Usolwelo 7 - Mukanda Wa Zambi 1970

Aisraele 144,000

¹ Munabwamuze yingumona tunganda a mwilu awana kaanamana ku mbango jeswe jiwana ja hashi, kaanakwata fuji yiwana ya hashi, hanga kuyichi kuhehuka hashi heswe, chibwe ha kalunga lwiji, chibwe ku weswe mutondo.

² Mba yingumona nawa kanganda ka mwilu mukwo kanakatuka ku chivumbuko, kanazezuka, kanakwata chijikilo cha Zambi ya mwono, kanakololoka kuli tunganda awana waze te ali ni chiyulo cha kubihisa hashi ni meya.

³ Ngwenyi: “Kanda nubihisa hashi, chibwe kalunga lwiji, chibwe mitondo ndoo muze hitwasa yinyingi ha mahuma ja tuvumbi twa Zambi yetu.”

⁴ Mba yingwivwa kwoka cha atu waze asele chinyingi cha Zambi ha mahuma jo. Ayo eswe kwoka cho kulakaji lia tununu ni tununu makumi awana ni awana twa atu a ku vungu lia Israele.

⁵ Tununu kumi ni aali a ku Chikota cha Yuda waze asele chinyingi, tununu kumi ni aali a ku Chikota cha Rubene, tununu kumi ni aali a ku Chikota cha Gade,

⁶ tununu kumi ni aali a ku Chikota cha Ashere, tununu kumi ni aali a ku Chikota cha Naftali, tununu kumi ni aali a ku Chikota cha Manase,

⁷ tununu kumi ni aali a ku Chikota cha Simeone, tununu kumi ni aali a ku Chikota cha Levi, tununu kumi ni aali a ku Chikota cha Isakare,

⁸ tununu kumi ni aali a ku Chikota cha Zabulone, tununu kumi ni aali a ku Chikota cha Josefe, tununu kumi ni aali a ku Chikota cha Benjamine.

Mbunga yinene ya mavungu eswe

⁹ Munabwamuze yingutala nawa, mba yingumona mbunga ya atu anji. Niumwe wahashile kwalula atu waze eswe! Atu a ku chifuchi cheswe, ni a ku vungu heswe, ni a kuli atu eswe, ni a ku maliji eswe. Kaanamana kulutwe lia chitwamo cha wanangana ni ku meso ja Mwana Panga, kaanazala mahina atoma, kaanakwata mitango ya mingaji mu moko jo.

¹⁰ Yaakololoka ngwo: “Zambi yetu, yoze watwama ha chitwamo cha wanangana, ni Mwana Panga, haanatulamwina.”

¹¹ Tunganda a mwilu eswe te kaanajingilika chitwamo cha wanangana, ni makulwana, ni akwa mwono awana. Mba yaafulamana kulutwe lia chitwamo cha wanangana, ni kuwayila Zambi.

¹² Ngwo: “Chibwe kama Chenacho! Uhaliso, ni uhenya, ni malinjekela, ni kusakwila, ni ulemu, ni ngolo, ni ndundo yinatela Zambi yetu ku miaka yeswe ni miaka yeswe! Chibwe kama Chenacho!”

¹³ Umwe mukulwana yanguhula ngwenyi: “Atu waze aya, anazala mahina atoma, kulihi anakatuka?”

¹⁴ Yingukumbulula ngwami: “Mwene, yena Unanyingika, hi yami ko.” Mba yangwambulwila ngwenyi: “Kaali atu waze haanatuhuka ku yihungumiona yinji. Haanakoso mahina jo, hanaatomesa ni manyinga ja Mwana Panga.

¹⁵ Kashika akumana kulutwe lia chitwamo cha wanangana wa Zambi. Kaakulingila Zambi mwalwa ni ufuku mu zuwo lienyi. Yoze watwama ha chitwamo cha wanangana makaafunga iye mwene.

¹⁶ No keechi kevwa nawa zala, chibwe pwila. Tangwa kulichi kasasaminya hali ayo, chibwe chivukuminya chinji ka.

¹⁷ Mumu Mwana Panga, yoze watwama mukachi ka chitwamo cha wanangana, makaafunga, makaatwala ku tusulo twa meya a mwono. Mba Zambi makakusumuna masoji eswe ku meso jo.”