Usolwelo 16 - Mukanda Wa Zambi 1970

Misenge shimbiali ya ufwatulo wa Zambi

¹ Mba yingwivwa liji linene mu zuwo lia Zambi nikwambila tunganda shimbiali a mwilu ngwenyi: “Yeenu numwange hashi misenge shimbiali ya ufwatulo wa Zambi!”

² Kanganda ka mwilu mutangu yamwanga hashi ufwatulo wa mu musenge wenyi. Mba atu waze atambwile mufunda wa ngongo munene ha mahuma jo, ni awayilile kaponya kenyi, yabwa ni yilonda yibi ni yikalu ha mijimba yo.

³ Mba kanganda ka mwilu wa muchaali yamwanga musenge wa ufwatulo ha meya. Meya yaalumuka ngwe manyinga ja mutu yoze hafwa, mba akwa mwono eswe waze abwile mo yaafwa.

⁴ Hohene kanganda ka mwilu wa muchitatu yamwanga musenge wenyi wa ufwatulo ha tulunga lwiji ni mu tusulo twa ngiji, mba yiyalumuka manyinga.

⁵ Yingwivwa kanganda ka mwilu, yoze uli ni chiyulo ha meya, nikwamba ngwenyi: “Yena hiwabatula ni ululi, yena Munangi, yena kuuli, yena wabwile!

⁶ Haanamwange manyinga ja atu ja Zambi ni akwa munanyi jenyi. Kashika haliabwila hiwaanwisa manyinga. Haatambula chize chinalite!”

⁷ Mba yingwivwa liji ku chilumbilo ngwo: “Ewa Mwene Zambi Mukwa Ndundo Jeswe, upatwilo we uli wamwenemwene ni wa ululi!”

⁸ Hohene kanganda ka mwilu wa muchiwana yamwanga musenge wenyi wa ufwatulo ha tangwa. Mba tangwa yilibwa ni chiyulo cha kwocha atu ni kahia.

⁹ Atu waze yaawema kahia kanji, mba yaashililika jina lia Zambi, yoze ukwete chiyulo cha lamba lize. Alioze kaalumukine ko ku mbunge ni kulemesa Zambi.

¹⁰ Kanganda ka mwilu wa muchitano yamwanga musenge wenyi wa ufwatulo ha chitwamo cha wanangana cha ngongo munene. Milima yiyibwa mu wanangana wa ngongo yoze. Atu yausumasuma malimi jo mumu ha yikola yo.

¹¹ Yaashililika Zambi ya mwilu mumu ha yikola ni yilonda yo. Alioze keehukile ko yitanga yo yibi.

¹² Kanganda ka mwilu wa muchisambano yamwanga musenge wenyi wa ufwatulo ha lwiji munene Ufrateze. Lwiji yoze yoma chau ha kuhana jila kuli miata waze akatukile ku chivumbuko.

¹³ Mba yingumona mwiku wa luchisa utatu walifwa ngwe yula ya mbota, unatuhuka mu kanwa lia ngongo munene dragau, ni mu kanwa lia ngongo mukwo, ni mu kanwa lia mukwa munanyi wa mahuza.

¹⁴ Mwiku uze wa luchisa wakulinga yilayi, wakuya kuli mianangana a hashi heswe ha kwakungulula hamuwika mu kwasa jita, ha tangwa linene lia Zambi, Mukwa Ndundo Jeswe.

¹⁵ Liji yiliamba ngwo: “Banjikenu! Nguneza ngwe mwiji! Kawaha yoze wakunongama ni wakufunga mahina jenyi, hanga kechi kubwa uselesele ni kechi kwivwa sonyi!”

¹⁶ Mwiku ubi yiukungulula mianangana muma muze akuvuluka mu hebreu ngwo, Armagedone.

¹⁷ Kanganda ka mwilu wa muchishimbiali yamwanga musenge wenyi wa ufwatulo mu tetela. Yingwivwa liji linene ku chitwamo cha wanangana mu zuwo lia Zambi ngwo: “Kwahwa!”

¹⁸ Kwabwile mihenyo ni kukulunguza cha vula ni zungo, ni kunyika cha hashi. Chize kuze Zambi atangile mutu te kanda hanyika kama ngwe chize, minyiko yibwa haha.

¹⁹ Limbo lize linene yilihandunuka yihanda yitatu, membo a yifuchi yeswe yaafwa. Zambi yewuluka limbo linene lia Babilone, mba yalinwisa vinyu ya musenge wenyi—vinyu ya ufwatulo wenyi.

²⁰ Matungu eswe ni milundu yeswe yiitoka.

²¹ Yikunoka chiwe chinene chinene, chiwe ni chiwe kulema chacho makumi awana a kilo. Yichiholwokela hali atu. Mba atu yaashililika Zambi ha lamba lia chiwe chize, mumu liabwile lamba linji liahiana.