Usolwelo 2 - Mukanda Wa Zambi 1970

Maliji ku Chikungulwila cha Efesu

¹ “Sonekena kanganda ka mwilu wa Chikungulwila cha mu limbo lia Efesu: “Yoze wakwata matongonoshi shimbiali mu kwoko lienyi lia chindume, yoze wakwenda mukachi ka yikwachilo shimbiali ya oru, ha yize akunangika ndeya, kanambe ngwenyi:

² Ngunanyingika yuma yeswe yize walingile, ni kuhondangana che. Ngunanyingika chize walihumikijine. Ngunanyingika chize kuushi kutayiza atu abi. Ngunanyingika nawa ngwami, hiuneseka waze akulivulwoka ngwo, Tuli tunganda twa Yesu, alioze kuma hi tunganda ko. Hiunaamono ngwe akwa mahuza.

³ Kuwakulihumikiza, hiunamono lamba mumu hali yami, alioze kuwahongele.

⁴ Alioze chibi chize ngunakumono chino: kuushi kunguzanga nawa ngwe hatangu.

⁵ Iwuluka ngwe chize hiunalimbuka. Litwamine kulinga yibi, linga ngwe chize te wakulinga hatangu. Nyi kuwalumukine ku mbunge, mungukeza kuli yena, ni kuchiza chikwachilo che cha ndeya ku muhela wacho.

⁶ Alioze Chuma ngunakuvwila kama kuwaha chino: wakubihilila Yitanga ya akwa Nikoleta, yize ni yami nawa nakubihilila.

⁷ “Yoze uli ni matwi, evwe chize Mwiku wa Linanga unambila Yikungulwila! “Kuli yoze makakumba mungumutayiza ha kulia mihuko ya mutondo wa mwono uze uli mu chipanga cha Zambi.”

Maliji ku Chikungulwila cha Smirna

⁸ “Sonekena kanganda ka mwilu wa Chikungulwila cha mu limbo lia Smirna ngwe: “Mwe mutangu ni mwe kasula songo, yoze wafwile ni wahindukile ku kufwa, kanambe ngwenyi:

⁹ Ngunanyingika lamba lie, ngunanyingika uswale we, alioze chamwenemwene uli pichi! Ngunanyingika atu waze akwamba ngwo: ‘Tuli Ayuda’, alioze hi Ayuda ko, kaakukushililika. Atu waze kaali a ku mbunga ya Sakwonga.

¹⁰ Kanda wivwa woma ha lamba lize muukamona. Banjika! Sakwonga makasa amwe hakachi kenu mu zuwo lia lamba ha kunweseka. Munukamona lamba matangwa kumi. Nyongonona mu ufulielo we ndoo ku kufwa, mba mungukakwaha chipangula cha mwono.

¹¹ “Yoze uli ni matwi, evwe yize Mwiku wa Linanga unambila Yikungulwila! “Yoze makumba kechi kafwa nawa ku kufwa cha muchaali.”

Maliji ku Chikungulwila cha Pergamu

¹² “Sonekena kanganda ka mwilu wa Chikungulwila cha mu limbo lia Pergamu ngwe: “Yoze uli ni mukwale wambuka kanambe ngwenyi:

¹³ Ngunanyingika kuze watwama, Sakwonga neye kwenako asa chitwamo chenyi cha wanangana. Yena wakungwononokena kuhiana. Chibwe muze ashihile chela chami wa kushishika, Antipa, mu limbo lienu, kuze atwama Sakwonga, alioze kuwehukile kungufuliela.

¹⁴ Alioze, chibi chize ngunakumwena chino: kuze ku Chikungulwila chenu amwe atu aliko waze akutayiza longeso lia Balame, yoze walongesele Balake chize mahasa kupiangula Aisraele ha kuvulumuna ni kulia yifwo yize akulambula ku mahamba, ni kulinga utanji.

¹⁵ Chizechene nawa mu Chikungulwila chenu, amwe atu alimo waze akutayiza longeso lia akwa Nikoleta.

¹⁶ Kashika, Chakutamba kwalumuka ku mbunge. Nyi ka, ha shimbu likepe mungukeza kuli yenu. Mungukasa jita ni atu wano ni mukwale uze wakutuhuka mu kanwa liami.

¹⁷ “Yoze uli ni matwi, evwe yuma yize Mwiku wa Linanga unambila Yikungulwila. “Yoze makumba, mungukamulisa mana, yakulia yize Zambi ahengekele. Mutu mweswe hakachi ko, mungukamwaha liwe litoma, ni ha liwe jina liaha linasonewa, alioze mutu niumwe manyingika jina lize, shina yoze makalitambula.”

Maliji ku Chikungulwila cha Tiatira

¹⁸ “Sonekena kanganda ka mwilu wa Chikungulwila cha mu limbo lia Tiatira ngwe: “Mwana Zambi, yoze uli ni meso a kulekwoka ngwe mulengi wa kahia, yoze uli ni molu akulejima ngwe unengu wakuhenyesa, kanambe ngwenyi:

¹⁹ Ngunanyingika yeswe yize wakulinga. Ngunanyingika zango lie ni ufulielo we. Ngunanyingika chize wakulihana ku milimo ni chize wakulihumikiza mu lamba. Ngunanyingika ngwami, milimo yize wakulinga hahabwila yili yinene yinahiana yize yitangu.

²⁰ Alioze chibi chize ngunakumwena chino: wakutayiza pwo yoze Jezebele, yoze wakulivuluka ngwenyi, mukwa munanyi wa Zambi. Kakupiangula tuvumbi twami mu kulinga utanji, ni ha kulia yifwo yize akulambula ku mahamba.

²¹ Hingunamwehe shimbu ha kwalumuka ku mbunge, alioze kasolo kulitwamina utanji wenyi.

²² Kashika mungukamumbila ha muhela wa lamba. Mungukamwesa nawa lamba linji waze te akulinga nenyi utanji, shina maalumuka ku mbunge nikwehuka yitanga yo yibi.

²³ Mungukashiha nawa ana jenyi. Mba Yikungulwila yeswe maakanyingika ngwo, nguli yoze wakunyingika manyonga ja atu ni upale wo. Mungukahana kuli mutu mweswe nikulita ni yitanga yenyi yize alingile.

²⁴ “Alioze yenu akwo, a mu Chikungulwila cha Tiatira, kunwatayijile longeso lize libi. Kunwalilongesele yize akuvuluka ngwo: ‘yijimbikilo yakuhengeka ya Sakwonga.’ Ngunanwambe ngwami, chichi kunutwika nawa yilemu yikwo.

²⁵ Alioze lalaminyenu chize nuli nacho ndoo ni muze mungukeza.

^26-28 Kuli yoze makakumba, ni kunyongonona kulinga upale wami ndoo ku songo, mungukamwaha chiyulo chize anguhele Tata. Mungukamwaha chiyulo cha kuyula mavungu eswe. Maakayula ni mbwechi ya utale ku moko. Makaabalula ngwe chize akubalula milondo ya uma. Mungukamwaha mutumbu wa chichamene.

²⁹ “Yoze uli ni matwi, evwe chize Mwiku wa Linanga unambila Yikungulwila.”