Usolwelo 4 - Mukanda Wa Zambi 1970

Uwayilo mwilu

¹ Kulutwe lia yuma yino yingumona Usolwelo ukwo, chajilo chinazuluka mwilu. Liji lize te linahanjika ngwe chitavwi, lize nevwile hatangu, yilingulweza ngwo: “Zezuka kuno, mungukulweza yuma yize muyikabwa kulutwe.”

² Hazehene Mwiku wa Linanga yiungukwata. Mwe mwilu te chitwamo cha wanangana chilimo. Ha chitwamo chize umwe unatwama ho.

³ Kulifwa chenyi ngwe mawe a ndando yinji a bundumuka ni achila. Chitwamo te chinajingilika ni kongolo yoze te unalejima ngwe liwe lialifwa ni mafwo a matamba.

⁴ Yitwamo yikwo makumi aali ni yiwana ya wanangana te yinajingilika chitwamo cha wanangana. Makulwana makumi aali ni awana, waze te anazala mahina atoma ni yipangula ya oru, te kaanatwama ha yitwamo yize.

⁵ Ku chitwamo te kunatuhuka mihenyo, ni kukulunguza, ni zungo likwo. Masoka shimbiali a kuwika te analekwoka kulutwe lia chitwamo cha wanangana. Yenayo mwiku shimbiali ya Zambi.

⁶ Kulutwe lia chitwamo chize cha wanangana te yikubwa ngwe chitende cha katalilo, ngwe chiwe. Akwa mwono awana te kaanajingilika chitwamo cha wanangana, yaabwa ni meso kulutwe ni kunyima.

⁷ Mukwa mwono mutangu yalifwa ngwe tambwe, wa muchaali yalifwa ni mwana ngombe, wa muchitatu yabwa ni meso ngwe a mutu, wa muchiwana ngwe tela yoze wakuhumuka.

⁸ Mukwa mwono mweswe yabwe ni mapulwa asambano. Eswe yaabwa ni meso sali ni sali, muchima ni haze. Keeshi kulitwamina kwimba mwalwa ni ufuku ngwo: “Munangi, munangi, munangi, Mwene Zambi ya Ndundo Jeswe, Yoze wabwile yoze kwali, yoze makeza.”

⁹ Akwa mwono awana kaakuhalisa, nikulemesa, nikusakwilila yoze te watwama ha chitwamo cha wanangana, yoze ukwete mwono wa miaka yeswe. Muze akuchilinga,

¹⁰ makulwana waze makumi aali ni awana kaakufulamana ni kuwayila yoze watwama ha chitwamo cha wanangana, yoze ukwete mwono wa miaka yeswe. Kaakumbila yipangula yo kulutwe lia chitwamo chize cha wanangana, nikwamba ngwo:

¹¹ “Yena Mwene kanda Zambi yetu, kuwatela uhaliso, ni ulemu, ni ndundo. Mumu yena watangile yuma yeswe. Yuma yeswe kuyili ni mwono shina mumu ha upale we.”