Usolwelo 3 - Mukanda Wa Zambi 1970

Maliji ku Chikungulwila cha Sardu

¹ “Sonekena kanganda ka mwilu wa Chikungulwila cha mu limbo lia Sardu ngwe: “Mutu yoze uli ni Mwiku shimbiali wa Zambi ni matongonoshi shimbiali kanambe ngwenyi: Ngunanyingika yeswe yize wakulinga. Ngunanyingika ngwami, atu kaakunyonga ngwo, uli ni mwono, alioze kumana hiunafu kulu!

² Laula, utakamise yuma yize yinasala, yize yinambe kufwa (shimbu kanda yichifwa chamwenemwene). Mumu ngunamono ngwe, yuma yize wakulinga kuyalitele ku meso ja Zambi yami.

³ Kashika, iwuluka yuma yize akulongesele ni chize wayivwile. Funga yuma yize. Walumuke ku mbunge. Nyi kuwalawile ko, mungukutungumuna ngwe mwiji, kuuchi kunyingika ola yize mungukeza.

⁴ Alioze muze mu Chikungulwila chenu cha mu Sardu atu akwo alimo waze kaabihishile mahina jo. Enoo maakenda hamwe ni yami, maakazala mahina atoma, mumu kaanatela.

⁵ Yoze makakumba makazala mahina atoma. Chichi kajimuna nichimwe jina lienyi mu mukanda wa akwa mwono. Mungukamutayiza ngwami: ‘Niwami’, ku meso ja Tata ni ku meso ja tunganda twenyi a mwilu.

⁶ “Yoze uli ni matwi evwe chize Mwiku wa Linanga unambila Yikungulwila!”

Maliji ku Chikungulwila cha Filadelfia

⁷ “Sonekena kanganda ka mwilu wa Chikungulwila cha mu limbo lia Filadelfia ngwe: “Munangi kanda mukwa umwenemwene, yoze uli ni sapi ya mwanangana David, yoze wakwazulula alioze niumwe kahashile kwajila, yoze wakwajila alioze niumwe kahashile kwazulula, kanambe ngwenyi:

⁸ Ngunanyingika yeswe yize wakulinga. Ngunanyingika ngwami, tachi jikepe ukwete, alioze yiutayiza longeso liami, kuwangulitunyine ko. Ngunakazulula chajilo ku meso je chize niumwe kahashile kuchajila.

⁹ Mungukalinga chino kuli akwa mbunga ya Sakwonga, akwa mahuza waze akulipwisa Ayuda alioze hi Ayuda ko. Mungukaashinjika akeze ni kufulamana ku meso je, mba maakanyingika ngwo, nakukuzanga.

¹⁰ Nakulwezele ha kulihumikiza, mba yiulihumikiza. Kashika, ni yami mungukakufunga mu tangwa lia lamba lize mulikeza hali akwa hashi eswe ha kweeseka.

¹¹ Nguneza nikawashi. Lalaminya chize uli nacho, hanga niumwe kechi kachangumuna chipangula che.

¹² Yoze makumba, mungukamumika ngwe nguji mu zuwo lia Zambi yami, kechi katuhuka mo nawa nichimwe. Mungukasoneka hali iye jina lia Zambi yami, ni jina lia limbo lia Zambi yami, Yerusaleme yoze mwaha, yoze makahulumuka mwilu, kuze kwatwama Zambi yami. Mungukasoneka hali iye jina liami liaha.

¹³ “Yoze uli ni matwi, evwe chize Mwiku wa Linanga unambila Yikungulwila!”

Maliji ku Chikungulwila cha Laodisea

¹⁴ “Sonekena kanganda ka Chikungulwila cha mu limbo lia Laodisea ngwe: “Yoze uli Chibwe Kama Chenacho, chela wa kushishika kanda wamwenemwene, Ubutukilo wa yuma yeswe yize atangile Zambi kanambe ngwenyi:

¹⁵ Ngunanyingika yeswe yize wakulinga. Ngunanyingika ngwami, hi uli ngwe meya akekema ko chibwe meya akahia ko. Ngunazange kachi ubwe akekema hanji akahia!

¹⁶ Alioze mumu unasaluka, kuushi kahia chibwe kukekema, kashika mungukuhalula mu kanwa liami!

¹⁷ Wakwamba ngwe: ‘Nguli pichi, ngunawaha, Chishi kuhona Chuma nichimwe.’ Alioze kuwanyingikine ngwe uli mukwa luyinda ni mukwa lamba. Uli chiswale, uli uselesele, uli kapuputa.

¹⁸ Kashika, ngunakukanyamisa ngwami, Ulande kuli yami oru yize hanayisayisa mu kahia, hanga ubwe pichi. Ulande mahina atoma hanga Uzale. Chenacho kuuchi kwivwa sonyi. Ulande yitumbo ya kukwita ha meso je, hanga uhase kumona.

¹⁹ Eswe waze nakuzanga nakwakanjisa nikwamwesa lamba. Kashika, sako tachi, walumuke ku mbunge ye.

²⁰ Banjika! Ngunamana ku chikolo, ni kungongwela. Nyi mutu mevwa liji liami, ni mazulula chajilo, mungunjila mo. Mungulia hamwe nenyi, neye hamwe ni yami.

²¹ Yoze makumba mungukamutayiza kutwama hamwe ni yami ha chitwamo chami cha wanangana, ngwe chize yami hingunakumbu, ni hingunatwama ku sali lia Tata ha chitwamo chenyi.

²² “Yoze uli ni matwi, evwe chize Mwiku wa Linanga unambila Yikungulwila!”