Usolwelo 9 - Mukanda Wa Zambi 1970

¹ Mba kanganda ka mwilu wa muchitano yemba chitavwi. Yingumona Lutongonoshi kanahulumuka kwilu nikuholoka hashi. Lutongonoshi yoze yamwaha sapi ya muma mwajotoka.

² Lutongonoshi yoze yazulula mwe muma mwajotoka. Yimukakumuka mwishi, yiubwa ngwe mwishi uze wakutuhuka mu lutengo wa kahia. Tangwa yililaa, ni fuji yiyalumuka mwishi ha mwishi, wa muma mwajotoka.

³ Mu mwishi yimutuhuka makumbi, yaabwa hashi. Makumbi waze yaaha tachi ngwe tachi ja tuvwanda.

⁴ Yaaha Shimbi ngwo, kanda akabihisa mwambu, chibwe mitondo, chibwe cheswe chibuta chikwo. Alioze chatamba kubinjisa shina lume atu waze keeshi ni yinyingi ya Zambi ha mahuma jo.

⁵ Makumbi waze kaahele ko chiyulo cha kushiha atu waze, alioze yaaha chiyulo shina cha kwabinjisa tukweji atano. Lamba lize makumbi ahanyine kuli atu waze, liabwile ngwe lia mutu yoze asuma kuli kavwanda.

⁶ Ha tukweji waze, atu waze maakazanga kufwa, alioze keechi kachimona. Maakazanga kufwa, alioze kufwa muchikaachina.

⁷ Makumbi te kaakumoneka ngwe tuvwalu waze analulika ha kuya ku jita. Ha mitwe yo yihabwa yuma ngwe yipangula ya oru ya wanangana, meso jo ngwe meso ja atu.

⁸ Kambu jo ngwe ja mapwo, mazo jo ngwe a tambwe.

⁹ Ha tulo jo kaanazala ngwe yikuto ya utale ya jita. Lundunjila wa mapulwa jo ngwe lundunjila wa matemba anji waze anakoko kuli tuvwalu ha kuya ni kwasa jita.

¹⁰ Makumbi waze michila akwete ni munyi ngwe ya tuvwanda. Ni michila yize, makumbi kaali ni tachi ja kusuma atu tukweji atano.

¹¹ Kaali ni mwanangana wo yoze wakwayula, kanganda ka muma mwajotoka. Jina lienyi mu hebreu ngwo, Abadone, mu greke ngwo, Apolione (kulumbunuka ngwo: “Mukwa Kushiha”).

¹² Lamba litangu hiliabalika, kwasala nawa lamba hali.

¹³ Mba, kanganda ka mwilu wa muchisambano yemba chitavwi. Yingwivwa liji linatuhuka ku mbango jeswe jiwana ja chilumbilo cha oru chize te chili ku meso ja Zambi.

¹⁴ Liji lize yiliambila kanganda ka mwilu wa muchisambano, yoze wabwile ni chitavwi, ngwo: “Yako utusule tunganda a mwilu awana akukasa hehi ni lwiji munene Ufrateze!”

¹⁵ Yatusula tunganda a mwilu awana. Zambi hanalulika kulu tunganda waze hanga akashihe Chihanda chimuwika cha ku yihanda yitatu ya akwa hashi eswe, ha ola yizeyene, ha tangwa lizeliene, ha kakweji yoze mwene, ni ha mwaka uzewene.

¹⁶ Yangulweza kwoka cha tujita waze akwenda hali tuvwalu, kwoka cho kulakaji jaali ja tununu ni tununu.

¹⁷ Mu Usolwelo yingumona tuvwalu ni tujita waze akwenda helu lio: tujita kaanazala yikuto ya jita, yikwo yichila ngwe kahia, yikwo yilauluka ngwe liwe lia safire, yikwo yichiwuluka ngwe mitelembe. Mitwe ya tuvwalu waze, ngwe mitwe ya tambwe. Mu makanwa jo yimutuhuka kahia, ni mwishi, ni mitelembe.

¹⁸ Chihanda chimuwika cha ku yihanda yitatu ya akwa hashi eswe afwile mumu ha lamba lino litatu: kahia, ni mwishi, ni mitelembe yize yatuhwokele mu makanwa ja tuvwalu waze.

¹⁹ Mumu tachi ja tuvwalu jili mu makanwa jo, ni ku michila yo. Michila yo yalifwa ni michila ya manoka. Michilia yize yikwete mitwe, yize akusuma nayo atu.

²⁰ Masalila waze eswe, waze kaafwile ko mu lamba lize, kaambilile ko mahamba waze asongele ni moko jo. Keehukile kuwayila mwiku wa luchisa, ni mahamba ja oru, ni prata, ni unengu, ni mawe, ni mitondo, mahamba waze keeshi kumona, keeshi kwivwa, keeshi kwenda.

²¹ Atu waze keehukile ha kushiha atu, chibwe ha kupanda wanga, chibwe ha kulinga utanji, chibwe ha kwiya.