Usolwelo 5 - Mukanda Wa Zambi 1970

Mukanda ni Mwana Panga

¹ Mu kwoko lia chindume cha yoze te watwama ha chitwamo cha wanangana, yingumona mukanda wakusoneka muchima ni haze, uze akashile ni yijikilo shimbiali.

² Yingumona kanganda ka mwilu wa ndundo te kanambujola ni liji linene ngwenyi: “Iya unatela ku kasulula chijikilo chino ni kubakula mukanda uno?”

³ Alioze chibwe mwilu, chibwe hano hashi, chibwe kushi lia hashi, niumwe kamwenekene yoze wahashile kukasulula mukanda ni kutala muchima.

⁴ Yingulila kuhiana, mumu niumwe kamonekene yoze unatela kubakula mukanda ni kutala muchima.

⁵ Mba umwe mukulwana yangwamba ngwenyi: “Kanda ulila. Tala, yoze unatela kujitula yijikilo yize shimbiali ni kubakula mukanda kali Tambwe wa ku vungu lia Yuda, yoze wasemukine ku Chikota cha David. Kanahase kuchilinga mumu hakumba.”

⁶ Mba yingumona Mwana Panga kanamana mukachi ha chitwamo cha wanangana. Akwa mwono waze awana ni makulwana anamujingilika. Mwana Panga yoze kanamoneka ngwe hamushiha. Kali ni mbinga shimbiali ni meso shimbiali. Yenayo mwiku shimbiali wa Zambi uze atumine hashi heswe.

⁷ Mwe Mwana Panga yaya, yatambula mukanda uze te uli mu kwoko lia yoze unatwama ha chitwamo cha wanangana.

⁸ Muze hatambula mukanda, akwa mwono waze awana ni makulwana waze makumi aali ni awana yaafulamana ku meso ja Mwana Panga. Mukulwana mweswe te kali ni chisaji ni misenge ya oru yize yinazala ni maji a vumba libema. Yenayo yilemba ya akwa Kristu.

⁹ E makulwana te kaanembi mwaso Waha ngwo: “Mumu haanakushihi, ni manyinga je hiunalanjila Zambi atu a ku vungu heswe, ni a liji heswe, ni a kuli atu eswe, ni a ku yifuchi yeswe.

¹⁰ Hiunaapwisa mahako a wanangana ha kulingila Zambi yetu. Kumaakayula hashi.”

¹¹ Yingutala nawa, mba yingwivwa liji lia tunganda a mwilu anji, yihuji ni yihuji, tununu ni tununu! Te kaanajingilika chitwamo cha wanangana, ni akwa mwono waze, ni e makulwana.

¹² Mba yeemba ni liji linene ngwo: “Mwana Panga yoze ashihile mwe unatela ndundo, ni upichi, ni malinjekela, ni ngolo, ni ulemu, ni uhenya, ni uhaliso!”

¹³ Yingwivwa nawa mukwa mwono mweswe mwilu, ni hano hashi, ni kushi lia hashi, ni mu kalunga lwiji—akwa mwono eswe waze alimo—nikwimba ngwo: “Uhaliso, ni ulemu, ni uhenya, ni ndundo yinatela yoze watwama ha chitwamo cha wanangana ni kuli Mwana Panga ku miaka yeswe ni miaka yeswe!”

¹⁴ Akwa mwono waze awana yaakumbulula ngwo: “Chibwe kama Chenacho!” Mba e makulwana yaafulamana hashi mu kuwayila.