Usolwelo 20 - Mukanda Wa Zambi 1970

Kanunu ka miaka

¹ Mba yingumona kanganda ka mwilu kanahulumuka mwilu. Mu kwoko lienyi kanakwata sapi ya muma mwajotoka ni lwoji munene wa utale.

² Yakwata dragau, kapela yoze wa shakulu, kulumbunuka ngwo, Sakwonga. Mba yamukasa ndoo kanunu ka miaka makamanunuka.

³ Kanganda ka mwilu yamunyasa muma mwajotoka, yakasa ko ni sapi, yajika ko ni chijikilo kanawa hanga Sakwonga kahashile nawa kupiangula mavungu ndoo muze kanunu ka miaka makamanunuka. Kulutwe ha chino, mba makamutusula ha shimbu likepe.

⁴ Hohene yingumona yitwamo ya wanangana ni waze atwamine ho. Yaatambula chiyulo cha kubatwila atu. Yingumona nawa miono ya atu waze ashihile mumu ambulwile umwenemwene uze asolwele Yesu Kristu ni maliji a Zambi. Kaawayilile ngongo yoze munene chibwe kaponya kenyi ka. Kaatambwile ko mufunda wa ngongo yoze chibwe ha mahuma jo, chibwe ha moko jo. Enoo yaabwa nawa ni mwono, ni yaayula hamwe ni Kristu kanunu ka miaka.

⁵ (Afu akwo kaahindukile ko ni mwono ndoo muze kanunu ka miaka hamanunuka.) Uno we uhindukilo utangu wa afu.

⁶ Kawaha kuhiana waze maakahinduka mu uhindukilo uno utangu! Kufwa cha muchaali kuchichi kaayula nichimwe. Maakabwa mahako a Zambi ni a Kristu. Maakayula hamwe nenyi kanunu ka miaka.

Zambi yakumba Sakwonga

⁷ Muze kanunu ka miaka makamanunuka, mba makatusula Sakwonga ku zuwo lienyi lia lamba.

⁸ Hohene makaya ni kwonga mavungu a ku sali heswe lia hashi, kulumbunuka ngwo: Gog ni Magog. Makaakungulula hamuwika ha kwasa jita. Maakabwa anji kuhiana, ngwe masekeseke ku mbumbulu ya kalunga lwiji.

⁹ Yaamwangana hashi heswe, yaajingilika mukala wa akwa Kristu ni limbo lize akuzanga Zambi. Alioze kahia yikahulumuka mwilu, yikocha eswe.

¹⁰ Mba Sakwonga, yoze te waakwonga, yamunyasa mu wina wa kahia ni fundanga, kuze anyashine kulu ngongo yoze munene ni mukwa munanyi wa mahuza. Kwenako makaamwesa lamba mwalwa ni ufuku, ku miaka yeswe ni miaka yeswe.

Ubatwilo wakusula

¹¹ Mba yingumona chitwamo chitoma chinene cha wanangana ni yoze watwamine ho. Hashi ni lilu yiichina ku meso jenyi, kaayimwene ko nawa.

¹² Mba yingumona makulwana ni twanuke, kaanamana kulutwe lia chitwamo cha wanangana. Mikanda te kaanayibakula. Mukanda ukwo nawa te kaanaubakula, mukanda wa akwa mwono. Atu te kanaabatwila nikulita ni yize alingile, nikulita ni yize asonekene mu mikanda.

¹³ Kalunga lwiji yatuhwisa atu waze afwile mu meya. Kufwa ni muma mwa afu yiimutuhwisa atu waze abwilemo. Ni eswe yaabatwila nikulita ni yize alingile.

¹⁴ Yaanyasa kufwa ni muma mwa afu mu wina wa kahia. (Wina uze wa kahia chili kufwa cha muchaali).

¹⁵ Yoze jina lienyi kuliasonewene mu mukanda wa akwa mwono, yamunyasa mu wina wa kahia.