Usolwelo 14 - Mukanda Wa Zambi 1970

Mwaso wa kule

¹ Munatala, mba yingumona Mwana Panga kanamana ha Mulundu wa Zione. Atu kulakaji ni makumi awana ni awana a tununu abwile hamwe nenyi. Jina lia Mwana Panga ni jina lia Tato yaasonewa ha mahuma jo.

² Yingiwvwa liji linatuhuka mwilu ngwe mahuhwa a meya, ngwe kukulunguza cha vula. Liji lize nevwile lialifwa ni liji lia yisaji.

³ Atu waze te anamana kulutwe lia chitwamo cha wanangana, ni ku meso ja akwa mwono waze awana, ni ku meso ja makulwana. Mba yeemba mwaso Waha. Mutu niumwe kahashile kulilongesa wo, shina atu waze kulakaji ni makumi awana ni awana a tununu, waze Mwana Panga akulile hano hashi.

⁴ Wano kaalibihishile ko ni mapwo, mumu te akwa kulinanga. Te kaakukaula Mwana Panga kuze kweswe te akuya, yaahandununa mukachi ka atu ni kwakunjika ngwe mulambu utangu kuli Zambi ni kuli Mwanenyi.

⁵ Te keeshi kuhanjika mahuza, keeshi kapalia.

Tunganda atatu a mwilu

⁶ Mba yingumona kanganda ka mwilu mukwo, kanabalika mu tetela, te kali ni Sango Jibema ja miaka yeswe jakwambujola kuli akwa hashi, ni ku vungu heswe, ni ku Chikota cheswe, ni ku liji heswe, ni kuli atu eswe.

⁷ Yakololoka ni liji linene ngwenyi: “Mwivwilenu Zambi woma, mulemesenu! Mumu tangwa lize makabatwila atu hilieza. Wayilenu Zambi yoze watangile lilu, ni hashi, ni kalunga lwiji, ni tusulo twa ngiji!”

⁸ Kanganda ka mwilu wa muchaali yakaula yoze mutangu. Ngwenyi: “Limbo ha Babilone hiliabuzuka, hiliabuzuka! Limbo lize lianwishine mavungu eswe vinyu ya utanji wenyi!”

⁹ Kanganda ka mwilu wa muchitatu yakaula tunganda waze aali ahangile, yakololoka ngwenyi: “Nyi mutu mawayila ngongo yoze munene ni kaponya kenyi, ni matambula mufunda uze ha huma lienyi hanji ha kwoko lienyi,

¹⁰ kumakanwa vinyu ya ufwatulo wa Zambi, vinyu ya tachi yize Zambi asele mu musenge wa ufwatulo wenyi! Atu eswe waze akulinga yuma ngwe yize kumaakamona lamba ha kahia ni fundanga ku meso ja tunganda a mwilu a kulinanga ni ku meso ja Mwana Panga.

¹¹ Mwishi wa kahia kaze kakwabinjisa wakufwindangana mwilu ku miaka yeswe ni miaka yeswe. Waze awayilile ngongo munene ni mwe kaponya kenyi, ni mweswawo hanatambula mufunda wa jina lienyi, keechi kabwa ni uhwimino mwalwa ni ufuku.”

¹² Kashika akwa Kristu waze akufunga Shimbi ja Zambi, ni akufuliela Yesu, chaatamba kunyongonona.

¹³ Mba yingwivwa liji linene mwilu, yilingwamba ngwo: “Soneka chino: Kawaha waze akufwila mu milimo ya Mwene Yesu chize ku tangwa lino!” Mwiku wa Linanga ngwenyi: “Ewa, Chenacho. Kumaakahwima ku kuhondangana cho, mumu yitanga yo yibema yize alingile yinaakaula.”

Kubatula cha mihuko ya hashi

¹⁴ Munatala, mba yingumona lelwa litoma, ni ha lelwa umwe kanatwama ho walifwa ni mutu. Ha mutwe wenyi hali chipangula cha oru cha wanangana, mu kwoko lienyi poko yambuka.

¹⁵ Kanganda mukwo wa mwilu yatuhuka mu zuwo lia Zambi, yakololoka ni liji linene kuli mutu yoze te unatwama ha lelwa ngwenyi: “Anda poko ye yakubatula nayo mihuko, mumu ola ya kubatula mihuko ya hano hashi hiyaheta, hashi hihahia ha kubatula mihuko!”

¹⁶ Mba yoze te unatwama ha lelwa yasa poko yenyi hashi, yabatula mihuko ya hashi.

¹⁷ Kanganda mukwo yatuhuka mu zuwo lia Zambi lize lili mwilu. Neye te kali ni poko yenyi yambuka.

¹⁸ Kanganda mukwo wa mwilu, yoze ukwete chiyulo cha kahia, yakatuka ku chilumbilo, yakololoka ni liji linene kuli kanganda yoze te uli ni poko yambuka ngwenyi: “Anda poko ye, batula mihuko ya mitondo ya vinyu ya hashi, mumu hiyahia!”

¹⁹ Kanganda yoze yasa poko hashi, yabatula mihuko ya vinyu ya hashi, yayisa mu ukamino unene wa ufwatulo wa Zambi.

²⁰ Mihuko yize yayikamina haze lia limbo. Mu ukamino yimutuhuka mishilinjinji ya manyinga. Kwoka cha manyinga yichibwa kulakaji jitatu ja kilometro ha usuku, ha unene metro yimuwika ni makumi atano.