Usolwelo 21 - Mukanda Wa Zambi 1970

Lilu liaha ni hashi haha

¹ Mba yingumona lilu liaha ni hashi haha. Lilu litangu ni hashi hatangu yiitoka, ni kalunga lwiji kabwile ko nawa.

² Yingumona Limbo lia Chijila, Yerusaleme mwaha, linahulumuka mwilu muze atwama Zambi. Linalulika ngwe nandungi yoze unalihenyesa ha kuya ni kutakana ni lunga lienyi.

³ Yingwivwa liji linene ku chitwamo cha wanangana ngwo: “Haliabwila Zambi kakutwama mukachi ka atu! Makatwama hamwe no, no maakabwa atu jenyi. Zambi iye mwene makabwa hamwe no, makabwa Zambi yo.

⁴ Makakusumuna masoji eswe ku meso jo. Kufwa kuchichi kabwa nawa, chibwe kunenganyana, chibwe mahio, chibwe yikola. Yuma yitangu hiyinahu.”

⁵ Mba yoze wakutwama ha chitwamo cha wanangana yamba ngwenyi: “Haliabwila ngunalingi yuma yeswe yaha.” Yangwamba nawa ngwenyi: “Soneka yuma yino, mumu maliji wano ngunahanjika kaali maliji amwenemwene, chatamba kwafuliela.”

⁶ Yamba nawa ngwenyi: “Hiyamanunuka! Yami nguli Alfa ni Omega, nguli mwe kabutu ni lie songo. Yoze Unevu pwila mungumwaha meya a mu kasulo ka mwono, mungumwaha chawana.

⁷ Yoze makakumba makatambula chawana chino ngwami: mungukabwa Zambi yenyi, neye makabwa mwanami.

⁸ Alioze akwa mwongo, ni waze keeshi kufuliela, ni akwa kuzelwokesa, ni akwa kushiha atu, ni yitanji, ni akwa kupanda wanga, ni akwa kukombelela mahamba, ni akwa mahuza eswe—chihanda cho muchikabwa mu wina wakuyila kahia ni fundanga, Chenacho che kufwa cha muchaali.”

Yerusaleme mwaha

⁹ Umuwika hakachi ka tunganda shimbiali, waze te anakwata misenge shimbiali yize yinazala ni lamba shimbiali liakusula, yeza nikungwamba ngwenyi: “Tweya, mungukulweza nandungi yoze anambata kuli Mwana Panga.”

¹⁰ Mwiku wa Linanga yiungukwata, mba kanganda ka mwilu yangutwala ndoo ku songo lia mulundu usuku Wahiana. Yangulweza Yerusaleme, Limbo lia Chijila, linahulumuka mwilu muze atwama Zambi.

¹¹ Linahenye ni uhenya wa Zambi. Limbo lize yililejima ngwe liwe lilemu, ngwe liwe lia bundumuka lize linamoneka ngwe katalilo.

¹² Limbo lize te likwete chipanga chinene chisuku. Chipanga chize te chikwete yikolo kumi ni yaali. Tunganda a mwilu kumi ni aali te akufunga yikolo yize. Ha yikolo yize yihasonewa majina ja mavungu kumi ni aali ja Aisraele.

¹³ Mbango ni mbango te yikwete yikolo yitatu: yitatu ku chivumbuko, yitatu ku norde, yitatu ku sude, yitatu ku chitokelo.

¹⁴ Chipanga cha limbo lize yichitungiwa ha mawe kumi ni aali. Ha mawe waze yihasonewa majina kumi ni aali a tunganda twa Mwana Panga.

¹⁵ Kanganda ka mwilu yoze wanguhanjikishile te kanakwata cheseko, lumbungu wa oru, ha kweseka nacho limbo, ni yikolo yalio, ni chipanga chalio.

¹⁶ Mbango jeswe jiwana ja limbo lize te chimuwika jibwa, chibwe ha usuku walio, chibwe ha unene walio. Kanganda yeseka limbo lize ni lumbungu wenyi. Usuhwe unene wa limbo lize te uli tununu aali kulakaji jaali ni makumi aali a kilometro. Usuhwe walio kwilu, ni ushwe walio hashi wabwile chimuwika.

¹⁷ Kanganda ka mwilu yoze yeseka nawa chipanga. Usuhwe wacho kwilu wabwile metro makumi asambano ni mutano. Cheseko chize esekele nacho Chenacho te akweseka nacho atu eswe.

¹⁸ Chipanga chize yaachitunga ni mawe a bundumuka, alioze lie limbo yaalitunga ni oru lume, oru yize te ngwe katalilo.

¹⁹ Fundamentu ja chipanga cha limbo te ja mawe alemu eka ni eka: liwe litangu lia fundamentu lia bundumuka, lia muchaali lilauluka, lia muchitatu lilauluka hakepe, lia muchiwana lia mafwo a matamba,

²⁰ lia muchitano lichila hakepe, lia muchisambano lichila, lia muchishimbiali lia kuvulala, lia muchinake lia mbundumbundu, lia muchilivwa lia usungwa, lia muchikumi lia pumbuka, lia muchikumi ni kashi lia umbundu, ni lia muchikumi ni aali lia ufungu.

²¹ Yajilo kumi ni yaali te yakulinga ni mawe kumi na aali a kaliki, chajilo ni chajilo liwe limuwika. Jila ya mu limbo lize ya oru lume, oru yize ngwe katalilo.

²² Chamwene zuwo lia Zambi mu limbo lize, mumu zuwo lia Zambi lili Mwene Zambi, Mukwa Ndundo Jeswe, ni mwe Mwana Panga.

²³ Limbo kulishi kufupa tangwa hanji kakweji ha kulitemwina, mumu uhenya wa Zambi wakulitemwina, ni mwe Mwana Panga kali ndeya yalio.

²⁴ Akwa hashi makenda mu Pangu lialio, ni mianangana ja hashi maaneha mo ubite wo.

²⁵ Yikolo ya limbo muyikabwa ya kwazulula tangwa lieswe nganganga, keechi kayajila nichimwe, mumu kuze kukuchi kabwa ufuku.

²⁶ Atu kumaakatwala mo ubite ni ulemu wa yifuchi yeswe.

²⁷ Chuma cha luchisa kuchichi kanjila nichimwe mu limbo lize, chibwe waze akulinga yuma ya sonyi, chibwe waze akuhanjika mahuza kaahashile kunjila mo. Alioze atu waze maakanjila mu limbo lize kaali lume waze majina jo hanaasoneka mu mukanda wa Mwana Panga, we mukanda wa akwa mwono.