.

⁸ Alioze munukatambula tachi muze Mwiku wa Linanga hiwanuhulumukina. Mba munukabwa yela jami mu Yerusaleme, ni mweswe mu Yudea ni Samaria, ni ndoo ku songo lia hashi.”

⁹ Muze te hamba maliji wano, shimbu maachimutala, Zambi yamutambula mwilu, mba lelwa yilimusweka ku meso jo.

¹⁰ Shimbu maachihulikila meso kwilu nee, muze te Yesu anazezuka, susumuku malunga aali yaamana hehi no, te kaanazala mahina atoma.

¹¹ Yaamba ngwo: “Yenu malunga a ku Galilea, yika nunamanyina hano ni kuhulikila meso kwilu? Yono Yesu, hanutambula yo mwilu, makahiluka nawa chizechene ngwe hinwamumona nikuya mwilu.”

Tumbaji yaatongola yoze masalakana Yudase

¹² Hohene tumbaji yaakatuka ku mulundu wa Olive nikuhiluka ku Yerusaleme, hi kusuku ko, ngwe kilometro yimuwika.

¹³ Muze te haaheta mu limbo, yaanjila mu limwe zuwo, yaakanduka ku chibatulo cha kwilu, kwenako atwamine. Wano e abwile ko: Petulu, ni Yoano, ni Tiangu (Jake), ni Andre, ni Filipe, ni Toma, ni Bartolomeu, ni Mateu, ni Tiangu (Jake), mwana wa Alfeu, ni Simone, mukwa kuzanga utuswilo wa chifuchi chenyi, ni Yudase, mwana wa Tiangu (Jake).

¹⁴ Wano eswe hamwe ni Maria, naye ya Yesu, ni mapwo akwo, ni anakwo ja Yesu yaanyongonona nikuwayila Zambi ni mbunge yimuwika.

¹⁵ Ha matangwa waze, Petulu yamana hakachi ka akwa kufuliela. Ayo eswe te ngwe kulakaji ni makumi aali. Neye yamba ngwenyi:

¹⁶ “Akwetu, chinalite chize maliji akamanunuke, waze Mukanda wa Zambi wambile shimbu kanda hakutwala kuli Yudase. Liji lize Mwiku wa Linanga wahanjikile kuli David, hakutwala kuli Yudase, kasongo ka waze ashihile Yesu.

¹⁷ Yudase wabwile umwe wa kuli yetu, neye watambwile milimo hamwe ni yetu.”

¹⁸ (Ni je mbongo jize amufwetele ku ungulungulu wenyi yalilanjila munda. Kwenako aholokelele hashi, mujimba wenyi yiumengunuka mukachi, ni mijingwa yenyi yeswe yiipusuka.

¹⁹ Akwa Yerusaleme eswe yeevwa yuma yize. Kashika alukile munda uze mu liji lio ngwo, Akeldama, kulumbunuka ngwo Munda wa Manyinga.)

²⁰ “Mumu hichinasonewa mu Mukanda wa Miaso (Masamu) ngwo: “Zuwo lienyi akalihichike, mutu niumwe kanda akatwama mo.’ Hichinasonewa nawa ngwo: ‘Mukwo akatambule milimo yenyi.’

^21-22 “Kashika chinalite mutu umuwika kulibalakenya ni yetu, abwe chela cha uhindukilo wa Mwene Yesu. Chatamba kubwa umwe wa ku mbunga yetu, butu kuze Yoano apapachishile atu ndoo ku tangwa lize azundwile Yesu mukachi ketu.”

²³ No yaakatwisa atu aali: Josefe, yoze te akuvuluka ngwo, Barsaba (jina likwo Justu), ni mutu mukwo Mataya.

²⁴ Mba eswe hamuwika yaalemba Zambi ngwo: “Mwene, yena wakunyingika mbunge ja atu eswe. Tulweze kama hakachi ka wano aali yoze hiunatongola,

²⁵ hanga asalakane Yudase mu milimo yino ya unganda, muhela uze Yudase ahichikile ha kuya kuma kwenyi mwene.”

²⁶ Mba yaata chela. Yichiholokela hali Mataya. Mwenawo alwile hamwe ni tunganda twa Yesu kumi ni kashi.