Usolwelo 13 - Mukanda Wa Zambi 1970

Tushitu aali

¹ Mba yingumona ngongo munene mukwo, te unatuhuka mu kalunga lwiji. Te kali ni mbinga kumi, ni mitwe shimbiali. Kanazala yipangula ha mbinga jenyi jeswe, ni ha mitwe yenyi hanasonewa majina ja kuchoka Zambi.

² Ngongo yoze namwene te kanalifu ni kolwama, molu jenyi ngwe molu ja ngongo munene, ursu, kanwa lienyi ngwe kanwa lia tambwe. Ngongo yoze mukwo munene, dragau, yamwaha tachi jenyi mwene, ni chitwamo chenyi cha wanangana, ni chiyulo chenyi chinene.

³ Mutwe umuwika wa ku mitwe ya ngongo yoze yiumoneka ngwe uli ni chilonda cha kufwa, alioze che chilonda yachiwuka. Akwa hashi eswe yaalishimwoka, yaamukaula,

⁴ yaawayila dragau, mumu wahanyine chiyulo chenyi kuli ngongo yoze. Yaawayila nawa ngongo yoze ngwo: “Iya unalifu ni ngongo yono? Iya mahasa kwasa nenyi jita?”

⁵ Dragau yahana kuli ngongo yoze chiyulo cha kuhanjika maliji a kulengumuka ni a kusaula Zambi. Yamwaha chiyulo cha kulinga nacho tukweji makumi awana ni aali.

⁶ Yaasaula Zambi ni jina lienyi, ni homa haze atwama, ni eswe waze atwama mwilu.

⁷ Dragau yamwaha chiyulo cha kwasa jita ni atu ja Zambi ni kwakumba. Yamwaha chiyulo cha kuyula mavungu eswe, ni akwa maliji eswe, ni yifuchi yeswe.

⁸ Akwa hashi eswe maakamuwayila, kafwa ngwe, waze majina jo kasonewene, chize ku kutanga cha yuma yeswe, mu mukanda wa akwa mwono wa Mwana Panga yoze ashihile.

⁹ “Yoze uli ni matwi, evwe!

¹⁰ Mweswawo chatamba kusa mu zuwo lia lamba, maakamutwala lume mu zuwo lia lamba. Mweswawo chatamba kushiha ni mwela, maakamushiha lume ni mwela. Kashika, atu ja Zambi chaatamba kunyongonona mu ufulielo wo.”

¹¹ Mba yingumona ngongo munene mukwo unavumbuka hashi. Te kali ni mbinga jaali ngwe mbinga ja mwana panga, yahanjika ngwe ngongo munene, dragau.

¹² Te kakulinga ni chiyulo cha ngongo munene mutangu ku meso jenyi. Yashinjika hashi ni atu jaho kuwayila ngongo mutangu, yoze chilonda chenyi cha kufwa achiwukile.

¹³ Ngongo yoze wa muchaali te kakulinga yilayi yinji, te kakuhulumwisa kahia ka mwilu ndoo hashi ku meso ja atu eswe.

¹⁴ Te kakupiangula akwa hashi eswe ni yilayi yize amuhele kulinga ku meso ja ngongo yoze mutangu. Te kakwambila akwa hashi hanga alinge kaponya wa kuhalisa nenyi ngongo yoze alemekene ni mwela alioze kafwile ko.

¹⁵ Ngongo yoze wa muchaali yamwaha chiyulo cha kwaha kaponya wa ngongo yoze mutangu mwiku wa mwono, hanga kaponya yoze ahanjike, ni ashihe atu eswe waze keeshi kumuwayila.

¹⁶ Mwe ngongo yashinjika atu eswe, twanuke ni makulwana, pichi ni yiswale, ndungo ni enyaho, ha kutambula mufunda ha moko a chindume ni ha mahuma.

¹⁷ Mutu niumwe kahashile kulanda hanji kulanjisa Chuma, nyi kabwile ko ni mufunda uze, kulumbunuka ngwo, jina lia ngongo, hanji chize analula jina lienyi.

¹⁸ Ha kunyingika chikuma chino, chatamba kubwa ni mana. Yoze uli ni malinjekela mahasa kunyingika ulumbunwiso wa kwalula ngongo yoze, mumu kwalula chize chinalite ni jina lia mutu. Kwalula cha mutu yoze chili kulakaji jisambano ni makumi asambano ni yisambano.