Usolwelo 15 - Mukanda Wa Zambi 1970

Tunganda a mwilu ni lamba liakusula

¹ Mba yingumona chikomokeso chahiana mwilu. Tunganda a mwilu shimbiali kaanakwata lamba shimbiali. Lamba lize lili lamba liakusula, lienalio linalweze ufwatulo wa Zambi.

² Mba yingumona chimwe Chuma ngwe kalunga lwiji, wakuchinga ni kahia, yoze walifwa ni katalilo. Yingumona nawa atu waze haanakumbu ngongo yoze munene ni kaponya kenyi, yoze jina lienyi liakwalula. Yaamana hakamwihi ni kalunga lwiji yoze uli ngwe katalilo, anakwata yisaji yize aahele Zambi.

³ Te kaanembi mwaso wa Mose, kavumbi ka Zambi, ni mwaso wa Mwana Panga ngwo: “Mwene Zambi, Mukwa Ndundo Jeswe, yitanga ye yili yinene ni yakukomwesa! Yena Mwanangana wa mavungu eswe, majila je kaali a ululi ni a umwenemwene!

⁴ Mwene, iya kechi kukuvwila woma? Iya kechi kulemesa jina lie? Mumu yena wika uli Munangi. Akwa hashi eswe meeza ni kuwayila ku meso je, mumu yitanga ye ya ululi yinasoloka kuli atu eswe.”

⁵ Munabwamuze yingumona zuwo lia Zambi linazuluka mwilu, ni mu zuwo lize muli zuwo lia kuwayila liakutunga ni makubu.

⁶ Tunganda a mwilu shimbiali, waze te anakwata lamba shimbiali, yaatuhuka mu zuwo lia Zambi. Te kaanazala mahina atoma atemuka, ni miya ya oru ha tulo jo.

⁷ Mukwa mwono umuwika wa kuli akwa mwono awana yahana misenge shimbiali ya oru kuli tunganda a mwilu. Misenge yize yinazala ni ufwatulo wa Zambi, yoze wakutwama ni mwono ku miaka yeswe ni miaka yeswe.

⁸ Zuwo lia Zambi lize yilizala ni mwishi uze wakukatuka ku uhenya wa Zambi ni ku ndundo jenyi. Mutu niumwe wahashile kunjila mu zuwo lia Zambi ndoo muze lamba shimbiali, lize atwalile tunganda a mwilu, mulimanunuka.