Usolwelo 8 - Mukanda Wa Zambi 1970

Chijikilo cha muchishimbiali

¹ Muze mwe Mwana Panga hakasulula chijikilo cha muchishimbiali, mwilu yimuhola kuluu ngwe Chihanda cha ola.

² Mba yingumona tunganda a mwilu shimbiali kaanamana ku meso ja Zambi. Yaaha yitavwi shimbiali.

³ Kanganda ka mwilu mukwo yakundama ku chilumbilo, kanakwata chikwachilo cha oru chize akwochela nacho yuma ya vumba libema hamwe ni mba ya atu a Zambi eswe. Yamwaha yuma yize hanga ayoche milambu ha yilumbilo ya oru yize yili kulutwe lia chitwamo cha wanangana.

⁴ Mwishi wa yuma ya vumba libema, yize te yinafindangana kahia, ni yilemba ya atu ja Zambi yinakanduka ku kwoko lia kanganda ka mwilu yoze te unamana ku meso ja Zambi.

⁵ Mba kanganda wa mwilu yanda chikwachilo, yachizalisa ni kahia ka ha chilumbilo, yachimbila hashi. Yikubwa kukulunguza cha vula, ni zungo, ni mihenyo, ni kunyika cha hashi.

Yitavwi

⁶ Mba tunganda a mwilu, waze te anakwata yitavwi shimbiali yaalilulika ha kuyimba.

⁷ Kanganda ka mwilu mutangu yemba chitavwi. Vula wa chiwe ni kahia, yakuchinga ni manyinga, yiinoka hashi. Chihanda chimuwika cha ku yihanda yitatu ya hashi yichiwema upu, Chihanda chimuwika cha ku yihanda yitatu ya mitondo yichiwema upu, ni yambu yeswe ya wisu yiiwema upu.

⁸ Mba kanganda ka mwilu wa muchaali yemba chitavwi. Chuma ngwe mulundu unene yiufindangana kahia. Yaumbila mu kalunga lwiji. Chihanda chimuwika cha ku yihanda yitatu ya kalunga lwiji yichalumuka manyinga.

⁹ Chihanda chimuwika cha ku yihanda yitatu ya tushitu eswe a mu kalunga lwiji yaafwa, Chihanda chimuwika cha ku yihanda yitatu ya ulungu weswe yichifwa.

¹⁰ Hohene kanganda ka mwilu wa muchitatu yemba chitavwi. Mba lutongonoshi munene, yoze te Unaweme ngwe chichita cha mwambu chize hocha kahia, yichikatuka mwilu, yichiholokela ha Chihanda chimuwika cha ku yihanda yitatu ya kalunga lwiji ni ha mashima ja meya.

¹¹ (Jina lia Lutongonoshi yoze Musase.) Chihanda chimuwika cha ku yihanda yitatu ya meya yichalumuka asasu, ni atu anji afwile muze anwine meya waze, mumu te haasasa.

¹² Mba kanganda ka mwilu wa muchiwana yemba chitavwi. Chihanda chimuwika cha ku yihanda yitatu ya tangwa, ni ya kakweji, ni ya matongonoshi yichibwa milima. Kashika Chihanda chimuwika cha ku yihanda yitatu ya ku pangu liayo yeswe yichitoka. Pangu kuliabwile ko ku Chihanda chimuwika cha ku yihanda yitatu ya mwalwa ni ya ufuku.

¹³ Munatala nawa, mba yingwivwa tela, te kanabalika kwilu kuhiana ni kukololoka ngwenyi: “Lamba! Lamba! Lamba linji mulikeza hali atu eswe a hashi muze tunganda a mwilu akwo atatu maakemba yitavwi!”