Usolwelo 18 - Mukanda Wa Zambi 1970

Kubuzuka cha limbo lia Babilone

¹ Mba yingumona kanganda mukwo kanahulumuka mwilu. Kali ni chiyulo cha tachi, hashi yihapanguka ni uhenya wenyi.

² Yakololoka ni liji linene ngwenyi: “Hiliabuzuka! Hiliabuzuka! Limbo linene lia Babilone! Himwabwa muma mwa mwiku ubi wa luchisa. Tujila eka ni eka a chijila ni abi mwenamo atwama.

³ Mumu Babilone hananwisa mavungu eswe a hashi vinyu ya tachi ya utanji wenyi. Mianangana a hashi haanalingi nenyi utanji, ni akwa kulanjisa a hano hashi haanalibichisa mumu ha usolo wenyi unji wa kulinga utanji.”

⁴ Mba yingwivwa nawa liji mwilu ngwo: “Yenu atu jami, tuhukenu mu limbo, hanga kunuchi kulichinga ni milonga yenyi, ni hanga kunuchi kumona lamba lize makamona!

⁵ Mumu milonga yenyi hiyoka kuhiana, hiyaheta ndoo mwilu ni Zambi hanewuluka yibi yenyi yize alingile.

⁶ Mulingenu ngwe chize anulingile. Cheswe Chuma chize anulingile, mulingenu cho yisuho yaali. Weswe musenge uze anunwishine, ni yenu munwisenu wo yisuho yaali ya tachi kuhiana.

⁷ Mumwesenu lamba ni chinyengo nikulita ni kulihenyesa ni kulichichimieka chenyi mwene. Te kakwamba mu mbunge yenyi ngweni: ‘Ngunatwama hano mwanangana wa pwo. Hi nguli twamishi ko. Chichi kabwa ni chinyengo nichimwe.’

⁸ Kashika lamba lienyi kumulikeza ha tangwa limuwika: Kufwa, ni yinyengo ni zala. Makamwocha ni kahia. Mumu Mwene Zambi, yoze unamubatwila kali ni ndundo.”

⁹ Mianangana ja hashi waze alingile nenyi utanji, waze haanahungumuka ni yibi hamwe nenyi, maakalinyenga, maakalila mbimbi hali iye muze maakamona mwishi wa kuwema chenyi.

¹⁰ Maakamana kusuku, mumu ha woma wa lamba lienyi. Maakamba ngwo: “Mama yami! Mama yami! Babilone, limbo linene ni lia tachi! Lamba hiliakubwila ha ola yimuwika lume!”

¹¹ Akwa kulanjisa ja hashi nawa yaalila, yaanenganyana mumu hali iye, mumu niumwe unalande nawa yuma yo:

¹² oru, ni prata, ni mawe alemu, ni kaliki, ni mahina atoma abema, ni alauluka, ni achila, ni mahina aswa, ni mitondo yeka ni yeka ya ndando yinji, ni yuma yeka ni yeka yakulinga ni mazo a njamba, ni ya mitondo yilemu yahiana, ni ya unengu, ni ya utale, ni ya mawe alemu atoma,

¹³ ni yakulia yiyema ngwe kanela ni mulungo, ni yitumbo ya vumba libema yeka ni yeka, ni vinyu, ni maji, ni wunga, ni tiriku, ni ngombe, ni mapanga, ni tuvwalu, ni matemba, ni ndungo, ni miono ya atu nawa.

¹⁴ Akwa kulanjisa yaambila limbo lize ngwo: “Yuma yeswe yize wazangile kubwa nayo, haakuchiza yo. Upichi we weswe, ni uhenya we weswe hiyakuchina, kuuchi kuyimona nawa!”

¹⁵ Akwa kulanjisa waze alibichishile muze abwile ni kulanjisa yuma mu limbo lize, maakamana kusuku mumu ha woma wa lamba lienyi, maakalila ni maakanenganyana

¹⁶ nikwamba ngwo: “Mama yami! Mama yami! Lie limbo linene lize liazalile hatangu mahina atoma abema, ni alauluka, ni achila, te liakuzala yuma ya oru, ni mawe alemu, ni kaliki!

¹⁷ Mu ola yimuwika lume ubite wenyi weswe hiwatoka!” Tahwili eswe ni akwa kwenda ha meya, ni waze eswe akulinga milimo ha kalunga lwiji, yaamana kusuku.

¹⁸ Ha kumona kuwema chalio, yaakololoka ngwo: “Limbo nilimwe hilialifwa ni limbo lino linene!”

¹⁹ Yakuwakuwa fufuta ha mitwe yo hakulweza lamba lio, yaalilalila ni kunenganyana ngwo: “Mama yami! Mama yami! Lie limbo linene lize liabichishile waze te akwete maulungu ha kalunga lwiji! Mu ola yimuwika lume hiliatokesa yeswe!”

²⁰ Wahilila yena lilu! Wahililenu yenu akwa Kristu, ni tunganda twa Yesu, ni akwa munanyi a Zambi! Mumu Zambi halibatwila mumu ha yibi yize lianulingile!

²¹ Mba kanganda ka mwilu umuwika yanda liwe linene liahiana, yalimbila mu kalunga lwiji, ngwenyi: “Chenacho makanyasa limbo linene Babilone hashi ni tachi, kulichi kamoneka nawa nichimwe.

²² Muli yena keechi kevwa nawa atu kwimba yisaji, chibwe akwa kwimba miaso, chibwe akwa ndembo, hanji akwa yitavwi! Keechi kamona nawa mukwa milimo niumwe, keechi kevwa nawa mishindo ya kutwa niyimwe muli yena!

²³ Muli yena ndeya kuyichi katemuka nawa, keechi kevwa nawa liji lia sandungi hanji lia nandungi. Akwa kulanjisa je te anahiana akwa kulanjisa eswe a hano hashi. Ni wanga we yena yiwonga mavungu eswe a hano hashi!”

²⁴ Limbo lia Babilone yalibatwila, mumu awanyine mo manyinga ja akwa munanyi a Zambi ni akwa Kristu, manyinga ja waze eswe ashihile hano hashi.