Usolwelo 6 - Mukanda Wa Zambi 1970

Yijikilo

¹ Hohene yingumona Mwana Panga kanakasulula chijikilo chitangu cha yijikilo shimbiali. Mba yingwivwa umwe wa kuli akwa mwono awana kanahanjika ni liji ngwe lundunjila ngwenyi: “Tweya!”

² Munatala, mba yingumona kavwalu mutoma. Yoze watwamine ho te kanakwata uta wa manana. No yaamwaha chipangula cha wanangana. Yaya ngwe mukwa kukumba ha kukumba.

³ Hohene Mwana Panga yakasulula chijikilo cha muchaali, mba yingwivwa mukwa mwono wa muchaali nikwamba ngwenyi: “Tweya!”

⁴ Munatala, mba yingumona kavwalu mukwo muchila yatuhuka. Yoze watwamine ho yabwa ni chiyulo cha kuneha jita hashi, hanga atu alishihe. Yaamwaha mukwale unene.

⁵ Hohene Mwana Panga yakasulula chijikilo cha muchitatu, mba yingwivwa mukwa mwono wa muchitatu nikwamba ngwenyi: “Tweya!” Munatala mba yingumona kavwalu mulaa. Yoze watwamine ho kanakwata pezo yakwesekela.

⁶ Yingwivwa liji lize linatuhuka mukachi ka akwa mwono awana nikwamba ngwo: “Yoze halinga tangwa lia muundu, fweto yenyi muyibwa njongo yimuwika ya tiriku hanji njongo jitatu ja masa. Alioze kanda nubihisa maji ni vinyu!”

⁷ Hohene Mwana Panga yakasulula chijikilo cha muchiwana, mba yingwivwa liji lia mukwa mwono wa muchiwana nikwamba ngwenyi: “Tweya!”

⁸ Munatala, mba yingumona kavwalu mulauluka. Yoze watwamine ho jina lienyi Kufwa; ni Chifuchi cha Afu chinamukaula. Yaaha chiyulo cha kuyula Chihanda chimuwika ku yihanda yiwana ya hashi, ha kushiha atu ni mukwale, ni zala, ni misongo, ni tushitu a yitoji a hashi.

⁹ Hohene Mwana Panga yakasulula chijikilo cha muchitano, mba yingumona, kushi lia chilumbilo, atu waze afwile ha kwambujola liji lia Zambi ni ha shindakenyo yo yakushishika.

¹⁰ Yaakololoka ngwo: “Mwene Mukwa Ndundo Jeswe, munangi ni wamwenemwene, ndoo mwiji muka muukabatwila akwa hashi, ni kukala manyinga jetu?”

¹¹ Yaaha mutu mweswe hina lia lubula litoma. Yaamba alihumikize nawa shimbu likepe, ndoo muze muchimanunuka kwoka cha akwo akwa Kristu ni tuvumbi ni akwo, waze maakashiha ngwe ayo.

¹² Mba yingumona Mwana Panga kanakasulula chijikilo cha muchisambano. Hashi yihanyika kuhiana, tangwa yililaa, ngwe tuku ya hina lia kulinga ni wonawona ulaa. Kakweji yachila liakulu ngwe manyinga.

¹³ Matongonoshi kwilu yaaholwoka hashi, ngwe chize akuholoka makuyu a wisu ku mukuyu, muze mutondo wakutukunga ni kangonga.

¹⁴ Lilu yilitanduluka, ngwe mukanda muze mauvunga. Milundu yeswe ni matungu eswe yiitutujoka muma liayo.

¹⁵ Mianangana anene anene a hano hashi, ni akwa kuyula, ni miata ja tujita, ni pichi, ni akwa tachi, ni atu akwo eswe, chibwe ndungo, chibwe enyaho, eswe yaaya nikuswama mu yivwenge ni kushi lia mawe a ku milundu.

¹⁶ Mba yaambila milundu ni mawe ngwo: “Tuholokelenu, tuswekenu ku meso ja yoze unatwama ha chitwamo cha wanangana, tuswekenu ku utenu wa Mwana Panga.

¹⁷ Mumu tangwa lio lia utenu hilieza, mba iya mahasa kumana?”