Usolwelo 19 - Mukanda Wa Zambi 1970

¹ Munabwamuze yingwivwa ngwe liji lia tachi lia atu anji mwilu, ngwo: “Halisenu Zambi! Ulamwino, ni uhenya, ni ndundo yili ya Zambi yetu!

² Ubatwilo wenyi uli wamwenemwene ni wa ululi! Mumu hanabatwila chitanji munene yoze wabihishile atu ni utanji wenyi. Zambi hanamubatwila, mumu washihile tuvumbi tweni.”

³ Yaamba nawa ngwo: “Halisenu Zambi! Mwishi wa kuwema cha limbo lize linene yiufwindangana kwilu ku miaka yeswe ni miaka yeswe!”

⁴ Makulwana waze makumi aali ni awana ni akwa mwono waze awana yaafulamana nikuwayila Zambi yoze te unatwama ha chitwamo cha wanangana, ngwo: “Chibwe kama Chenacho! Fumanyisenu Zambi!”

Umbachiso wa Mwana Panga

⁵ Yingwivwa liji ku chitwamo cha wanangana ngwo: “Makulwana ni twanuke halisenu Zambi yetu, yenu eswe waze nwakumuvumbika, ni waze akumuvwila woma!”

⁶ Mba yingwivwa zungo linji ngwe mbunga yinene anahanjika, ngwe mahuhwa anene, ngwe kukulunguza cha vula. Yaamba ngwo: “Halisenu Zambi! Mumu Mwene Zambi yetu, Mukwa Ndundo Jeswe kanayulu!

⁷ Tuwahililenu, tulikwizenu, tumuhalisenu. Mumu tangwa lia umbachiso wa Mwana Panga hiliaheta, ni nandungi yenyi halilulika.

⁸ Yamwaha kuzala hina litoma libema lia lejima.” (Hina litoma linasolola yitanga ya ululi ya akwa Kristu.)

⁹ Kanganda ka mwilu yangwamba ngwenyi: “Soneka ngwe: Kawaha waze hanaatambika ku umbachiso wa Mwana Panga.” Yangwamba nawa ngwenyi: “Maliji wano ngunahanjika kaali maliji amwenemwene a Zambi.”

¹⁰ Yingufulamana ku molu jenyi ha kumuwayila. Alioze yangwamba ngwenyi: “Ka, kanda uchilinga! Nguli kavumbi ni mukwenu hamwe ni akwenu waze akwete umwenemwene uze asolwele Yesu. Wayila Zambi!” Mumu umwenemwene uze asolwele Yesu, wenawo te Wakukolesa akwa munanyi a Zambi ha kwambujola maliji jenyi.

Mutu yoze watwama hali kavwalu mutoma

¹¹ Hohene yingumona lilu liakwazuluka, mba kavwalu mutoma yasoloka. Yoze te unatwama ho, jina lienyi Mukwa Kushishika ni Umwenemwene. Kakubatwila atu nikwasa jita ni ululi.

¹² Meso jenyi kaali ngwe mulengi wa kahia, ni yipangula yinji yiliko ha mutwe wenyi. Jina yilisonewa hali iye, alioze jina lize niumwe kalinyingikine shina iye wika.

¹³ Te kanazala hina lia kuchubika mu manyinga. Jina lienyi ngwo, Liji lia Zambi.

¹⁴ Tujita a mwilu yaamukaula, yaanyina hali tuvwalu atoma, te kaanazala mahina atoma abema.

¹⁵ Mu kanwa lienyi yimutuhuka mukwale wambuka uze makumba nawo mavungu. Makaayula ni mbwechi ya utale, makafwenya chizungwilo cha ukamino wa vinyu ya ufwatulo Wahiana wa Zambi, Mukwa Ndundo Jeswe.

¹⁶ Ha hina lienyi ni ha kulu lienyi yasoneka ho jina ngwo: “Mwanangana wa mianangana eswe, ni Mwene wa ene eswe.”

¹⁷ Mba yingumona kanganda ka mwilu kanamana mu tangwa. Yakololoka ni liji linene kuli tujita waze te anabalika mu tetela ngwenyi: “Tweyenu nukunguluke ku chiteleka chinene cha Zambi!

¹⁸ Tweyenu hanga nulie misunya ya mianangana anene anene, ni misunya ya tujita ni ya miata jo, ni misunya ya tuvwalu ni ya waze akutwama hali ayo, ni misunya ya atu eswe, ni ya ndungo ni enyaho, ni ya makulwana ni ya twanuke!”

¹⁹ Mba yingumona ngongo yoze munene, ni mianangana anene anene a hashi ni tujita two, haalikungulula hamuwika ha kwasa jita ni yoze unatwama hali kavwalu hamwe ni mbunga ya tujita twenyi.

²⁰ No yaakwata mwe ngongo ni mahuza yoze te wakulinga yilayi ku meso jenyi. (Ni yilayi yize yonga atu waze atambwile mifunda kuli ngongo yoze, ni waze te akuwayila kaponya kenyi.) Ngongo ni mukwa munanyi wa mahuza yaambila ni mwono mu wina uze wakulekwoka kahia ni fundanga.

²¹ Akwo yaashiha ni mukwale uze wakutuhuka mu kanwa ha yoze wakutwama hali kavwalu. Tujila eswe yalialia misunya yo.